جیاوازى رووشنهویرى له‌ناونى خوه‌رهه‌ڵاتى و خوه‌رئاوایى

شفق نيوز

بتویه‌نیگ خوه‌ى له‌سه‌ختى و گرفته‌یل فره‌یگ وه‌پى قورتار بكا له‌ژیان رووژانه‌ى، وه‌لى دیاره‌ له‌ناونى خوه‌رهه‌ڵاتى و خوه‌رئاوایى جووره‌ ره‌فتاره‌یل جیاوازیگ هه‌س ك ئه‌ویش هه‌ر كه‌سیگ وه‌گووره‌ى داب و نه‌ریت كوومه‌ڵگا رووشنهویرى خوه‌یان نیشانده‌ن، ك یه‌یش جویر كلتوور و فه‌رهه‌نگ جیاوازى دیرن له‌ ملله‌تیگه‌وه‌ ئه‌را ملله‌تیگ تر.

* له‌باوه‌ت ده‌رخستن ڕاى، خوه‌رهه‌ڵاتیه‌یل وه‌ پیچاوپیچه‌وه‌ راى خوه‌یان نیشانده‌ن، وه‌لى خوه‌رئاوایه‌یل روى وه‌ڕوى راى خوه‌یان ئاشكرا كه‌ن.

* ئه‌را مه‌سه‌له‌ى چوینیه‌تى ژیان، كومه‌ڵگاى خوه‌رهه‌ڵاتى حاڵه‌تیگ كومه‌ڵایه‌تى دیرن ك وه‌ جووریگ نزیكن له‌یه‌كترى، وه‌لى خوه‌رئاوایى هه‌میشه‌ جیا له‌یه‌كترى ژیه‌ن.

* له‌ واده‌و چگن ئه‌را بان كار، خوه‌رهه‌ڵاتى یا ئه‌وه‌سه‌ سه‌عاتیگ وه‌رجه‌ ده‌وام تیه‌یگ  یا ئه‌وه‌سه‌ دو سه‌عات مینیگه‌ ده‌وام خوه‌ى دزیگه‌وه‌، وه‌لى خوه‌رهه‌ڵاتى له‌وه‌خت دیاریكریاگ بى زیاى و كه‌م تیه‌نه‌ بان كار خوه‌یان.

* كوومه‌ڵگاى خوه‌رهه‌ڵاتى مه‌ردمه‌یلى وه‌ یه‌كا وه‌رده‌وام په‌یوه‌ندى دیرن و گشتیان یه‌كترى ناسن له‌ناونى خوه‌یان، وه‌لى مه‌ردم خوه‌رئاوایى په‌یوه‌ندیه‌یلیان مه‌رزداره‌.

* ئه‌را نیشانداین هس وه‌رانوه‌ر كه‌سه‌یل تر، بڕیگ  مه‌ردم خوه‌رهه‌ڵاتى یا شه‌رقى وه‌ختى دوینیده‌یان سڵامد كه‌ن و خه‌نن وه‌لداو له‌دڵه‌وه‌ ئویشن( ئوهۆ هه‌م هاته‌ تویشمه‌وه‌) وه‌لى له‌ خوه‌رئاوا ئه‌گه‌ر یه‌كیگ  حه‌ز له‌ چاره‌د نه‌كا وه‌بى پیچاوپیچ یه‌كسه‌ر وه‌ره‌ڕوى ئویشیگه‌ى پید.

* مه‌ردم له‌ خوه‌رئاوا له‌وه‌خت مووڵه‌ت(اجازه‌) نیشنه‌ ماڵ و ئسراحه‌ت كه‌ن، وه‌لى بنوڕنه‌ خوه‌رهه‌ڵاتى گشتیان هانه‌ جاده‌ وه‌تایبه‌ت ڕووژه‌یل جومعه‌.

* خورهه‌ڵاتى له‌وه‌خت نانخواردن چوارده‌ور مه‌ژمه‌گه‌ گرن و باڵ ئه‌ڕاى هه‌ڵمان و تا تویه‌نن خوه‌ن، وه‌لى خوه‌رئاوایى نانخواردنیان وه‌ به‌رنامه‌سه‌و خواردنیان كه‌مه‌، وه‌ل ئه‌وه‌یشا ته‌ماشا كه‌ید مه‌ردم خوه‌رئاوایى شه‌وه‌كیان قه‌واڵتى سووكیگ  كه‌ن و نیمه‌ڕوان خواردن كه‌م و له‌وه‌خت شامیش سووكه‌ خواردنیگ  یا میوه‌جاتیگ خوه‌ن، وه‌لى مه‌ردم خوه‌رهه‌ڵات ڕووژى سێ تاق خه‌ریك نان خواردنن و نوڕید وه‌بان ئه‌وه‌یشه‌وه‌ هه‌ر ورسگیانه‌.

* له‌وه‌خت گه‌شتكردن، خوه‌رهه‌ڵاتیه‌یل حه‌ز كه‌ن ره‌سم شوونه‌یل خوه‌ش بگرن، وه‌لى خوه‌رئاوایى ئویشن ته‌نیا ته‌ماشاكردنیان به‌سه‌.

* خوه‌رهه‌ڵاتیه‌یل واران و خوه‌ر جیوازى نه‌یریگ له‌لایان، وه‌لى مه‌ردم خوه‌رئاوایى حه‌ز له‌ خوه‌ر و خوه‌ره‌تاو كه‌ن.

دى نیه‌زانیم مه‌ردم خوه‌رهه‌ڵات خوه‌یان وه‌ خاستر زانن تا مه‌ردم خوه‌رئاوا، یه‌یش مینیگه‌ بان ره‌فتار خاس و هویر و پیشكه‌فتن خاس.