تيه‌ريكستان

شفق نيوز

له‌ وه‌خت سه‌ختيگ جووگه‌يل شار پڕ كريان له‌ خوين، گيرستن و شين وزاری شوون خه‌نستن و جه‌شنانه‌ گرت و ده‌سه‌يل پيس وه‌ خوين كورد قرمز بوی وه‌بی گووشداين وه‌ هويچ ياساو ده‌ستووريگ زه‌مينی و ئاسمانی.

له‌ يه‌كه‌م رووژ جه‌شن قوربان خوه‌يان خزاننه‌ ناو باره‌گای لق دو پارت ديموكرات كوردستان و مه‌ڵبه‌ند ٣ی يه‌كێتی نيشتمانی كوردستان و له‌ ئاكاميش شماره‌يگ پێشمه‌رگه‌و كادر دڵسووز و بی وچان وه‌ره‌و ژيانيگ تر خستنه‌ڕی و ئه‌را يه‌كجاری ماڵئاوايی له‌ خاك و نيشتمان و ئنتماو هاوڕی و كه‌س وكاريان كردن.

شماره‌يگ پێشمه‌رگه‌ ك له‌ رووژه‌يل سه‌خت خه‌بات و روی وه‌ڕوی بوينه‌وه‌ی چه‌ك دوشمن وه‌پيان نه‌ڕه‌سی، وه‌لی له‌ يه‌كه‌م رووژ جه‌شن قوربان و له‌ شاريگ كويه‌ن و ئارام ترۆر كريان و شه‌مشه‌مه‌كووره‌يل خه‌زانيگ ئه‌سر خستنه‌ بان چه‌وه‌يل و داڵگه‌يل دڵسووزيان جه‌رگسزياگ و ماڵويران كردن.

يه‌ك شووبات رووژيگ جريوه‌دار و وه‌خوين قرمز بويه‌ له‌ خه‌بات سياسی و چه‌كداری و روی وه‌ڕوی بوينه‌وه‌ی كورد دژ وه‌ هه‌ر دوشمنيگ ك ماف ژيان وه‌ كورد له‌لای ره‌وا نه‌ويه‌، يه‌ك شووبات گه‌وراترين زه‌ره‌د بوی ئه‌را كورد و سه‌ركردايه‌تی كورد له‌شوون راپه‌ڕينه‌و، ئامانجيگ بوی ئه‌را له‌ناوبردن كورد و دروسكردن جياخوازی و ناته‌بايی.

كينه‌تداره‌يل و شه‌مشه‌مه‌كووره‌يل ئه‌وه‌ چه‌سپانن ك گووش نايه‌نه‌ ئنتمای تاك، به‌ڵكوو ئامانج سه‌ره‌كی ئه‌وان له‌ناوچگن كورده‌، وه‌لی ترۆريسته‌يل وه‌ هويچ شيوه‌يگ نه‌تويه‌نستن بڕه‌سنه‌ ئامانج خوه‌يان وه‌و ده‌سه‌يله‌ ك وه‌خوين كورد قرمزی كردن.

وه‌ بوونه‌ی دانايی سه‌ركردايه‌تی سياسی كوردستانه‌و ليست هاوپه‌يمانی كوردستان دروس بوی و دوياخريش حكوومه‌ت يه‌كگرتگ كوردستان. ئمجا يه‌ك شووبات بويه‌ مايه‌ی يه‌كڕزی و دروسبوين حكوومه‌ت يه‌كگرتگ.

وه‌لی با فيشتر له‌بان ئی باوه‌ته‌ نه‌چيم و ئاماژه‌ وه‌پيان نه‌كه‌يم، چوينكه‌ باسكردن هه‌ر زه‌خميگ دونيايگ ناڕه‌حه‌تی و جه‌فا كيشيد، هه‌ر وه‌و خاتريشه‌ له‌ يادكردن ئه‌و شماره‌ شه‌هيده‌يل ئازا هه‌زاران هه‌زار سڵام كوردستان و حكوومه‌تيگ يه‌كگرتگ ديموكراسی له‌ شه‌هيده‌يل يه‌ك شووبات و گشت شه‌هيده‌يل ريگه‌ی رزگاری و سڵام له‌و داڵگه‌يل بيناز و جگه‌رسزياگه‌يله‌ ك وه‌ خوين رووڵه‌يليان ئمڕوو دروس بوی.

به‌ختيار ئه‌حمه‌د

ج . أ