نه‌خش ژنه‌يل له‌ شووڕشه‌يل كورد

شفق نيوز

ئه‌را نموونه‌(قه‌ده‌م خه‌ير)يه‌كيگه‌ له‌و ژنه‌ شووڕشكاره‌يل ناوچه‌ی لوڕستان و رابه‌رايه‌تی شووڕشه‌گه‌ی پشتكوو كردگه‌و تويه‌نستگه‌ په‌نج ساڵ دژ سوپاگه‌ی شا جه‌نگ بكا، بيجگه‌ ئه‌ويش(خانزاد) مير سۆران له‌ ساڵه‌يل ناوڕاس سه‌ده‌ی ١٦ له‌دايگ بويه‌، ك له‌شوون مردن براگه‌ی فه‌رمانڕه‌وايی ميرنشين سۆران گرته‌سه‌ مل و خاوه‌ن چه‌نه‌ها قاره‌مانێتيه‌.

وه‌ شيوه‌يگ ئاشكرا نه‌خش ژنه‌يل له‌ی شووڕشه‌يل دوياخره‌ فريه‌ رووشنتر ده‌ركه‌فت، تا راده‌يگ ك بويه‌سه‌ جی باس وخواست گشت ميديايه‌يل جه‌هان و ژنه‌يل كورديش جوور نيشانه‌ی ئازايه‌تی و نموونه‌ی خه‌باتكه‌ر ناوبريه‌ن، وه‌ جووريگ ك شيواز وه‌رگری و شه‌هيدبوين ژنه‌ جه‌نگاوه‌ريگ كورد بويه‌ داستانيگ جريوه‌دار له‌ خه‌بات ژنه‌يل كورد، (جاندی ئارين) ئه‌و ژنه‌ جه‌نگاوه‌ره‌ ك له‌شوون وه‌رگرييگ ئازايانه‌ ئه‌را يه‌كه‌مجار له‌ مێژوو خه‌بات ژنه‌يل خوه‌ی ته‌قانه‌وه‌و زه‌ره‌د گه‌ورايگ ره‌سانه‌ دوشمنه‌يل و داگيركه‌ره‌يل كورد و نيشان گشت جه‌هان دا ك ژنه‌يل به‌شيگ دانه‌وڕياگن له‌ شووڕشه‌يل كوردستان گه‌ورا.

ئه‌گه‌ر بخوازيد باسيگ له‌ خه‌بات و شووڕشه‌يل كورد بكه‌يد، وه‌بی سێ و دو بايه‌سه‌ نه‌خش ژنه‌يل له‌و خه‌بات و قوربانيداين و شووڕشه‌يله‌ باس بكه‌يد و وه‌گه‌ورايی ته‌ماشايان بكه‌يد، له‌ شووڕش له‌پارچه‌يل كوردستان جياواز بوين له‌ به‌شداری و شووڕشكردن و هه‌ر پارچه‌يگيش وه‌گووره‌ی هه‌ل ومه‌رج و كلتوور ناوچه‌گه‌ی خوه‌يان نه‌خش داشتنه‌، ك له‌ چه‌ن ناوچه‌يگ راسه‌ ژن تفه‌نگ وه‌ده‌س نه‌وی جوور خواست، وه‌لی كه‌متر نه‌كردگه‌و نه‌خشی له‌ پياو كه‌متر نه‌ويه‌ له‌ مه‌يدان جه‌نگه‌يل له‌ڕوی دروسكردن خواردن و خوه‌راك و سازداين هه‌وه‌جه‌يل تر ك به‌شيگ گرينگ به‌ره‌و سه‌ركه‌فتنه‌يل وه‌و كه‌ره‌سه‌يله‌ ئه‌كريه‌يد ك ژنه‌يل ئاماده‌ی كردنه‌.

ئمجا نادێ ئه‌وه‌يش له‌ هويرمان بچێد ك ئايين نه‌خش سه‌ره‌كی داشتگه‌ له‌ ده‌سوه‌سه‌ركردن ژنه‌يل و ئه‌را ئه‌وه‌گ ده‌س بگريه‌يده‌ بان ماف و ئازاديه‌يليان، ئه‌ويش له‌ڕی كلتوور پياوسالاری و كلتوور كوومه‌ڵايه‌تی تا ئيسه‌يش ريژه‌يگ فريه‌ كه‌م له‌ چه‌و كوومه‌ڵگا ئازاده‌و ئه‌و باقيه‌گه‌ی پياوسالاری باڵ كيشاسه‌ بانمان و ڕی له‌ ماف و ئازاديه‌يل گيرياگه‌ وه‌ مه‌هانه‌ی جوراوجوور و خورافيات! ك تا ئيسه‌يش ژنه‌يل ناتويه‌نن له‌ڕوی ژياری و ئابووريه‌و سه‌روه‌خوه‌يی خوه‌يان داشتوون و هه‌ر وه‌ختيگيش ژنه‌يل ئازاد نه‌ون و نه‌تويه‌نن بڕيار له‌بان چاره‌نويس خوه‌يان بيه‌ن، ئه‌وه‌ هويچ وه‌ختی كوومه‌ڵگاو نه‌ته‌وه‌يش قورتاری نادێ.

ته‌نيا ئه‌وه‌نه‌ ئويشم دويای ده‌يه‌ها سه‌ده‌ له‌ خه‌بات و شووڕش كورد، له‌يوا دياره‌ ئيجاره‌ خوه‌ر ئازادی كورد له‌ كۆبانی وه‌ بوونه‌ی به‌شداری كارای ژنه‌يله‌و وه‌ يه‌كجاری ده‌ركه‌فيد و خوه‌ر دوشمنه‌يلمان ئاوا بدێ و ئه‌ساره‌ی به‌ختيان وه‌ يه‌كجاری گوم بدێ..

ئاره‌زوو محه‌مه‌د

ج . أ