پيرووزی پێشمه‌رگه

شفق نيوز

ئه‌وه‌ك له‌يرا خوازياريم باسی بكه‌يم، ئه‌ويش نه‌خش پێشمه‌رگه‌س له‌وه‌خت وه‌رگری و جه‌نگ يا له‌وه‌خت ئاشتی ك چوين ريز له‌ بنه‌مايه‌يل ماف ئاده‌ميزاد ئه‌گرن و كار وه‌ ياساو ريككه‌فتننامه‌يل جه‌نگ ئه‌كه‌ن ك ناسرياگه‌ وه‌ ياسای ناوده‌وڵه‌تی ئنسانی.

له‌ خاڵه‌يل گرينگ پێشمه‌رگه‌ ك له‌بان ئاست جه‌هان ده‌نگه‌ودا، ئه‌ويش پيكهات له‌ ريزگرتن پێشمه‌رگه‌ له‌ بنه‌مايه‌يل ئنسانی، ئه‌را نموونه‌: هه‌ميشه‌ پێشمه‌رگه‌ ريز گرتگه‌ له‌ وه‌خته‌يل ئاشتی و ئاگربه‌س، هويچ وه‌ختيگ پێشمه‌رگه‌ ئاگربه‌س نه‌شكانگه‌و په‌لامار ئه‌نجام نه‌ياگه‌، به‌ڵكوو دوشمن په‌لامار هاوردگه‌و ريز له‌ ريككه‌فتن خوه‌ی نه‌گرتگه‌.

هويچ وه‌ختيگ پێشمه‌رگه‌ په‌لامار مه‌ردم بيتاوان و مه‌ده‌نی نه‌ياگه‌، به‌ڵكوو ريز له شاره‌يل گرتگه‌و ته‌نيا له‌ به‌ره‌يل جه‌نگ چه‌ك هاورده‌سه‌ كار، هويچ وه‌ختيگ پێشمه‌رگه‌ مناڵ و ئافره‌ت و پياگ گه‌وراساڵ و ئه‌و جايه‌ڵه‌يليشه‌ په‌لامار نه‌ياگه‌ ك چه‌كدار نه‌وينه‌و به‌شيگ نه‌وينه‌ له‌ جه‌نگ، هه‌ر وه‌و خاتريشه‌ هويچ وه‌ختيگ له‌مێژوو پێشمه‌رگه‌ له‌و شاره‌يله‌ جه‌نگ نه‌كردگه‌ ك مه‌ردم بيتاوان له‌تی نيشته‌جی بويه‌.‌

وه‌ل ئه‌وه‌يشا پێشمه‌رگه‌ هه‌ميش ريز له‌ ديله‌يل جه‌نگ گرتگه‌و هه‌ر خواردنيگيش خوه‌ی خواردگه‌ ئه‌را ديله‌يل جه‌نگيش دابينی كردگه‌، نموونه‌ی راپه‌ڕينه‌ گه‌وراگه‌ی ساڵ ١٩٩١يش ئه‌وه‌ نيشانمان ئه‌ياد ك چوين هه‌زاران سه‌رباز عراقی ديل كريان و دوياخريش وه‌ ئاشتی و سه‌ڵامه‌تی ئازاد كريان و گله‌وخواردن ئه‌را ماڵ خوه‌يان، وه‌لی هيزه‌يل ئمڕوو عراق و گرووپ ترۆريستی داعش و ميليشيايه‌يل نه‌ك هه‌ر ريز له‌ ديل جه‌نگ ناگرن، به‌ڵكوو سه‌ريانيش بڕن.

ئه‌وه‌ پێشمه‌رگه‌س ك چه‌ك قه‌يه‌غه‌كرياگ ناوده‌وڵه‌تی نايه‌ريده‌كار، ئه‌وه‌ پێشمه‌رگه‌س ك ئه‌وه‌نه‌ پيرووزه‌، چوينكه‌ وه‌رگری له‌ نيشتمان ئه‌كا، ئه‌وه‌ پێشمه‌رگه‌س جوور هيز خوه‌يبه‌خش ئاماده‌س گيان خوه‌ی به‌خت بكا ئه‌را مقه‌يه‌تيكردن گشت مه‌ردم ناوچه‌يل داوڕياگ، ك يه‌يش له‌يوا كردگه‌ گشت مه‌ردم وه‌بی جياوازی داوا له‌ پێشمه‌رگه‌ بكه‌ن مقه‌يه‌تی له‌ليان بكا، له‌وه‌ر ئه‌وه‌ وجوود پێشمه‌رگه‌ له‌ هه‌ر شوونيگ گوزارشه‌ له‌ ئاسايش، له‌ ئارامی، له‌ دڵنيايی.

هه‌ر وه‌و خاتريشه‌ پێشمه‌رگه‌ بيجگه‌ ئيراده‌ی خه‌ڵك كوردستان و سه‌رۆك هه‌رێم كوردستان، هويچ ئيراده‌يگ تر ناتوانيد زاڵ بدێده‌ بانی.

د. كرمانج عوسمان

ج . أ