دڵسووزی‮ ‬و هوشیاری‮ ‬گەرەنتی‮ ‬سەركەفتنە

شفق نيوز

يه‌يش وه‌پله‌ی یەكەم ئەرك حكوومەت هەرێم كوردستانە كە هاوكاری بكا لە دامه‌زرانن پەیوەندی خاسيگ وه‌ل وڵاته‌يل هيزدار و بازوو پێشمه‌رگه‌و پۆليس و ئاسايش وه‌خاتر روی وه‌ڕوی بوينه‌وه‌ی دوشمنه‌يل و مه‌رزه‌يلمان بپاريزيم و نه‌يليم دوشمن له‌ هويچ لايگه‌و خوه‌ی بخزنيده‌ ناو خاك پيرووز كوردستان.

وه‌لی جوور ئه‌وه‌ك چوين حكوومه‌ت هه‌رێم هه‌وڵ ئه‌وه‌ ئه‌ياد ژيانيگ ئاسووده‌ ئه‌را هاووڵاتيه‌يل دابين بكا، له‌وارنوه‌ر ئه‌وه‌يش ئه‌رك هاووڵاتيه‌يليشه‌ ك هاوكار و ده‌سميه‌تده‌ر و پشتگير حكوومه‌ته‌گه‌ی خوه‌يان بوون له‌ گشت روييگه‌و، وه‌تايبه‌ت لايه‌ن ئاسايشی له‌وه‌خت كاركردن و له‌گشت وه‌ختيگ، چوينكه‌ هه‌ردوگلا ته‌مامكه‌ر يه‌كترن.

له‌ هه‌مان وه‌خت بايه‌سه‌ هاووڵاتيه‌يل فيشتر چه‌ويان واز بكه‌ن و ئاگادار بوون له‌ هه‌ر كاريگ نه‌خوازرياگ و بايه‌سه‌ هه‌ر تاكيگ له‌ ئيمه‌ خوه‌ی وه‌ وه‌رپرسيار و مقه‌يه‌تيكه‌ر بزانيد، چوينكه‌ ئی نيشتمانه‌ نيشتمان گشتمانه‌و بايه‌سه‌ جوور چه‌ومان مقه‌يه‌تی له‌لی بكه‌يم و ئه‌گه‌ر هه‌ر كاريگيش گومانليكرياگ كه‌فته‌ وه‌رچه‌ومان بايه‌سه‌ مقه‌يه‌تی بويمن و كه‌ميگ له‌وه‌خت خوه‌مان ئه‌رای ته‌رخان بكه‌يم تا له‌لی دڵنيا بويم ئه‌را ئه‌وه‌ك زويتر لايه‌ن په‌يوه‌نديدار له‌لی ئاگاداره‌و بكه‌يم و ئه‌وانيش ئه‌رك خوه‌يان ته‌مام بكه‌ن.

ئيمه‌ ئه‌گه‌ر ته‌ماشايگ وڵاته‌يل خوه‌رئاوا بكه‌يم ئه‌رامان ده‌ركه‌فيد ك ئه‌وان چه‌نيگ په‌رووش و دڵسووز خاك و نيشتمانه‌گه‌ی خوه‌يانن و وه‌گشت شيوه‌يگ مقه‌يه‌تی له‌لی ئه‌كه‌ن.

باس ئه‌كه‌ن و ئويشن: چه‌ن ساڵيگ وه‌رجه‌ ئيسه‌ له‌ يه‌كيگ له‌ وڵاته‌يل خوه‌رئاوا ژن و شوييگ وه‌يه‌كه‌و ژيان، شه‌ويگ له‌ شه‌وه‌يل ژنه‌گه‌ نه‌خوه‌ش ئه‌كه‌فيد و پياوه‌گه‌ وه‌ هه‌ڵه‌په‌ڵه‌ ئه‌ڕه‌سنيده‌ی نه‌خوه‌شخانه‌، له‌ناو ڕی ترافيك لايت قرمز ئه‌ياده‌ تويشيان ك بايه‌سه‌ بووسيه‌يد، وه‌لی كابرا ناوسيه‌يد و له‌ گڵۆپ سه‌رپيچی ئه‌كا تا زوی بڕه‌سيده‌ نه‌خوه‌شخانه‌، وه‌لی رووژيگ دوياتر كابرا نامه‌يگ ئه‌رای ئه‌ياد و جورمی كرياگه‌، ئه‌ويش هه‌رچه‌نی هويره‌و ئه‌كا له‌و وه‌خته‌ ك داگه‌ له‌ گڵۆپ قرمز كه‌س وه‌ دياره‌و نه‌ويه‌ تا شماره‌گه‌ی بنويسيدو كاميرايش نه‌ويه‌ تا ره‌سمی بگريد، كابرا سه‌ری سوڕمينيد! دوياخر ئه‌رای ده‌ركه‌فيد ك ژنه‌گه‌ی ئاگادار پۆليس كردگه‌و پياوه‌گه‌يش ئويشيده‌ ژنه‌گه‌ی " ئه‌ی خاس من له‌وه‌ر خاتر تن ئی كاره‌ كردم، ئه‌راچه‌ پۆليس له‌ليم ئاگادار كرديد؟" ژنه‌گه‌يش ئويشيد: ها له‌به‌رژه‌وه‌ندی خوه‌د تا جاريگتر سه‌رپيچی نه‌كه‌يد و وه‌گووره‌ی ياسا ره‌فتار بكه‌يد!!.

مه‌رام باسه‌گه‌ له‌يرا هوشياريه‌، ك ژنه‌گه‌ هه‌رچه‌نی نه‌خوه‌شيش بوی، وه‌لی ئاگادار بوی ك پياوه‌گه‌ی سه‌رپيچی ياسا كردگه‌، هه‌ر وه‌و خاتريشه‌ خوه‌ی وه‌پی نه‌گيرياو پۆليس له‌لی ئاگاداره‌و كرد، ئمجا ئه‌وه‌ ئه‌گه‌ر وه‌خاتر هوشياری و دڵسووزی نه‌ود ئه‌راچه‌ ئی كاره‌ ئه‌نجامدا، ئمجا ئيمه‌ له‌ فريه‌ چشت لاسايی ئه‌و وڵاته‌يله‌ ئه‌كه‌يم، با له‌يوا بكه‌يم چشته‌ خاسه‌گانيان وه‌ربگريم نه‌ك چشته‌يل خراو، ك ئه‌ويش له‌وه‌ر خاتر دڵسووزی و خوه‌شه‌ويسی وڵاته‌گه‌مان، دی هه‌وه‌جه‌ ناكا كه‌س وه‌پيمان بويشيد، با خوه‌مان هس وه‌ ئه‌وه‌ بكه‌يم ك له‌يه‌ودويا وه‌خت ئه‌وه‌ هاتگه‌ هه‌ميشه‌ ئاگادار و مقه‌يه‌ته‌ت بويم ئه‌را ئه‌وه‌ك گشتلايگمان وه‌ ئاسووده‌ بژيه‌يم.

سه‌ڵاح شه‌ناغه‌يی

ج . أ