شماره‌ى هه‌فت له‌ژیان كورده‌یل

شفق نيوز

هه‌فته‌، چینه‌یل ئاسمان، ئه‌ڵڵاجه‌ویه‌یل دونیا)هه‌فتن و شایه‌ت زانیارییگ تر نه‌یاشتویم له‌بان(هه‌فت)، وه‌لى ئه‌گه‌ر بایگ و بگه‌ردیمنه‌ ناو سه‌رچه‌وه‌یل جوراوجوور، ئه‌وه‌ بیگومان زانیارى زیاتریگ له‌ى باوه‌ته‌وه‌ كه‌فیگه‌ ده‌سمان.

كاریگه‌رى و كاردانه‌وه‌ى ئى شماره‌ له‌بان زوورم دینه‌یل و داب ونه‌ریتكومه‌ڵگایه‌یل جیاجیاو ملله‌ته‌یل دونیا وه‌شیوه‌ى فراوانیگ كه‌فیگه‌ وه‌رچه‌و. ئنجا وه‌ختى دینه‌یل وه‌ك یه‌هوودى و موسڵمان و مه‌سیحى هاتن شماره‌ى هه‌فت بویه‌ چشت پیرووزیگ  و هه‌ر دینیگ و له‌لاى خوه‌یه‌وه‌ گرنگى یا ئه‌همیه‌ت تایبه‌تیگ وه‌پیداو ته‌نانه‌ت له‌ناو دین موسڵمانیش حورمه‌ت و باوه‌ڕیگ تایبه‌ت وه‌رگرت.

ئه‌را نموونه‌: له‌فه‌رهه‌نگ ئاڤێستا هاتگه‌و ئویشیگ: له‌دین به‌هدینى شماره‌(سێ- هه‌فت)وه‌پیرووز شماریاگه‌. شماره‌ى سێ له‌وه‌ر ئه‌وه‌ك دروشم یا شعار پیرووز زه‌ره‌ده‌یشت بوى وه‌ك(باوه‌ڕ پاك – گوفتار پاك – كردار پاك)و شماره‌ى هه‌فتیش وه‌ بوونه‌ى(ئه‌میشه‌سپێنت)، ك هه‌ردوگ وشه‌گه‌ وه‌ماناى وه‌رده‌وامى و هه‌میشه‌یى و زینگى و بیمه‌رگى و پاك و ده‌رمانبه‌خش تیه‌یگ  و ئه‌هۆرا مه‌زدا پیرووزیش بووده‌ هه‌فتمیان، وه‌لى له‌سه‌رده‌م ئمڕوومان وه‌تایبه‌ت له‌ناو كومه‌ڵگاى كورده‌وارى ره‌نگدانه‌وه‌ى ئاشكرایگ دیریگ و باوه‌ڕ ته‌واویگ له‌لاى تاكه‌یل كومه‌ڵگا دیریگ و شوون خوه‌ى له‌ قودسیه‌ت چه‌سپانگه‌ له‌ژیان كورده‌یل. ئه‌را نموونه‌: كه‌سیگ وه‌ختى چووگه‌ وه‌ر ڕه‌حمه‌ت خوداو روح سپاریگه‌ خوداوه‌ند خاوه‌ن كه‌ره‌م و ماڵئاوایى یه‌كجارى له‌دونیا كرد، نوڕید دویاى ئه‌وه‌ك سێ ڕووژ پرسه‌ ئه‌ڕاى نریه‌یگ ، دویاخریش هه‌فته‌ ئه‌ڕاى كه‌ن. یا دوینید له‌ناو مه‌ردمانیگ له‌كومه‌ڵگاى كورده‌وارى خوادنیگ هه‌س وه‌ناو سفره‌ى(هه‌فت سین) ك پیكهاتگه‌ له‌ هه‌فت جووره‌ خوه‌راك جویر سه‌وزى و میه‌وه‌جات. یا زوورممان تیه‌یگه‌ هویرمان ك ئه‌وسا ماوه‌ى سویركردن تا نزیك كووتایى ساڵه‌یل هه‌فتاى سه‌ده‌ى وه‌رینیش هه‌فت ڕووژ و هه‌فت شه‌و بوى وه‌ل ساز و ده‌هوڵا، بیجگه‌ ئه‌وه‌یش دویه‌تیگ ئه‌گه‌ر شوى بكرداگ له‌هه‌فته‌ پاى كردیانه‌وه‌و باوانى هاتیانه‌ شوونى و بردیانه‌وه‌ى ك شایه‌ت تائیسه‌یش له‌ناوچه‌یلیگ كورده‌وارى ئى باوه‌ هه‌ر مه‌ندویگ . یا شاڵ هه‌فت گریه‌ ك له‌بڕه‌ ناوچه‌یگ باو بوى له‌كوردستان و له‌وه‌خت به‌ساننى هه‌ف گریه‌ له‌لى دیان. ئه‌گه‌ریش بچیمنه‌ دویاوه‌ ئه‌را تاریخ كویه‌ن كورده‌یل، دوینیم میدیه‌یل ك پیشینه‌ى نه‌ته‌وه‌ى كوردن پیكهاتوین له‌ هه‌فت هووز.

ماناى ئه‌وه‌سه‌ گشت ئه‌یانه‌ نیشانه‌ ئه‌وه‌ بوینه‌ ك شماره‌ى هه‌فت له‌ژیان كورده‌یل تاریخ كویه‌ن و وه‌رده‌وامیگ داشتگه‌و دیریگ و تائیسه‌یش مه‌ردم كورده‌وارى هه‌ر پابه‌ندن وه‌ پیرووزى ئى شماره‌وه‌.