دانیشتنه‌یل سیاسى له‌ناونى ئاره‌زووه‌یل هاووڵاتى و قانجاز سیاسه‌تكاره‌یل

شفق نيوز

ئه‌و كیشه‌یل چاره‌سه‌رنه‌كریاك ناونیانه‌ وه‌تایبه‌ت له‌ناونى هه‌ردوگ لیست ده‌وڵه‌ت یاساو عراقیه‌.

 

ئمڕوویش هاووڵاتیه‌یل عراقى چنه‌ دوینن ك ئه‌و دانیشتنه‌یله‌ بى قانجازه‌و ئومید له‌ى كاره‌ بڕینه‌ ك فراكسیۆنه‌یل بڕه‌سنه‌ ئاكامیگ ئه‌را ده‌سمیه‌تداین هاووڵاتى فه‌قیر و ڕه‌نجده‌ر له‌ژیانى، وه‌لى جى داخه‌ ك هاووڵاتى سه‌برى مه‌رز بڕى و ره‌سیه‌ ئه‌و باوه‌ڕه‌ ك ئى جووره‌ دانیشتنه‌یله‌ ك ژنه‌فیده‌ى و دوینێده‌ى له‌ڕى شاشه‌ى ته‌له‌فزیۆنه‌یله‌و ته‌نیا دعایه‌یگ ره‌سانن یائعلامیه‌ ئه‌را ده‌سنیشانكردن به‌رژه‌وه‌ندى سیاسى له‌ناونى ئى فراكسیۆنه‌یله‌و رازیكردن یه‌كترى و دابه‌شكردن قانجازه‌یل له‌ناونى خوه‌یان.

 

له‌وه‌ختیگیش ك ئویشن مه‌سه‌له‌ى چینایه‌تى و به‌شه‌به‌ش ته‌واو بوى، هاووڵاتى عراقى پیلان ئه‌و راسیه‌ ئه‌ڕاى ده‌ركه‌فت ك دوشمنه‌یل وڵات له‌ده‌وڵه‌ته‌یل هاوسا ده‌س له‌تى داشتن و دى كاره‌گه‌ ئاشكرا بوى، وه‌لى ئه‌و مه‌سه‌له‌ هیمان هه‌ر مه‌ندگه‌و له‌ڕى سه‌ردان وزاره‌ته‌یله‌و هس وه‌پى كریه‌ێد ك وه‌ختى مه‌ردم ئه‌را وه‌دیكردن ده‌رفه‌ت و كاركردن سه‌ردان وزاره‌ته‌یل كه‌ن و ئویشنه‌پیان دامه‌زرانن نیه‌ له‌وه‌ر ئه‌وه‌ك سه‌ر وه‌حزبیگ  دیاریكریاگ نین و ئویشنه‌ پیان ئیوه‌ نیه‌گونجیه‌ین وه‌ل ئه‌و سفه‌ته‌یل خواسته‌، ك یه‌یش خوه‌ى له‌خوه‌ى ماناى به‌شه‌به‌ش و چینایه‌تیه‌.

 

ئنجا ئویشیمنه‌ سیاسه‌تكاره‌یل دى به‌سه‌و كه‌م وازى وه‌ ئه‌قڵ هاووڵاتیه‌یل بكه‌ن و كه‌م وه‌پیان بخه‌نن، چوینكه‌ هاوڵاتى عراقى دى تیر بویه‌ له‌ته‌سریح ره‌سانن یا ئعلامیه‌یل درووكانیدان، ك یه‌یش له‌خراوداین ناشرینیگ زیاتر هویچ تر له‌ناونى فراكسیۆنه‌یل سیاسى له‌ڕى هووكاره‌یل ره‌ساننه‌و.

 

ئیسه‌ هاووڵاتى عراقى هه‌ڵویستیگ له‌ئیوه‌ تواێد ئه‌ى سیاسه‌تكاره‌یل ك نوێنه‌رایه‌تى ملله‌ت كردین و زیاتر له‌جاریگ له‌لایه‌ن ملله‌ته‌و هه‌ڵوژریان و دى نه‌یلن په‌شیمانه‌و بوون له‌هه‌ڵوژانندان ئه‌را جاریگ تر، چوینكه‌ چاره‌سه‌ر گورجیگ له‌لیدان توان ئه‌را قورتاركردن بار سیاسى، چوینكه‌ عراق هه‌ر وه‌ره‌و دویا چوود نه‌ك وه‌ره‌و پیشكه‌فتن و له‌لایه‌ن ده‌وڵ‌ته‌یل هاوساوه‌ ده‌خاڵه‌ت كاروبارى كریه‌ێد.

 

هه‌ر له‌وه‌ر ئه‌وه‌یش بایه‌سه‌ له‌باندان یه‌ك دانیشتن گشتلایه‌نى بكه‌ین ئه‌را یه‌كلاكردنه‌وه‌ى بار سیاسى له‌عراق و ته‌ماشاى مه‌سه‌له‌ى چاره‌نویسساز ملله‌ت بكه‌ین و ئه‌و گرفت و كیشه‌یل هاووڵاتى چاره‌سه‌ر بكه‌ین ك وه‌خته‌یل فره‌یگه‌ له‌بان ڕفه‌یل به‌رزدان وه‌بى چاره‌سه‌ر مه‌ندگه‌.

 

هبه‌ حسێن

ج