گامه‌يل شكاننه‌وه‌ی داعش

شفق نيوز

ئی هه‌وڵ و گامه‌يل داعشه‌ ئاشكرای ئه‌وه‌ ئه‌رامان ئه‌كا ك ترۆريسته‌يل هويچ ئوميديگيان نه‌مه‌ندنگه‌ وه‌ ئه‌وه‌گ دريژه‌ بيه‌نه‌ مه‌ندنه‌وه‌ی خوه‌يان له‌بان خاك عراق، ك هه‌رچه‌نی له‌وه‌خت په‌لاماره‌يل سوپای عراقی و حه‌شد شه‌عبی وه‌ ئاسانی خوه‌يان ناكيشنه‌و، وه‌لی سه‌ره‌نجام خوه‌يان كيشنه‌وه‌و مه‌يدانه‌گه‌ چووڵ ئه‌كه‌ن.

بڕيگ له‌ چه‌وديره‌يل باوه‌ڕيان ئه‌وه‌سه‌ ئه‌رك داعش له‌ عراق كووتايی وه‌پی هاتگه‌، يه‌يش دويای ئه‌وه‌گ گشت ئه‌و ئه‌رك و مه‌رامه‌يله‌ ك ئه‌رای دياری و ده‌سنيشان كرياويد، وه‌خاسی ئه‌نجاميان دا، يا وه‌مانايگ تر داعش ك وه‌ فه‌رمان ئاغاو قويخايه‌يلی ئه‌ركه‌يل جيوه‌جی ئه‌كاو ئه‌و مه‌رام پلانه‌يليانه‌ ئه‌رايان وه‌دی ئه‌يه‌ريد ك سپاردنه‌سه‌ی داعش.

له‌ی رويه‌و فريه‌يگ له‌و كه‌سه‌يله‌ ك چه‌وديری داعش ئه‌كه‌ن، باوه‌ڕيان ئه‌وه‌سه‌ ك داعش له‌ عراق خوه‌ی ئه‌كيشيده‌و، چوينكه‌ ئه‌و ئه‌ركه‌ ك وه‌پی سپارياويد كووتايی وه‌پی هات و دی بايه‌سه‌ عراق چووڵ بكاو بچن وه‌ره‌و ئه‌و ده‌وڵه‌ته‌يله‌ ك ئه‌رايان دياری كرياگه‌، وه‌ی ئايا هيزه‌يل عراقی ئه‌تويه‌نن وه‌ته‌نيا داعش له‌ عراق بتارنن وه‌بی ئه‌وه‌ك داوای هاوكاری و ده‌سميه‌ت له‌ هيزه‌يل هاوپه‌يمان بكه‌ن؟

له‌لايگ تره‌و ئه‌گه‌ر هيزه‌يل پێشمه‌رگه‌ به‌شداری نه‌كه‌ن له‌ راوناين داعش وه‌تايبه‌ت له‌ گرتنه‌وه‌ی شار موسڵ و ده‌ورگردی، ئه‌وه‌ له‌ی حاڵه‌ته‌ بايه‌سه‌ حكوومه‌ت ناوه‌ندی هس وه‌ ئه‌وه‌ بكا ك وه‌بی پێشمه‌رگه‌و هيزه‌يل هاوپه‌يمان مه‌حاڵه‌ بتويه‌نيد داعش له‌ عراق ده‌ربكا.

ئه‌را ئی كاريشه‌ بايه‌سه‌ حكوومه‌ت عراق پابه‌ند بدێ وه‌و ريككه‌فتن و قه‌وڵه‌يله‌ ك داسه‌ی هه‌رێم كوردستان وه‌تايبه‌ت ريككه‌فتنه‌يل سه‌باره‌ت وه‌ كلكردن مووچه‌ی پێشمه‌رگه‌و دابينكردن چه‌ك و ته‌قه‌مه‌نی و هه‌وه‌جه‌يل تر، ك ئه‌وسا ئه‌دێ هيز پێشمه‌رگه‌به‌شدارييگ كاراو كاريگه‌ر له‌ جه‌نگه‌يل بكا، وه‌لی ئه‌گه‌ر وه‌ چه‌واشه‌وه‌ حكوومه‌ت ناوه‌ندی مل نه‌يه‌يد و مافه‌يل پێشمه‌رگه‌ ره‌وانه‌ نه‌كا، ئه‌وه‌ نادێ چه‌وه‌ڕی ئه‌وه‌ بكا ك پێشمه‌رگه‌ جه‌نگ داعش بكا له‌جيای سوپای عراق.

وه‌ دڵنياييه‌و به‌شداری نه‌كردن پێشمه‌رگه‌ له‌ شكانن داعش ئه‌رك سوپای عراق زه‌حمه‌ت تر ئه‌كاو چه‌وه‌ڕی ئه‌وه‌يش ناكريه‌يد سوپای عراق وه‌ ته‌نيا بتويه‌نيد ناوچه‌يل ژير ده‌سڵات داعش ئازاد بكا، ئمج وجوود هاوكاری له‌ناونی پێشمه‌رگه‌و سوپای عراق ئاسانتر ئيراده‌ی شه‌ڕخوازی ترۆريسته‌يل داعش شكنيد و دی ئه‌تويه‌نيم بويشيم وه‌ل په‌ياوبوين هاوكاری له‌ناونی هيزه‌يل گامه‌يل شكاننه‌وه‌ی داعش ده‌س وه‌پی ئه‌كا.

سابیر سمایل

ج . أ