پەرلەمان

شفق نيوز

كوردستان چوو. بيس ساڵ له‌ يه‌و وه‌ر، ئه‌گه‌ر له‌ بان شه‌قام، هه‌ وه‌ قسيه‌ى، سووكايه‌تى وه‌  په‌رله‌مان كوردستان بكردايد، هه‌ مه‌ردم ساده‌و ساكار وه‌ دگان دڕينه‌د. چه‌ن روژ وه‌رجله‌ يه‌ ك ياد بيس ساڵه‌ى په‌رله‌مان بايد، مه‌ردم ساده‌و ساكار، دى له‌سه‌ر هه‌ق بوين يا نه‌، په‌رله‌مان سان باران كردن.

 

په‌ر‌له‌مان كوردستان، دوياى بيس ساڵ، تا ئيرنگه‌ نه‌تويه‌نستيه‌ چوى دامه‌زريايگ نيشتمانى له‌ ناو ده‌نگده‌ره‌يل كورد جى خوه‌يه‌و بكا. هه‌ ئه‌و قه‌ره‌سه‌ ك پارت سياسى چينه‌ ناو په‌رله‌مان، ئه‌وه‌گ ئه‌ڵاجه‌ويه‌، ياسايل په‌رله‌مان له‌ چوارچوو حزبى مێنێدو دى‌ بڕێ ياسا به‌رژه‌وه‌ندى نێشتمانى وه‌ خوه‌ى نه‌ويندن، ئمجا دى ئه‌و ياسا زوورم ده‌سڵاتدار سه‌پنيده‌ى يا كه‌مێنه‌ى وه‌رايوه‌رگر ته‌قلا ئه‌راى ئه‌كا، جياوازى نه‌يرێد.

بيس ساڵه‌ په‌رله‌مان ئه‌و قه‌ره‌ زگمان نيشان دايه‌، هويروعه‌قڵمان نيشان ناده‌ێ. بيس ساڵه‌ زوورم نۆينه‌ره‌يل مه‌ردم كورد، ئاگايان له‌ ئازار مه‌ردم نيه‌. سه‌ردان جاروه‌جارێ دو سێ ئه‌ندام په‌رله‌مان وه‌ شاره‌يل و شارۆچكه‌يل، ئيچنه‌ لێ هاتيه‌ چوى خه‌وه‌رێ گرنگ له‌ تى ڤى خانه‌ى حزبه‌يل په‌خش بكريه‌يد. ك چه‌، فره‌ سروشتيه‌و بايه‌د ئه‌ندام په‌رله‌مانه‌ جى له‌ ناو مه‌ردم بوودو ئازاره‌يل و مه‌ينه‌ته‌يل روژانه‌ى ره‌ت و رويته‌يل هس بكا.

وه‌لى، بيس ساڵه‌ ده‌يان ئه‌ندام په‌رله‌مان، ته‌نيا هانه‌ كۆوه‌وه‌ كردن ئمتيازه‌يلێ ك نه‌وى و نه‌كرياس و هه‌ بنيشێ نيه‌تيه‌يد.‌ بڕێ له‌ په‌رله‌مانتاره‌يل ئوپۆزيسيۆنيش ك وه‌رده‌وام دروشم وه‌ مه‌ردم فرووشن، ئه‌را راتب چه‌ن مانگێ خانه‌نشين بوين، وه‌ قڕوقپ خسنه‌ى ته‌نكى به‌خڵ خوه‌يان. يه‌كێگان وت: من ئه‌ى پاره‌ له‌ لاى خوه‌م ئه‌ڵگرمه‌ى تا ئه‌و وه‌خته‌ ك حكومه‌ت داواى بكا. راس ئێژێ، ئاخر حكومه‌ت جى نه‌يرێد تا ئه‌ى پاره‌ بنه‌ێده‌و ناوێ و ئه‌ڵبگريده‌ى!. جواو ئه‌ى قسيه‌ له‌ سلێمانى ئيچنه‌ ده‌نه‌و: بچوو ئه‌را حه‌لاوى يه‌ بويش!.

له‌وه‌سه‌ ك بێوژادانى بوود ئه‌گه‌ر بويشم، په‌رله‌مان هويچ نه‌كرديه‌، وه‌لى وه‌ وژدانێگ فره ئاسووده‌، تويه‌نيم بويشيم: په‌رله‌مان له‌ى بيس ساڵه‌ ته‌مام بويه‌. هه‌رجاڕێ، هه‌ له‌ قه‌سه‌م خواردن ياسايى، كۆمه‌ێگ شكست خه‌رمانى په‌رله‌مانه‌. كار ئيچنه‌ پێش بچوود، چه‌ن ده‌وه‌رى تر، له‌وانه‌سه‌، كه‌سێ بويشێ: ئه‌گه‌ر ئه‌يب نه‌ودو منام نه‌كه‌ن، وه‌ نيازم بوومه‌ ئه‌ندام په‌رله‌مان./ش

گۆران محەممەد