ماڵ كورد ميوانداری وه‌رزشكاره‌يل كورد فه‌يلی ئه‌كا

شفق نيوز

ره‌سانن كورده‌يل فه‌يلی شه‌فه‌ق و ، وه‌ئاماده‌ بوين شماره‌يگ فه‌ره‌ له‌ كه‌سايه‌تيه‌يل وه‌رزشی و سياسی و رووشنهيری و شماره‌يگ له‌ رووژنامه‌نويسه‌يل ، كۆڕيگ له‌بان ناونيشان ( نه‌خش يا ده‌ور كورده‌يل فه‌يلی له‌ جموجويل يا حه‌ره‌كه‌ی وه‌رزشی عێراقی ) له‌ باره‌گای ده‌زگای رووشنهويری و ره‌سانن كورده‌يل فه‌يلی له‌ به‌غدای پايته‌خت وه‌ڕيه‌و چوی. سه‌ره‌تای كۆڕه‌گه‌ وه‌ ده‌قيقه‌يگ وسيان ئه‌ڕا خوين پاك شه‌هيده‌يل ده‌س وه‌پی كرد و له‌ دويای وه‌خه‌ير هاتن كردن ميوانه‌يل و ئاماده‌بويه‌يل كۆره‌گه‌ له‌ لايه‌ن فه‌ره‌يدون كه‌ريم وه‌ناو رێكخرياگ ماڵ كورد و ده‌زگای شه‌فه‌ق ، عه‌بدولسه‌مه‌د ئه‌سه‌د يه‌كيگ له‌ كه‌سايه‌تيه‌يل وه‌رزشی ناسرياگ كورد فه‌يلی وته‌يگ پێشكه‌ش وه‌ ئاماده‌بويه‌يل كرد. ناوبرياگ له‌ سه‌ره‌تای باسه‌گه‌ی ئاماژه‌ وه‌چه‌ن خاڵيگ گرنگ له‌باره‌ی مێژوو و رۆڵ كورده‌يل فه‌يلی له‌ مه‌يدان وه‌رزش عێراقی كرد وله‌وانه‌ باس ئه‌و زوڵم و زووره‌يله‌ ك له‌لايه‌ن رژيم به‌عس ده‌رحه‌ق وه‌جايه‌ڵ وجوانه‌يل و وه‌رزشكاره‌يل كورد فه‌يلی كردو وت: يانه‌ی وه‌رزشی فه‌يلی هه‌ر له‌ سه‌ره‌تای دامه‌زراننی له‌ ساڵه‌يل په‌نجاگان و وه‌دريژايی كار وچالاكييه‌يلی له‌ ساڵه‌يل گوزه‌يشته‌ له‌ بواره‌يل يا مجاله‌يل جياجيای وه‌رزشی ، شماره‌يگ فه‌ره‌ له‌ وه‌رزشكاره‌يل ناوده‌وڵه‌تی پێشكه‌ش  وه‌ مه‌يدانه‌يل وه‌رزشی عێراق كردگه‌ و فه‌ره‌جار له‌ پاڵه‌وانيه‌تييه‌يل ناوده‌وڵه‌تی وه‌ تايبه‌ت ئاسيا ، وه‌ وه‌ده‌س هاوردن ملوانكه‌يل و جامه‌يل ته‌ڵاو نوقره‌ و برۆنز بوينه‌سه‌ مايه‌ی فه‌خر و شانازی ئه‌را ملله‌ت عێراق ؛ وه‌لی وه‌داخه‌وه‌ وه‌خاتر سياسه‌ته‌يل شوفێنی و ره‌گه‌زپه‌ره‌سانه‌ی رژيم به‌عس ‌له‌وه‌ر كوردبوين يانه‌ یا نادی وه‌رزشی فه‌يلی له‌ ساڵ 1973 له‌وه‌ختيگ ك يانه‌گه‌ له‌ بڵنترين لويتكه‌ی وه‌ده‌س هاوردن پاڵه‌وانيه‌تييه‌يل گرنگ وه‌رزشی بوی ، بوينه‌ ريگر وه‌رزشكاره‌يل كورد فه‌يلی و قاپی يانه‌گه‌ وه‌رويان به‌سان. هه‌ر لێوا سه‌مه‌د ئه‌سه‌د ئاماژه‌ وه‌ ئه‌وه‌يش كرد ك نه‌ته‌نيا له‌ ساڵه‌يل گوزه‌يشته‌ به‌ڵكه‌م تا حاڵ حازريش كورده‌يل فه‌يلی پاڵه‌وانه‌يل و وه‌رزشكاره‌يل و قاره‌مانه‌يليگ جوور جاسم محه‌مه‌د غولام و وه‌لی كه‌ريم و...هتد ديرن ك له‌ مه‌يدانه‌يل وه‌رزشی عێراقی و ناوده‌وڵه‌تی چالاكن و وه‌خاسی دره‌وشيه‌ن.

له‌دريژه‌ی كۆڕه‌گه‌و له‌ دويای وته‌و قسه‌يل سه‌مه‌د ئه‌سه‌د هه‌ريه‌ك له‌ به‌ڕێزه‌يل ( جه‌لال مه‌نده‌لاوی ، عسام كازم ، نوعمان موراد ، عه‌بدولئه‌مير مه‌ڵگی ، دكتۆر ابراهيم ، رياز فه‌يلی ، له‌يلا هاشم ، ستار محه‌مه‌د حه‌سه‌ن ، سادق العبوسی ، حسێن مايخان ، عه‌لی حسێن و موه‌فه‌ق عه‌لی غولام و تارق مه‌نده‌لاوی و...) وه‌قسه‌وباس و پێشكه‌ش كردن پێشناره‌يل و رخنه‌يل خوه‌يان له‌ كۆڕه‌گه‌ به‌شداربوين .  هه‌رلێوا  عه‌لی حسێن مه‌ڵكشای ناسرياگ وه‌ جاك باڵانس ك يه‌كيگه‌ له‌ پاڵه‌وانه‌يل و قاره‌مانه‌يل وه‌رزشكار كورد فه‌يلی له‌ وه‌رزش بۆكس يا مولاكه‌مه‌و خاوه‌ن چه‌نه‌ها جام و ملوانكه‌ له‌ پاڵه‌وانيه‌تييه‌يل عێراقی و ئاسيا له‌ وته‌يگ ك له‌ كۆڕ يا نه‌دوه‌گه‌ پێشكه‌شی كرد باس ژيان وه‌رزشی خوه‌ی و چوينيه‌تی وه‌ ده‌س هاوه‌ردن ئه‌و پاڵه‌وانيه‌تييه‌يله‌ كرد ك بويه‌سه‌ خاوه‌نيان و ئاماژه‌ وه‌ ئه‌و كه‌م وكۆڕيه‌يله‌ كرد ك له‌لايه‌ن لايه‌نه‌يل حكوومی و وه‌رزشی په‌يوه‌نديدار وه‌رانوه‌ر وه‌ قاره‌مانه‌يل وه‌رزش عێراق ئه‌كريه‌يگ. شايان باسه‌ له‌ كوتايی كۆڕه‌گه‌ ، ئه‌نجوومه‌ن وه‌ڕيه‌وبردن ده‌زگای شه‌فه‌ق و رێكخرياگ ماڵ كورد قه‌وڵ به‌رپاكردن ئاهه‌نگيگ ئه‌را رێزگرتن له‌ پاڵه‌وانه‌يل و قاره‌مانه‌يل و گه‌ورا كه‌سايه‌تييه‌يل وه‌رزشی كورد فه‌يلی له‌ئاينده‌يگ نزيك وه‌ ئاماده‌ بويه‌يل دان.