ئه‌رك ره‌سانن له‌ كوومه‌ڵگاى دیمۆكراسى

شفق نيوز

مه‌ردم پشتگیرى له‌لیان بكه‌ن و ئه‌ڕاى چوین و به‌رنامه‌یلیان په‌سه‌ن بكه‌ن، ئه‌ڕا ئى كاریشه‌ هه‌وه‌جه‌ وه‌ هووكار و كه‌ره‌سه‌یلیگ هه‌س، ك گرنگترینیان په‌یوه‌ندیه‌یل گشتییه‌ ك ئه‌ویش ره‌ساننه‌. ماناى ئه‌وه‌سه‌ ته‌نیا ڕێ ده‌سڕه‌سین وه‌ مه‌ردم ره‌ساننه‌ جوور"رووژنامه‌و رادیۆ و ته‌له‌فزیۆن".

 

 

ره‌سانن له‌ژیان كوومه‌ڵگاى ئنسانى نه‌خش سه‌ره‌كى و ئاشكرایگ دیرێد، ده‌وڵه‌ت و ده‌سڵات و سیاسه‌ت و كار و چوینیه‌تى وه‌ڕێه‌وبردن وڵات له‌ڕێ ره‌ساننه‌و ره‌سیه‌نه‌ مه‌ردم و دونیاى ده‌ره‌كى.

 

ره‌سانن له‌ سیستم و ده‌سڵاته‌یل دیكتاتۆرى و دژه‌ ملله‌ت، گشت ره‌فتار و كرده‌وه‌یگى ها له‌ژێر كۆنترۆڵ و چه‌ودێرى ده‌سڵات و ده‌وڵه‌تیش له‌ڕێ ره‌ساننه‌و هویر و ئه‌ڕاى چوینه‌وه‌یل ناڕه‌واو دژ ئاده‌میزاد و دویر له‌ ڕاسیه‌یل خوه‌ى جیواز ئه‌كا ئه‌را ناو مه‌ردم و هه‌ر وه‌ بوونه‌ى ئه‌ویشه‌و تویه‌م ڕخه‌وبردن و زاڵبوین خوه‌ى كاڵێد و كارێگ ئه‌كا ك كه‌س باوه‌ڕ وه‌ ره‌سانن نه‌یاشتوود. رووژنامه‌نویس و نویسه‌ر و رووشنهویره‌یل و هه‌ر دام و ده‌زگایگ ره‌سانن و رووژنامه‌گه‌رى ك دژ وه‌ به‌رنامه‌و به‌رژه‌وه‌ندى و هه‌ڵسووكه‌فت ده‌سڵات سته‌مكار ره‌فتار بكا، ئه‌وه‌ بیگومان به‌سیه‌ن و موڵه‌ت كار و چالاكى وه‌پیان نادریه‌ێد و بێجگه‌ ئه‌وه‌یش وه‌ڕێه‌وبه‌ر و نویسه‌ره‌یلیشى گریه‌ن و شوونگوم كریه‌ن وه‌ مه‌هانه‌ى جووراوجوور.

 

وه‌لى دوینید ره‌سانن له‌ سیستمه‌یل دیمۆكراسى ئه‌ركیگ گرنگتر ها دیرێ، ئه‌ویش ئه‌وه‌سه‌ له‌ سیستم دیمۆكراسى هه‌ر كرده‌وه‌و هه‌ڵسووكه‌فتیگ ده‌وڵه‌ت و ده‌سڵات ئه‌خادده‌ ژێر چه‌ودیرى وه‌بى سڵكردن له‌ ده‌سڵات و كار خوه‌ى ئه‌نجام ئه‌یاد ك زانیارى و ئاگاداریكردن مه‌ردمه‌و دابینكردن ده‌رفه‌ت ئازاده‌ ئه‌را باسه‌یل سیاسى و كێشه‌یل كوومه‌ڵایه‌تى و ئابوورى و زانستیه‌یل و هه‌وڵداینه‌ ئه‌را دروسكردن ده‌رفه‌ت له‌وه‌ر خاتر ره‌سانن ده‌نگ و خواست مه‌ردم وه‌ ڕاى گشتى و فشارخستنه‌ له‌بان ده‌وڵه‌ت و ده‌سڵات.

 

ره‌سانن ئه‌و وه‌خته‌ ئازاده‌ ك بتویه‌نید ئه‌رك خوه‌ى وه‌ شیوه‌ى دیمۆكراسى و ته‌واویگ ئه‌نجام بیادو  سه‌روه‌خوه‌ى بوود و دویر بوود له‌ ده‌سڵات ده‌سڵاتدار و به‌رژه‌وه‌ندى تاقم و تاك، چوینكه‌ ئه‌گه‌ر ئیچنه‌ نه‌ود، ئه‌وه‌ ده‌سڵات ده‌سڵاتدار چ ده‌وڵه‌ت یا هه‌ر ناوه‌ند و رێكخریاگیگ  ك خه‌رج ئه‌و ره‌ساننه‌ گرتگه‌سه‌ خوه‌ى و كۆنترۆڵى كردگه‌ ئه‌و خزمه‌ت خواسته‌ له‌ڕێ به‌رژه‌وه‌ندى مه‌ردم كوومه‌ڵگا پێشكه‌ش ناكاو تویه‌نیم بویشیم ره‌سانن مقه‌یه‌تیكه‌ر به‌رژه‌وه‌ندى گشتییه‌و هه‌ر له‌وه‌ر ئه‌وه‌یش بایه‌د وه‌ راسگوویى جوور كه‌ره‌سه‌یگ سه‌روه‌خوه‌ى ئه‌ركه‌یلى جیوه‌جى بكاو نه‌وه‌سیه‌ێده‌ ده‌سڵات و ده‌وڵه‌ت.

 

وه‌ل ئه‌وه‌یشا ره‌سانن له‌ كوومه‌ڵگایه‌یل ئازاد و دیمۆكراسى بایه‌د سه‌ر وه‌ خوه‌یان بوون و له‌چوارچیوه‌ى ده‌ستووریگ كار بكه‌ن ك ئه‌را مقه‌یه‌تى ئاوڕوى و ئاسایش مه‌ردم دیارى كریاگه‌ و ره‌خنه‌و گله‌یى مه‌ردم له‌ ده‌وڵه‌ت و ده‌سڵاته‌ بڕه‌سننه‌ ڕاى گشتى، هه‌ر له‌وه‌ر ئه‌وه‌یش تویه‌نیم بویشیم ده‌سڵات ره‌سانن له‌ كوومه‌ڵگاى دیمۆكراسى نه‌خش خاس و بته‌ویگ دیرێد.

 

رێبوار حسێنى

ج. ا