ئه‌زره‌ت 2017

عه‌لى  حسێن فه‌يلى

شه‌فه‌ق نيوز/ قانجازى چه‌س ك ده‌س بگريده‌ بان كول چشتيگ له‌ى ژيانه‌و خوه‌د بيه‌ێده‌ زه‌ره‌دا، ئيمه‌ بايه‌سه‌ ئه‌وه‌ له‌وه‌رچه‌وه‌ بگرێم ك حوكم له‌بان كه‌سه‌يل تر نه‌يه‌ێد تا ئه‌وان حوكم له‌باند نه‌يه‌ن، وه‌ل ئه‌وه‌يشا له‌ كه‌سه‌يل تر بووه‌خشێد تا ئه‌وانيش بووه‌خشنه‌د و ده‌سميه‌تيان بيه‌ێد تا ده‌سميه‌تد بيه‌ن، مه‌سه‌له‌گه‌ له‌ هويره‌و چيه‌ وه‌ نسبه‌ت ئه‌را عراقيه‌يل، ئمجا چاره‌سه‌ر فريه‌ خاسيگيش هه‌ن ك خوه‌د له‌ كيشه‌يل بخه‌ێد لا، وه‌لێ له‌ هه‌مان وه‌خت ڕيه‌يل نادروسيگيش هه‌ن واقعه‌ فيشتر تيه‌ڵ و پڕ مه‌ينه‌تى ئه‌كه‌ن.

 

له‌ى باوه‌ته‌و، باسيگ راسكانى ها هويرم وه‌لێ تيه‌ڵ، ئه‌ويش ئه‌وه‌سه‌ ك رووژيگ له‌رووژان بڕيگ ئه‌كته‌ر له‌ يه‌كيگ له‌ه‌ شاره‌يل خه‌ريك پيشكه‌شكردن روێداگيگ بوين له‌بان خێر و شه‌ڕ، له‌ دوياخريش نواندنه‌گه‌يان له‌تى خێر سه‌ركه‌فت و كووتايى وه‌ حكايه‌ته‌گه‌ هات، ئمجا يه‌كيگ له‌ خوه‌ندكاره‌يل ك له‌ورا ئاماده‌ بوين فريه‌ كاريگه‌ر بوى و وته‌ مامۆستاگه‌ى: "دوينستێد ك چه‌نيگ جوان بوى خێرۆمه‌نه‌يل له‌بان سه‌ڕخوازه‌يل سه‌ركه‌فتن"، مامۆستاگه‌يشى وه‌ زه‌رده‌خه‌نگيگه‌و وت: راسى له‌ ژيان خێر هه‌ميشه‌ سه‌رناكه‌فێد، به‌ڵكوو زيره‌كه‌يل و ته‌دبيركه‌ره‌يل مه‌سه‌له‌گه‌ سه‌ركه‌فتگن، ك ئه‌گه‌ر ئى راسيه‌ پڕ له‌ تيه‌ڵييه‌ وه‌ واقيعيه‌ت وه‌رنه‌گرێد ژياند وه‌سه‌ر ناچێد.

 

ئيمه‌ى عراقيه‌يل جوانى له‌ كار و هه‌ڵويسته‌يلمان ديرێم و ئاسانه‌ شانازيه‌ وه‌پيانه‌و بكه‌ێم، وه‌لێ له‌ هويرمان ناچێد ك ئاده‌ميزاد په‌يوه‌سه‌ وه‌ هه‌ڵكه‌فته‌ كۆمه‌ڵايه‌تيه‌گه‌ى و هه‌رچه‌نى گشت ناكووكيه‌يليگ له‌ناونى مه‌ردم هه‌س جوور ئحساس و توانايى و فكره‌يليگ، وه‌لێ وه‌ل ئه‌وه‌يشا بايه‌سه‌ ياى بگرێم و هووكاره‌يل كۆمه‌ڵگايى و كۆمه‌ڵايه‌تى بته‌وتره‌و بكه‌يم و نه‌بايه‌د له‌ زه‌ره‌د بترسيه‌يم، به‌ڵكوو بايه‌سه‌ بدێده‌ ئه‌را نه‌وه‌يل ئاينده‌، ئمجا دياره‌ ك خه‌م گه‌ورا زه‌ره‌د نيه‌، به‌ڵكوو ئه‌وه‌سه‌ كه‌سه‌يل تر وه‌ شكه‌ست بوينێده‌مان.

 

دوياخريش ساڵيگ وه‌خوه‌شى و تيه‌ڵيه‌يلى گوزه‌ر كردو وه‌موجزه‌يگ ئه‌و ساڵه‌ ته‌مام كرديم وه‌گشت قورسايى كيشه‌و مه‌ينه‌تيه‌يلى و هه‌وڵ فكره‌يل و ئوميد و كاره‌يلمان ئه‌وه‌ بوى گاميگ وه‌ره‌و ساڵ تازه‌ بنه‌يم، دى وه‌ هه‌رحاڵ ئه‌وه‌سه‌ ك ته‌نيا ئه‌زره‌ت و ئوميد ئه‌را عراقيه‌يل مه‌ندگه‌ و بويه‌سه‌‌ سه‌رمايه‌ ئه‌رايان و ئوميده‌واريم دويره‌و نه‌كه‌فێد.

 

سروشت ئاده‌ميزاد عراقى ئاشقانه‌س، ئشقيش سه‌بر نيشان ئه‌ياد، سه‌بريش سووزدارد ئه‌كا نه‌ك حه‌سويد و لويتبه‌رز يا يه‌يگه‌ر، ئمجا 2016 وه‌گشت خاسى و خراويه‌يلى كووتايى هات، له‌ى وڵاتيشه‌ وه‌گشت هه‌واڵه‌يل دڵته‌زن و پڕ ژانيه‌و ك باڵ كيشانه‌ بان هه‌واڵه‌يل دڵخوه‌شكه‌ر، ئاسوو رووشنيگ ئوميد وه‌پيمان ئه‌يه‌ێد ك 2017 چوارچيوه‌يگ له‌ ته‌وافق و دووسى له‌تى ده‌رئه‌كه‌فێد، دى ژيان هاوبه‌ش ناچارى و زووره‌ملى ئاكام ئه‌را هويچ كه‌سيگ نه‌يرێد، جه‌نگيش ژيان ناچويچنێد، ئاده‌ميزاد عراقييش ئه‌گه‌ر دووسى و ئاشتى وه‌ل خوه‌يه‌و نه‌كا، هويچ كه‌سيگ ئه‌وه‌ ئه‌راى ناكا، وه‌ل ئه‌وه‌يشا ئوميده‌واريم له‌ى ئشقه‌ به‌خته‌وه‌رى و خوه‌شاڵى بكه‌فێده‌و ئه‌وه‌نه‌ى ئه‌وه‌نگ وه‌رگه‌ى ژان و مه‌ينه‌تى و چه‌وه‌ڕى گرت و باوه‌ڕ وه‌گشت چشتيگ له‌ى وڵاته‌ داشت، هه‌ر وه‌و خاتريشه‌ ئشقه‌ پاكه‌گه‌ى ته‌مام نادێ.

عه‌لى حسێن فه‌يلى