من و زيوه‌ر ئه‌را خانه‌قين

شفق نيوز

شار خانه‌قين ئه‌و شاره‌سه‌ ك عه‌بدوڵڵا كوڕ محه‌مه‌د ئه‌فه‌ندی مه‌لا ره‌سول پشده‌ری ك ناسرياگه‌ وه‌"زيوه‌ر" له‌ ديوانه‌ شعريه‌گه‌ی وه‌ شعره‌و باسی كردگه‌و گرينگی فريه‌يگ وه‌پی داگه‌، ئمجا له‌ شماره‌ ٦ گووڤار گه‌لاوێژ له‌ ساڵ ١٩٤٤ پارچه‌ شعريگ له‌ ستايشكردن خانه‌قين وه‌ كورته‌ پيشه‌كييگه‌و بڵاو كردگه‌، ك له‌تی ئويشيد:‌

جه‌ننه‌ت بی شوبهيگه‌ شار خانه‌قين

ئاو ئه‌ڵوه‌نيشی هه‌ر وه‌ك ئاو مه‌عين

ديمه‌ن بان پيه‌ڵ و ته‌ماشای ئاوه‌گه‌ی

سووفی وشكيگيش ئه‌خاده‌ هه‌ڵپه‌ڕين

ئه‌ر له‌بان پيه‌ڵه‌و هه‌ر ته‌ماشای ئاو بكه‌ی

قه‌ت خفه‌ت ناخوه‌يد و دڵد نيه‌وده‌ حه‌زين

له‌يوا ديمه‌نيگ كه‌م هه‌سه له‌ ئی دونيا

باخ جوان و ئاو ره‌وان ئه‌هل وه‌ دين

منيش ئويشم:

به‌ڵی زيوه‌ر ستايشد فريه‌ جوانه‌و به‌هه‌يشته‌ ئی خانه‌قينه‌

وه‌لی هيمان زه‌خمداره‌و مه‌ردمه‌گه‌يشی دڵ خه‌مينه‌

ئاو ئه‌ڵوه‌نيش جارجاريگ وه‌ شوون قه‌تره‌يگی قه‌سه‌م

هه‌روه‌ختی دوشمن مه‌يلی بوود مه‌رزی تا قه‌سر شرينه‌

سه‌ر له‌ مه‌زارد باره‌ ده‌ر به‌و بوينه‌ باخ و بووسانی

تا وه‌چه‌و خوه‌د خاس بوينيده‌ی چه‌ن باخی له‌بن بڕينه‌

قه‌سه‌م وه‌ قرچه‌ی ئاگره‌گه‌ی پای نارنج و پرته‌قاڵه‌گه‌ی

مانگی جاريگ باخيگ سزنن نيه‌زام تاوان كام بی دينه‌

ئه‌و باخ سيف و ليمووه‌ ك زينه‌ت دا شار و جاده‌ی

ئيسه‌ هشك و بی باخه‌وان، بی چويزه‌ر و بی په‌رچينه‌

ته‌وق مه‌رگ يه‌سه‌ له‌ی شاره‌ دوشمن سه‌رفرازيه‌

دی نيه‌زانيم كه‌ی كووتا بوو ئی زايڵه‌ی گه‌رمه‌ شينه‌

هه‌ر وه‌و خاتريشه‌ سه‌ره‌تا داواكاريم له‌ حكوومه‌ت هه‌رێم كوردستان و گشت وه‌رپرسه‌يل شار خانه‌قين مقه‌يه‌تی باخ و بووسان و ديمه‌نه‌يل دڵڕفن و پارك و شوونه‌يل گه‌شتياری ئی شاره‌ بكه‌ن و دويای ئه‌وه‌يش خوازياريم له‌ليان وه‌ چه‌و ريز و حورمه‌ته‌و بنوڕنه‌ مێژوو قوربانی رووڵه‌يل خه‌باتكار شاره‌گه‌و له‌ خه‌ڵك خانه‌قينيش داواكاريم يه‌كده‌نگ و يه‌كڕز بوون و ڕی وه‌ ناحه‌ز و كاولكه‌ر مه‌يه‌ن شاره كوردستانيه‌گه‌دان ويران بكه‌ن و هه‌وڵ ئه‌وه‌ بيه‌ن باخ ئوميد و ئه‌زره‌ت له‌تی بكاڵين، چوينكه‌ زيوه‌ر شاعر له‌ سه‌رده‌ميگ باس جوانی ئی شاره‌ كردگه‌ حه‌يفه‌ ئيسه‌ رووڵه‌يلی ده‌رفه‌ت بيه‌نه‌ نه‌ياره‌يلی ژينگه‌و كه‌ش و هه‌وا له‌باره‌گه‌ی بشيونن، هه‌ر وه‌و خاتريشه‌ داواكاريم له‌ ئداره‌ی خانه‌قين په‌يكه‌ريگ ئه‌را(زيوه‌ر)شاعر له‌ خانه‌قين دروس بكا يا ناو يه‌كيگ له‌ جاده‌يلی وه‌ ناو ئه‌و ناوگير بكا.

جه‌ماڵ ئه‌ركه‌وازی