ده‌سوه‌رداین بیگانه‌و جواودانه‌وه‌ى عراقى

شفق نيوز

ئه‌و وڵاته‌ ئه‌را روى وه‌ڕوى بوینه‌وه‌ى ئه‌و جووره‌ كاره‌یله‌ بزانیم و له‌هه‌مان وه‌خت كزى و سسى ئه‌و لایه‌نه‌یله‌ بزانیم ك خه‌ریك ده‌سوه‌رداینن.

 

ئه‌را نموونه‌، وه‌تایبه‌ت عراقه‌و بار سه‌ختیگ دوینیم له‌بننیاتناین ده‌زگایه‌یل ده‌وڵه‌ت و كزى ئاشكرایگ وه‌و ده‌زگایه‌یله‌و دیاره‌، وه‌ل ئه‌وه‌یشا مه‌سه‌له‌ى كاولكارى له‌ئاكام زنجیره‌ جه‌نگه‌یلیگ كاولكه‌ر و یه‌ك له‌شوون یه‌ك له‌عراق وه‌دریژایى ئى ساڵه‌یل دویاخره‌و بار سه‌ختیگ دروسكرد، یه‌یش بیجگه‌ بار ناسه‌قامگیر سیاسى و ئاسایش ك تون وتیژى فره‌یگ هاوردو رووژگاریگ بوى میلیشیایه‌یل چینایه‌تى زاڵ بوینه‌ بان شار و جاده‌یل عراق ته‌نیا هه‌رێم كوردستان له‌لى بترازیه‌ێد.

 

ئنجا له‌ى بار پڕ له‌گرفته‌، ده‌وڵه‌ته‌یل هاوساو ده‌وڵه‌ته‌یل گه‌وراو به‌رژه‌وه‌ندیخواز ده‌ور جوراوجوور نیشاندان له‌مه‌یدان عراقى جوور ده‌رفه‌تیگ ئه‌را نه‌فكردن له‌بار ناسه‌قامگیرى عراق و ناكوكى ناونى لایه‌نه‌یل عراقى و شیوایشیو له‌كار ده‌زگایه‌یل گرینگ ، ك گشت ئى كاره‌یله‌ بویه‌ مایه‌ى ده‌سوه‌رداین بیگانه‌ له‌وه‌ر خاتر به‌رژه‌وه‌ندى خوه‌یان، ك وڵات وه‌ره‌و مه‌ترسى بردن و ده‌روازه‌یل فره‌یگ واز بوى ئه‌را ئه‌و ده‌سوه‌رداینه‌ له‌كاروبار عراق.

 

وه‌لى ڕاده‌ى ده‌سوه‌رداین راسه‌وخۆ و ناڕاسه‌وخۆ له‌ پڕچه‌ككردن كه‌سه‌یل وه‌كراگیریاى ده‌س وه‌پیكرد تا ره‌سیه‌ ئه‌وه‌ك ترۆریسته‌یل مه‌رز بشكنن و بانه‌ ناو عراق و كاولكارى ئه‌نجام بیه‌ن و ئامانجیان ئه‌وه‌ بوى ناسه‌قامگیرى له‌ وڵات دروس بكه‌ن و هه‌ر له‌وه‌ر ئه‌وه‌یش مه‌ردم بیتاوان له‌ده‌زگایه‌یل مه‌ده‌نى گرتیانه‌ ئامانج.

 

بیگومان تائیسه‌یش مه‌رزه‌یل عراق وه‌ته‌واوى كۆنترۆڵ نه‌كریانه‌ له‌لایه‌ن سوپاو هیزه‌یل پاسه‌وان، ئه‌ویش له‌وه‌ر كزى توانایى مه‌شقكردن تایبه‌ت، ك هه‌میشه‌ ئه‌و مه‌رزه‌یله‌ تویش كاره‌سات په‌زانن و شكانن نیشانه‌یل ناوده‌وڵه‌تى تیه‌ن وه‌شیوه‌ى مه‌ترسیداریگ  وه‌تایبه‌ت مه‌رز ده‌ریایى ك خه‌ریك ده‌روازه‌ى ئاوى به‌سیه‌ێد له‌ئاوه‌یل هه‌رێمى عراقى.

 

ده‌سوه‌رداین تر ئه‌وه‌سه‌ ك له‌ناو خاك عراق دزى ئاشكرایگ له‌چاڵه‌یل نه‌فتى عراق كریه‌ێد و له‌ڕى وشكانى و ده‌ریاوه‌ بڕیه‌ێده‌ شوونه‌یل تر، یه‌یش بیجگه‌ په‌زانن مه‌رزه‌یل له‌لایه‌ن سوپاى وڵاته‌یل هاوساو بوردمانكردن ناوچه‌یل مه‌رزى ك ئه‌رك حكوومه‌ت مه‌ركه‌زى وه‌رگرى له‌ سه‌روه‌رى و ملله‌ت هه‌رێمیش بكا له‌وه‌ر خاتر دوباره‌ نه‌كردنه‌وه‌ى ئه‌و كاره‌یله‌.

 

وه‌لى مه‌ترسیدارترین ده‌سوه‌رداین و جه‌نگ له‌ناوبردن عراق ئه‌و پرووژه‌یل گه‌وراو ئه‌و خه‌رجه‌یله‌سه‌ ك ئه‌را دروسكردن وه‌ربه‌س ته‌رخان كریاگه‌ له‌بان ئاو دجله‌و فورات و له‌هه‌مان وه‌خت هه‌وڵ ئاڵشتكردن ریڕه‌و دجله‌و بڕین چه‌مه‌یل كارۆن و ئه‌ڵوه‌ن و ده‌یه‌ها چه‌مه‌یل تر دریه‌ێد له‌لایه‌ن وڵاته‌یل هاوسا ك هه‌زاران ساڵه‌ ئه‌و چه‌م و ئاوه‌یله‌ هاوبه‌شه‌ له‌ناونى عراق و ئه‌و ده‌وڵه‌ته‌یله‌.

 

بیگومان ئى ده‌سوه‌رداینه‌ له‌كاروبار و سه‌قامگیرى و ئاسایش عراق، جواودانه‌وه‌و هه‌ڵویست نیشتمانى تواێدو گشت لایه‌نه‌یل بایه‌سه‌ وتاریان له‌ى باوه‌ته‌و یه‌كیگ بوود و جموجویل خاسیگ بكریه‌ێد له‌لایه‌ن هیزه‌یل نیشتمانى مقه‌یه‌تیكه‌ر له‌بان به‌رژه‌وه‌ندى وڵات و ملله‌ت.

ته‌یسیر عه‌بدولجه‌بار ئالوسى

ج