ته‌عريب و داعش دو روی سكه‌يگن

شفق نيوز

ئه‌گه‌ر ته‌ماشای په‌لامار ته‌عريب بكه‌يم له‌ كوردستان باشوور، ئه‌وه‌ بيگومان دوينيم ك هه‌ر ده‌سڵاتيگ هاتگه‌ له‌ په‌لامار ته‌عريب ته‌واوكه‌ر ده‌سڵات وه‌رجه‌ خوه‌ی بويه‌و هويچ رژيميگ نه‌ك هه‌ر كار ئه‌را وساننه‌وه‌ی ته‌عريب نه‌كردگه‌، به‌ڵكوو دريژه‌ وه‌پی داگه‌ تا ره‌سيه‌سه‌ رووژگار ئمڕوو.

له‌شوون ٢٠٠٣ و رميان رژيم سه‌دام، جارجاريگ له‌يوا هويره‌و كرديايم ك ئه‌و په‌لاماره‌يله‌ وسيه‌ن و باوه‌ڕمانيش ئه‌وه‌ بوی له‌ڕی جيوه‌جيكردن ده‌ستوور عراقه‌و چاره‌سه‌ر ئه‌كريه‌يد، وه‌لی ده‌ركه‌فت ئه‌و په‌لاماره‌يل ته‌عريبه‌ له‌ رووژگاره‌يل جياجيای حوكمڕانی عراق خزمه‌ت فريه‌يگ پيشكه‌ش كرده‌سه‌ به‌غدای دويای ٢٠٠٣.

داعشيش هووكار و عابايگ تر ناسيوناليست عه‌ره‌به‌ ئه‌را فيشتر داگيركردن خاك كوردستان و كوشاننه‌وه‌ی شوونه‌وار نه‌ته‌وه‌يی و ئاوه‌دانی ملله‌ت كوردستان، ك چه‌ن ساڵێگه‌ له‌ سايه‌ی بار ئاراميگ هه‌وڵ ئه‌رای درياگه‌و خوين ئه‌رای رشياگه.‌

داعش له‌ وه‌رگ ئايين و له‌سايه‌ی ئه‌و خه‌لافه‌ته‌ ك ئاشكرای كردگه‌ دريژه‌ ئه‌ياده‌ به‌رنامه‌ی ناسيۆناليسته‌يل عه‌ره‌ب، ئه‌و ناسيۆناليسته‌يله‌ ك دويه‌كه‌ وه‌ناو نه‌ته‌وايه‌تی و عرووبه‌وه‌ كوردستان وه‌پی ويران كردن و ئيسه‌يش له‌ وه‌رگيگ تره‌و ك وه‌ چه‌ك و تفاق فريه‌يگ جه‌نگييه‌و په‌لاماری ئه‌يه‌ن وه‌ جووريگ ك ئووخه‌ی ئه‌خاده‌ دڵ ناسيۆناليسته‌يل عه‌ره‌ب و ته‌نانه‌ت كه‌سه‌يل تايفی و مه‌زه‌وييش وه‌ په‌لامار داعش ئه‌را بان كوردستان دڵيان هوونگه‌و ئه‌دێ.

ئه‌و شوونه‌يل كوردستانه‌ ك ته‌عريب كار خوه‌ی له‌تيان كردگه‌، خاسترين ژينگه‌ی داعشن، ته‌ماشای خوه‌رئاوا بكه‌ن ك ته‌عريب چه‌ كردگه‌، ته‌نانه‌ت ئابلوقه‌داين كۆبانی هووكاره‌گه‌ی ته‌عريبه‌ ك بويه‌سه‌ ژينگه‌ی داعش و ئاسانكاری ئه‌را په‌لاماره‌يليان، عه‌ره‌ب ئه‌و ناوچه‌يل ته‌عريبكرياگه‌ نه‌ك هه‌ر باوه‌ش ئه‌را داعش واز كردنه‌، به‌ڵكوو به‌شداری كارای هيزه‌يل بوين و په‌لامار ئه‌و شماره‌ی كه‌م ماڵه‌يل كورده‌ دان ك له‌ شوونه‌يل وه‌عه‌ره‌بكرياگ مه‌ندوينه‌وه‌و ده‌سيان چيه‌ خوين و ماڵ ئه‌و ماڵه‌ كورده‌يله‌ ك خاكيان له‌ليان زه‌فت كرياگه‌و باوه‌ڕيان ئه‌وه‌ بوی هه‌ليگ تر ئه‌را عه‌ره‌ب هه‌ڵكه‌فت ك فيشتر خاك كوردستان داگير بكه‌ن و جاريگتر كوردستان تاڵان بكه‌ن، وه‌ يه‌يش ئه‌و برايه‌تيه‌ ك ته‌نيا له‌لایه‌ن كورده‌و كار ئه‌رای ئه‌كريه‌يد تويش قه‌يران بوی و بی متمانه‌ی كرد.

مانای ئه‌وه‌سه‌ ك ئيسه‌ رووژ نه‌هيشتن شوونه‌وار ته‌عريبه‌و داعش هيزيگ قه‌يزناكه‌ له‌ جه‌هان و ته‌نيا هيز هاوپه‌يمانێتی دژ داعشيش پێشمه‌رگه‌س ك له‌بان زه‌وی په‌لاماره‌يلی شكنيد و كه‌مه‌ كه‌مه‌ ناوچه‌يل داگيركرياگ ده‌س ته‌عريب و داعش قورتار و ئازاد ئه‌كاو خاسترين ده‌رفه‌ته‌ ئه‌را شكانن وه‌رده‌وام ته‌عريب ك ئمڕوو داعش سه‌ركردايه‌تی ته‌عريب ئه‌كاو خوين پێشمه‌رگه‌يش نادێ ته‌نيا ئه‌را ده‌ركردن هيزه‌يل داعش بڕشيه‌يد، به‌ڵكوو بايه‌سه‌ ئه‌و گشت خوين و شه‌هيده‌يله‌ ئه‌را راوناين داعش و نه‌هيشتن شوونه‌ار ته‌عريب بدێ، چوينكه‌ ته‌عريب و داعش دو روی سكه‌يگن.

دڵشاد مسته‌فا وه‌سانی

ج . أ