نه‌ گورانی ئه‌را كه‌ڕ و نه‌يش سه‌ما ئه‌را نابينا

شفق نيوز

ئه‌وه‌ك لای ئيمه‌ مايه‌ی پرسياره‌و هه‌ميشه‌ له‌شوون جواويگ گه‌رديم ئه‌ڕای، ئه‌ويش ده‌ركه‌فتن بڕيگ ده‌سه‌و گرووپ سياسيه‌ ك دژ وه‌ سه‌روه‌خوه‌يی كوردستان و دامه‌زرانن ده‌وڵه‌ت كوردی ئاراسته‌ ئه‌كريه‌ن، ئمجا وه‌ل ئه‌و هه‌مگه‌ غه‌در و سته‌م نه‌ته‌وه‌ييه‌ ك وه‌دريژايی مێژوو له‌ كورد كرياگه ئه‌و ده‌سه‌و گرووپه‌يله‌ ئه‌و راسيه‌ فه‌رامووش ئه‌كه‌ن و گشت ئه‌و خوين و ره‌نج و قوربانيداين كورد و ماف و ئازادی نه‌ته‌وه‌ييه‌ وه‌ ره‌وا نازانن ئه‌را كوردستان و خه‌و وه‌ده‌وڵه‌تبوين و سه‌روه‌خوه‌يی كوردستان وه‌ خه‌تا زانن!‌

هه‌وڵه‌يل وه‌ كانتۆنكردن بيجگه‌ ئه‌وه‌ك پيلانيگ تر شارياگ هه‌واڵگری دوشمنه‌يل كورده‌ ئه‌را دابه‌شكردن فيشتر كوردستان، هه‌وڵيگيشه‌ ئه‌را فه‌وتانن ئامانج نيشتمانی و دويره‌وخستن كورد له‌ هزر و فكر نه‌ته‌وه‌يی، ئمجا مه‌ترسيه‌گه‌يشی ها له‌وه‌ ئه‌و ده‌سه‌و گرووپه‌يله‌ چاره‌سه‌ر كيشه‌ی كورد له‌ سيستم وه‌كانتۆنكردن دوينن و به‌شيگن له‌و پيلانكاريه‌ ك له‌تی هه‌وڵ ئه‌وه‌ ئه‌دريه‌يد تاك كورد وه‌پی بخاده‌ ژير كاريگه‌ری سياسی و مه‌ترسيه‌يل ئه‌و دابه‌شكاريه‌ له‌لی بشاريده‌و.

كورد رووژگاريگه‌ خه‌و وه‌ دامه‌زرانن ده‌وڵه‌ت سه‌روه‌خوه‌يی دوينيد، وه‌و خاتريشه‌ فريه‌ترين خوين و قوربانی داگه‌، وه‌لی تازه‌ وه‌ تازه‌ ئه‌و ده‌سه‌و گرووپه‌يله‌ فكره‌ی وه‌كانتۆنكردن جوور ژه‌هر سياسی تيكه‌ڵ وه‌ هوير كوردايه‌تی ئه‌كه‌ن.

بيجگه‌ ئه‌وه‌يش ده‌سه‌و گرووپه‌يليگيش هه‌ن ئه‌را ده‌سكه‌فت حزبی و له‌ناو حزبيش له‌وه‌ر مقه‌يه‌تيكردن شانيه‌ت بنه‌ماڵه‌يگ دوينيد ژير وه‌ژير چينه‌سه‌ ناو بازنه‌ی هاوپه‌يمانی هه‌واڵگری و دوشمن ئه‌كه‌ن دادڕه‌س كورد، ك ئه‌وانه‌ وه‌ شيوه‌يگ خزيانه‌سه‌ ناو ئه‌و پيلانه‌ هويچ نادوينن و وه‌ جووريگ سه‌رگه‌رم كريانه‌ باسكردن ده‌وڵه‌ت كوردی و خستنه‌ڕووی زوڵم و سته‌م داگيركه‌ره‌يل كوردستان جوور ئه‌وه‌سه‌ له‌لايان گورانی ئه‌را كه‌ڕ بويشيد و سه‌ما ئه‌را نابينا بكه‌يد.

سوورە مەرگەیی

ج . أ