با خوه‌مان ئالشت بكه‌يم

شفق نيوز

 

مناڵ دوينيد ئه‌و كه‌سه‌گ وه‌رده‌وام ها له‌ماڵ و كاروبار بی به‌رهه‌م و بی سه‌رمايه‌ی ناو ماڵ جيوه‌جی ئه‌كا، ته‌نيا دايگه‌و ئه‌و كه‌سيشه‌ ك كاره‌يل ده‌يشت ماڵ ئه‌نجام ئه‌ياد ته‌نيا باوگه‌. ئمجا ئی شيواز دوينستنه‌ له‌لای مناڵ هس دوباره‌كردنه‌وه‌ی نه‌خش دايگ له‌ مه‌ژگ دويه‌ت دروس ئه‌كاو له‌ هه‌مان وه‌خت هس دوباره‌كردنه‌وه‌ی نه‌خش باوگ له‌لای كوڕ دروس ئه‌كاو ئی مناڵێشه‌ ئه‌خوازيد وه‌و شيوازه‌ بژيه‌يدو ناخوازيد له‌ ريڕه‌و باوانی لا بيه‌يد.‌

بيگومان ئی شيواز دابه‌شكردن كاره‌ ئه‌دێده‌ هووكار ئه‌وه‌ك پويل و شيواز وه‌كارهاوردنی له‌ژيرده‌س پياوه‌يل بدێ و ژنه‌يل ئه‌گه‌ريش خاوه‌ن كار و سه‌رمايه‌ی خوه‌يانيش بوون ناتويه‌نن جوور پياوه‌يل مامڵه‌ وه‌ پويل خوه‌يان بكه‌ن!

چوينكه‌ ئه‌وان له‌يوا ره‌سينه‌سه‌و ك پويل ته‌نيا ئه‌را گيرفان پياو دروس كرياگه‌و پياوه‌گه‌يش وه‌پی له‌يواسه‌ چشت مه‌ترسيداريگه‌ ژنه‌گه‌ی پويل بياشتوود، چوينكه‌ ئه‌و هويچ وه‌ختيگ چه‌وی له‌وه‌ نه‌ويه‌ ك دايگی پويل بياشتوود.

ئمجا ئه‌را له‌ناوبردن و نه‌هيشتن ئی هوير كويه‌ن و نه‌ريته‌ بايه‌سه‌ بويمنه‌ رينيشانده‌ر و سه‌ره‌تا ده‌سوه‌پيكه‌ر مناڵه‌يلمان، با ئيمه‌ له‌يوا نيشانيان بيه‌يم ك ژن و پياو ته‌واوكه‌ر يه‌كترن و جياوازی نيه‌ پويل له‌لای هه‌ركاميان بوود.

ئه‌را ئی مه‌راميشه‌ بايه‌سه‌ پياوه‌يليش ڕی وه‌ ژنه‌يليان بيه‌ن كار بكه‌ن و له‌هه‌مان وه‌خت ريگريش نه‌ون له‌وه‌رده‌م ژنه‌يليان ئه‌را وه‌كارهاوردن پويل و له‌ هه‌مان وه‌خت ژنه‌يليش بايه‌سه‌ وه‌ بويری و چه‌و نه‌ترسيه‌و كار بكه‌ن و ئه‌وه‌ بچه‌سپنن ك توانادارن و توانای كاركردن ديرن و جياوازی نه‌يرن وه‌ل پياو له‌ كاركردن.

وه‌ی كاريشه‌ نموونه‌ی جوانيگ په‌يا ئه‌دێ ئه‌را نه‌هيشتن جياوازی كار و سه‌رمايه‌و بگر گشت جووره‌ جياوازييگ ره‌گه‌زييش له‌ ناونی ژن و پياو نامينيد، چوينكه‌ تا دايگ و باوگ ئاڵشت نه‌ون مناڵه‌يليانيش ك نه‌وه‌ی دويا رووژن يه‌كسانی يای ناگرن! وه‌ی جووريشه‌ كوومه‌ڵگا هه‌ر له‌ی بازنه‌ی ئيسه‌يه‌ ئه‌چه‌رخيدو هويچ وه‌ختی پيش ناكه‌فيد.

شيبا كه‌ره‌م عه‌بدوڵڵا

ج . أ