پێشمەرگە‮..‬ناسنامەی‮ ‬نەتەوەیگ

شفق نيوز

وه‌ دريژايی مێژوو خه‌بات ئازاديخواز ملله‌ت كورد وشه‌ی پێشمه‌رگه‌ هاوته‌رتيب وه‌ليا هاتگه‌و وه‌رده‌واميش دوشمنه‌يل ته‌نانه‌ت له‌ وه‌كارهاردن ئه‌و وشه‌يشه‌ سڵ كردنه‌و تواسنه‌ وشه‌و ناو نه‌گونجياگ له‌شوون وشه‌ی پێشمه‌رگه‌ دابنه‌ن.

وه‌لی وه‌رده‌وامی له‌ خه‌بات و هاوسه‌نگی پێشمه‌رگه‌ ئی هيزه‌ له‌بان دوشمن و ئه‌و پيلانه‌يله‌ سه‌رخستگه‌و مامڵه‌ی ئنسانيانه‌ی پێشمه‌رگه‌ تا ئه‌و راده‌ بويه‌ ك له‌ كاره‌ساتترين وه‌ختيش وه‌ ئنسانيه‌تترين شيوه‌ مامڵه‌ وه‌ل دوشمنه‌يلی كردگه‌، يه‌يش له‌وه‌ختيگ ك ئه‌وان وه‌ دڕنده‌ترين شيوه‌ مامڵه‌ وه‌ل پێشمه‌رگه‌ كردنه‌و گشت شيواز مامڵه‌كردنيان وه‌خاتر له‌ناوبردنی په‌يڕه‌و كردنه‌.         

ئه‌ڵڵاجه‌وی ها له‌ورا له‌وه‌خت گفتگووكردن و هه‌وڵه‌يل ئاشتيانه‌، داگيركه‌ره‌يل كورد هه‌وڵ ئه‌وه‌ دانه‌و به‌ڵكوو جارجاريگ مه‌رج ئاڵشتكردن ناو پێشمه‌رگه‌ دانه‌، ئه‌را نموونه‌: له‌ ساڵ ١٩٧٠ ناوی نان "پاسه‌وان مه‌رز" و لةشوون ئازادكردن عراقيش له‌ ساڵ ٢٠٠٣ ناوی نريا "پاسه‌وان مه‌رز".

له‌ڕاسی ئه‌يه‌ ئه‌چێده‌و ئه‌را ئه‌و زه‌ره‌ده‌يل گه‌ورا ك پێشمه‌رگه‌ له‌ رووژگار خه‌بات جموجويل ئازاديخواز كوردستان داسه‌ی له‌و هيزه‌يل داگيركه‌ره‌، وه‌لی چوينكه‌ ناو پێشمه‌رگه‌ له‌ وژدان ملله‌تيگ خه‌باتكه‌ر دابه‌ش كرياگه‌و په‌يا بويه‌ دوينيم هه‌ميشه‌ ئه‌و ناو وه‌ گه‌ورايی و به‌رزی مه‌نده‌سه‌و.

ئيسه‌يش خواست ئه‌وه‌سه‌ ك بايه‌سه‌ ناو پێشمه‌رگه‌ له‌ گشت هيزه‌يل ئازاديخواز كوردستان بنريه‌يد و ناوه‌يل جياكاری و پارچه‌خوازی بخريه‌يده‌ كنار، چوينكه‌ ئمڕوو وشه‌ی پێشمه‌رگه‌ بويه‌سه‌ ناسنامه‌ی ملله‌ت كورد و جوور ئه‌وه‌ك دوينيم له‌ ميديايه‌يل جه‌هانی وه‌ فراوانترين شيوه‌ ئه‌يه‌ريه‌يده‌ كار و ئيسه‌ له‌بان گشت گووشه‌ی زه‌وی هه‌نای ناو پێشمه‌رگه‌ ئه‌يه‌ريه‌يده‌ كار گشت مه‌ردم زانن ك باس له‌ نه‌ته‌وه‌ی كورد و كيشه‌گه‌ی ئه‌كريه‌يد، ك وه‌ ئه‌يه‌يش ئی وشه‌ له‌ وشه‌يگ ساده‌وه‌ ئاڵشت بويه‌ ئه‌را ناسنامه‌ی نه‌ته‌وه‌يگ ك ئه‌ويش نه‌ته‌وه‌ی كورده‌.

هيوا حسێن

ج . أ