وه‌ختى هاتگه‌و با پشتگیرى له‌لى بكه‌یم

شفق نيوز

 

ساڵ 1979 بیرنارد لویس نه‌خشه‌ى دابه‌شكردنه‌وه‌ى خوه‌رهه‌ڵات ناوین خسته‌ڕوى، ئاڵشتكارى و پیشهاته‌یل ئى چه‌ن ساڵه‌یل دویاخریشه‌ ئشاره‌ت وه‌ ئه‌وه‌ كه‌ن ك نه‌خشه‌ى تازه‌یگ  ئه‌را ئى ناوچه‌ كیشریه‌ید و جیاس له‌ مه‌رزه‌یل خویناوى سه‌رده‌م ریككه‌فتن سایكس – بیكۆ، ئنجا وه‌ قسه‌ى راڵف پیته‌رز جه‌نراڵ خانه‌نشین ئه‌مریكى، وه‌ گووره‌ى ئه‌و نه‌خشه‌ گرووپه‌یل ئه‌تنى غه‌درلیكریاگ قه‌ره‌بوو كریه‌ن.

 

هه‌رچه‌نى كورد ئه‌وسا له‌سه‌رده‌م ریككه‌فتن سایكس بیكۆ قه‌وڵ ده‌وڵه‌ت سه‌روه‌خوه‌ى وه‌پى دریا، وه‌لى ئه‌و قه‌وڵه‌ جیوه‌جى نه‌كریا له‌ئاكام په‌شیمان بوینه‌وه‌ى حكوومه‌ته‌یل ئه‌و سه‌رده‌مه‌ ك كوردستان له‌بانیان دابه‌ش كریاو دى ئه‌وه‌ بوى كورد دوچار جووره‌ها مه‌ینه‌تى و پاكسازى ره‌گه‌زى و جه‌مكوشى هات.

 

ئیسه‌یش كورد له‌ئاست جه‌هانى گه‌وراترین نه‌ته‌وه‌ى بى ده‌وڵه‌ته‌و یه‌كیگه‌ له‌و غه‌در له‌لى كریاگه‌یله‌، وه‌لى له‌ئاست ناوخوه‌یى و هه‌رێمى و ناوده‌وڵه‌تیه‌و بار ئیسه‌ى كورد جیاس له‌و سه‌رده‌مه‌و كوردستان خاوه‌ن سه‌رۆك هه‌ڵوژریاگ و په‌رله‌مان و حكوومه‌ت خوه‌یه‌و ها له‌هه‌وڵ دامه‌زرانن ئابوورییگ سه‌روه‌خوه‌ى، ك گشت ئه‌یانه‌ به‌شیگن له‌ خودئاماده‌كردن  ئه‌را ئه‌گه‌ره‌یلى ك ئه‌گه‌ر وه‌ ته‌واوى باریه‌نه‌ به‌رهه‌م ئه‌وه‌ بیگومان له‌ به‌رژه‌وه‌ندى نه‌ته‌وه‌ییمانه‌.

 

جاران ده‌وڵه‌ته‌یل چوارده‌ورمان" عراق، ئیران، توركیا، سوریا" بیجگه‌ ناكوكى و جیاوازیه‌یل ناونیان وه‌ل ئه‌وه‌یشا جارجاریگ وه‌یه‌كه‌و جه‌مه‌و بویان و باس و قسه‌یان له‌بان فه‌وتانن كورد بوى، وه‌لى ئیسه‌ ئه‌و مه‌سه‌له‌ ئاڵشتكارییگ بنه‌ڕه‌تى هاته‌سه‌ بانى و له‌ئاست ناوده‌وڵه‌تى كوردستان سه‌نگ تایبه‌تیگ دیرید.

 

ئیسه‌ وه‌گووره‌ى بار ئه‌و ده‌وڵه‌ته‌یله‌ ك خاك كوردستان له‌بانیان دابه‌ش كریا، كورد له‌ى دیمه‌نه‌یله‌ ك هه‌رچه‌نى كه‌م و كوڕى دیرید وه‌لى ئومید فره‌یگ دیرید، وه‌ل ئه‌وه‌یشا ئه‌گه‌ر له‌بان ئاست هه‌رێم كوردستان راپرسییگ بكریه‌ید ئه‌وه‌ بیگومان دوینیم زوورم خه‌ڵك كوردستان سه‌روه‌خوه‌یى هه‌ڵوژنن و راپرسیه‌ نافه‌رمیه‌گه‌ى 2005یش به‌ڵگه‌یگ زینگ ئى راسیه‌سه‌، وه‌لى گامناین بى كیشه‌و گرفت نیه‌.

 

ئنجا له‌وه‌ر خاتر هاماركردن ئه‌و كیشه‌و گرفته‌یله‌ ك مه‌ندنه‌، یه‌كڕزى و یه‌كده‌نگى فره‌ گرینگه‌، هه‌ر له‌وه‌ر ئه‌وه‌یش له‌شوون ئه‌وه‌ك ك به‌غدا پشت له‌لیمان كرد له‌وه‌رانوه‌ر هه‌قه‌یل ده‌ستوورى هه‌رێم كوردستان، دى وه‌رپرسیارێتى تاریخى خوازیاره‌ له‌گشت هیزه‌یل سیاسى كوردستان گشت ناكوكیه‌یل بخه‌نه‌ كنار و پشتگیرى ئه‌و ئامانجه‌یله‌ بكه‌ن ك خوین فره‌یگ له‌وه‌ر خاترى رشیاگه‌.

 

كه‌ریم قادر

ج. ا