چوینكه‌ ژنم .. په‌رله‌مانیگ پیاوانه‌ توام

شفق نيوز

قاپیه‌یل خوه‌یان بوه‌سن و هه‌رچى خه‌و وخه‌یاڵیانه‌ بیه‌نه‌ وایا، چوینكه‌ ئیمه‌ له‌ عیراق دیموكراتى نوومان بڕیاردایمن ، دویاى ئه‌و هه‌مگه‌ قوربانیداین و خه‌باتمانه‌ وته‌حه‌داى سه‌ختیه‌یل و هه‌ڵوژانن ئه‌و كه‌سه‌یله‌گ توایمنه‌یان !(باوه‌ڕ كه‌م ئیمه‌ ئه‌و كه‌سه‌گ توایمنه‌ى هه‌ڵوژانیمنه‌ى)، و هه‌وڵ وته‌قه‌لاى فره‌یگ دایمن تا ژیش له‌ سه‌ندووقه‌یل ده‌نگداین به‌شداشتوود، و له‌ كورسیه‌یل په‌له‌مانیش شوون خوه‌ى داشتوود، هیمان بڕیگ كه‌س ئمزا جه‌مه‌و كه‌ن وهه‌ڵمه‌ت ریكخون تا به‌شیگ داشتوون له‌ شوونه‌یل جیوه‌جیكردن یا ته‌نفیزى، ئیمه‌ بڕیار دایمن چه‌پڵه‌ ئه‌را حكوومه‌تیگ پیاوانه‌ بكوتیمن! بووه‌خشن ژنه‌یل په‌رله‌مانتار عیراق بڕیار دان چه‌پڵه‌ ئه‌را حكوومه‌تیگ پیاوانه‌ بكوتن.

ئه‌ى دى ئیمه‌ ئه‌را هه‌ڵوژانیمنه‌دان ئه‌ى ژنه‌یل؟!

ئه‌راچه‌ ته‌حه‌داى سه‌ختیه‌یل كردیمن تا ئیوه‌ له‌ بان كورسیه‌یلدان وه‌ ڕێژه‌ى 25 % بنیشین!

چوین ماوه‌داینه‌ خوه‌دان ده‌نگ ژنه‌یل له‌كیس بیه‌ین ئه‌را خاتر به‌رژه‌وه‌ندى حزبه‌یلدان وده‌سڵاتیگ پیاوانه‌ ك هه‌وڵده‌ید ده‌سڵات خوه‌ى له‌ گشت شوونیگ له‌ ژیان بچه‌سپنید.

باس چ دیموكراسییگ بكه‌یمن ؟! وه‌رگرى له‌ چ مافیگ بكه‌یمن؟

ماف ژن له‌ چه‌؟! و نوێنه‌ره‌یل ژنمان واز له‌ هه‌ق خوه‌یان و هه‌ق ئیمه‌یش له‌ حكوومه‌ت نوومان هاوردن؟!

ئایا ئه‌یه‌ نسكۆ یا نه‌كسه‌یگه‌؟! ئایا قه‌یرانیگه‌؟ ئایا ترسه‌؟ ئایا ملكه‌چ بوینه‌ وڕه‌نج بیوه‌رییگه‌ ك نوێنه‌ره‌یلمان له‌تى ژیه‌ن؟!

ئویشن تاوان پیاوه‌یله‌ ، سه‌رۆك فراكسیۆنه‌یل ك ژنه‌یل كاندید نه‌كردن ؟! هاكوو فراكسیۆن سه‌رۆك وه‌زیره‌یل؟!ئایا سه‌رۆك وه‌زیره‌یل ژن كارزانیگ له‌ لیسته‌گه‌ى نه‌یه‌وه‌ تا پۆستیگ وه‌زارى وه‌ربگرید؟!

به‌زه‌یى گریده‌م؟ وه‌لى نیه‌زانم به‌زه‌ییم وه‌ كیا باید؟!

به‌زه‌ییم وه‌خوه‌ما باید وه‌ل چالاكوانه‌یلیگ جویر خوه‌م ك خه‌وه‌یلمان له‌ كویچه‌یل ته‌نگ سیاسه‌ت پیاوانه‌ گوم بوى؟!

به‌زه‌ییم وه‌ نوێنه‌ره‌یل ژنه‌و باید ، ك په‌كیان كه‌فتیه‌ له‌ وه‌رگردن بڕیاریگ ئاسان ك له‌ هۆڵ په‌رله‌مان بدران و قه‌بوول نه‌كه‌ن ده‌نگ وه‌ى حكوومه‌ته‌ بیه‌ن، شایه‌ت (ئاڵا  تاڵه‌بانى ) ئازا جیاوه‌كه‌م ، هه‌رچه‌نى ك ئومیده‌وار بویم ك هه‌ڵوێسته‌ ئازایانه‌گه‌ى له‌ قسه‌و وشه‌گانى گه‌وراتر بوود!

ئایا به‌زه‌ییم وه‌ پیاوه‌یل باید له‌ حكوومه‌ت نوومان ، ئه‌ى به‌دبه‌خته‌یله‌ ، چ مه‌ینه‌تییگ چه‌وه‌ڕییان كه‌ید؟!

خودا وه‌دیارده‌و بوود عیراق ؟!

خودیار سه‌رمانه‌و بوود، شایه‌ت هویر له‌وه‌ بكه‌یمن ك كووچ بكه‌یمن وه‌ره‌و...

كاملا؟ هه‌رچى ته‌یارخانه‌یه‌ له‌ ڕویمان به‌سیانه‌، و وه‌ هاتمان قه‌بوول نیه‌كه‌ن، چوینكه‌ ژنیم، و كه‌سیش نیه‌دوینیمنه‌و داواى هه‌قمان بكه‌ید، مه‌گه‌ر وه‌ مه‌رسوومیگ كۆمارى ك خاوه‌ن مه‌عالیه‌یل خه‌یرى كه‌ن وه‌پیمان، وه‌ چه‌پڵه‌ڕیزان خوه‌یشكه‌یلمان له‌ په‌رله‌مان!.