له‌ عیراق؛ بڕیاره‌یل فره‌ و جیوه‌جیكردن هویچ

شفق نيوز

میننه‌ په‌یوه‌ندى ئه‌و خاڵووه‌ ك له‌ خوار ئاو بردیه‌سه‌ى و ئه‌و خوارزا ك له‌ بان مینه‌ى كه‌ید... ده‌یان بڕیار ده‌رچوود وه‌لى له‌ ڕیگه‌و كوڵه‌سویكه‌یل و ڕۆتین فه‌رمانگه‌یل گوم بوون و قوربانییش له‌ گشت حاڵه‌تیگ هاووڵاتیه‌ ك وه‌خته‌گه‌ى و سه‌رچاوه‌ى مه‌عیشه‌ته‌گه‌ى له‌ چه‌وه‌ڕى كردن و هاتوچووكردن له‌ى فه‌رمانگه‌یله‌ له‌ ده‌س ده‌ید، و به‌ش كورده‌یل فه‌یلى له‌ى قوربانیداینیشه‌ له‌ گشتى فره‌تره‌، چوینكه‌ له‌ سه‌رده‌م ڕژیم دیكتاتۆرى بوینه‌ قوربانى سیاسه‌ته‌گانى و له‌ شوون ڕمیانیشى بوینه‌سه‌ قوربانى جیوه‌جى نه‌كردن ئه‌و بڕیاره‌یله‌ ك ده‌وڵه‌ت ده‌ریان كه‌ید.

وه‌لید نه‌زار هاشم جایڵ جوانیگه‌ له‌ ساڵ 1970 له‌ شار به‌غدا په‌یا بویه‌ و خێزانه‌گه‌ى له‌ یه‌كم خێزانه‌یلیگ بویه‌ ك له‌ ساڵ 1980 كووچ وه‌پیان كریاس، وه‌لید ئویشى باوگم خاوه‌ن ڕه‌گه‌زنامه‌ى عیراقى بوى و له‌ شار تكریت له‌ یه‌كیگ له‌ كۆمپانیایه‌یل فه‌ره‌نسى كاركردیاد له‌ ئان ته‌سفیركردن، دایگمیش ك شه‌هاده‌ جنسیه‌ى عیراقى داشت؛ له‌و وه‌خته‌ دو ڕى نانه‌ وه‌رى، یا وه‌ته‌نیا له‌ عیراق بمینیده‌ى، یا وه‌ل ئیمه‌وه‌ وه‌ره‌و ئیران ته‌سفیر بكریه‌ید و ئه‌ویش وه‌ل ئیمه‌وه‌ هات.

وه‌لید یاد ڕووژه‌یل ته‌سفیركرن كه‌فته‌ هویرى و چوین وه‌ل ئه‌وباقى خیزانه‌یله‌و جه‌میانه‌وكریا و بریان ئه‌را گه‌راج ئه‌مانه‌ و ئنجا وه‌شه‌و تاریك بریان ئه‌را ناوچه‌ى په‌رویزخان و ڕه‌وانه‌ى ئه‌ودیم مه‌رز ئیران كریان، و ئنجا له‌ورا بریان ئه‌را شار قه‌سرشرین و دویاى دو ڕووژ  بریان ئه‌را خوڕه‌م ئاباد له‌ورایشه‌ خریانه‌ ناو جه‌مه‌لۆنیگ سه‌ربازى چووڵكریاى. له‌ ماوه‌ى مه‌نینیان له‌ ئیران تویش مه‌ینه‌تى و به‌دبه‌ختى و هه‌ژارى و جه‌وركیشان فره‌یگ  هاتن، و مناڵه‌یلیان نه‌تویه‌نستن له‌ مه‌دره‌سه‌ بخوه‌نن و ئه‌گه‌ر بتواستیان كاریش بكه‌ن ئه‌وه‌ بایه‌ت بوى وه‌دزیه‌و كار بكه‌ن چوینكه‌ ئه‌گه‌ر ده‌سڵاتداره‌یل ئیرانى بزانستیان ك ئیرانییگ هاتیه‌ عیراقییگ ناسه‌ كاره‌و تویش سزاى سه‌ختیگى هاوردن، وه‌نسبه‌ت كه‌رت گشتییش قه‌یه‌خه‌ بوى عیراقى له‌تى كار بكه‌ید.

وه‌لید ئویشى: له‌ شوون ڕمیان ڕژیم دیكتاتۆرى وه‌ 6 مانگ ، هاتمه‌وه‌ ئه‌را عیراق و چه‌وه‌ڕى و دڵخوه‌شى  ئه‌وه‌ داشتم ك ژیان جاریگ تر ئه‌رام بخه‌نێ، وه‌لى وه‌داخ گرانیگه‌و تا ئیسه‌یش هویچ قه‌ره‌بوویگ نه‌كریامه‌ و ته‌نانه‌ت ئه‌و كارت ڕه‌گه‌زنامه‌ یا هه‌ویه‌ى ئه‌حوال مه‌ده‌نیه‌ ك دویاى سه‌رژان فره‌یگ گیرى هاوردمه‌ دو ساڵ كیشا و شه‌هاده‌ جنسیه‌یش له‌ ساڵ 2009 ده‌ركردمه‌.

له‌ باوه‌ت خه‌ڵاته‌گه‌ى سه‌رۆكایه‌تى وه‌زیره‌یل ئه‌را ئه‌و خێزانه‌یله‌ ك هاتنه‌سه‌وه‌، ئه‌وه‌یشه‌ هیمان وه‌ده‌سم نه‌كه‌فتیه‌ چوینكه‌ وه‌زاره‌ت كووچكه‌ره‌یل داواى (قه‌ید نفووس موره‌قه‌ن) له‌ لیمان كه‌ید و فه‌رمانگه‌ى جنسیه‌یش قه‌بوول نیه‌كه‌ید به‌یده‌ى پیمان وه‌مه‌هانه‌ى لاوردن (ته‌رقین) له‌ بان (سجل)ـه‌گانمان، و ئیسه‌ ئیمه‌ كه‌فتیمنه‌سه‌ گیژاوه‌ى ناوبه‌ین ئى دو فه‌رمانگه‌.

له‌ باوه‌ت كاركردن و نیشته‌جابوین ئویشى:ئیسه‌ من ڕووژانه‌ حه‌ماڵى كه‌م له‌ باركردن و داگردن بار ئاسن له‌ یه‌كیگ له‌ عه‌مباره‌یل فرووشتن ئاسن له‌ نزیك مسرح الخیمه‌ له‌ جاده‌ى فلستین، و شه‌وانه‌یش حه‌ره‌سى گرم.

كێشه‌ى ئى جایڵ جوانه‌ یه‌كم كێشه‌ نیه‌ و دویا كێشه‌یش نیه‌ و سه‌دان حاڵه‌ت تره‌ك هه‌س له‌ى جووره‌ و هه‌زاران خێزانیش هیمان ئه‌را عیراق نه‌هاتنه‌سه‌وه‌ له‌ ترس ئى قانوونه‌یله‌ ك كارا نه‌كریانه‌.

 

فه‌ره‌یدون كه‌ریم مه‌له‌ك