ئبتهال ته‌وفیق:له‌وه‌ر ڕه‌خنه‌ى كوومه‌ڵگه‌، له‌ناوماڵ ڕه‌سم كه‌م

شفق نيوز

ئازادى وڵات و پیشكه‌فتن كوومه‌ڵگه‌ له‌ گشت بواره‌یل ژیان، ژنه‌یل شار خانه‌قنیش له‌ى باوه‌ته‌ خاوه‌ن ئه‌زموون گه‌ورایگن و هه‌میشه‌ هه‌وڵدانه‌ له‌ ڕزه‌یل نوا بوون و ده‌یان كه‌سایه‌تى ژن هه‌ڵكه‌فتى له‌ى شاره‌ ناو ده‌ركردنه‌ و وه‌ ئه‌وپه‌ڕ جوانى نه‌خش و ده‌ور خوه‌یان له‌ كاروان ژیان دینه‌... هونه‌ر شیوه‌كارییش یه‌كیگه‌ له‌و بواره‌یله‌ ك هونه‌رمه‌نده‌یل خانه‌قین وه‌جوانى ده‌س باڵاى خوه‌یان له‌ ئاست ناوخوه‌یى و نیشتمانى و جه‌هانییش نیشان دانه‌ و ده‌یان هونه‌رمه‌ند شیوه‌كار ناودار ناو خوه‌یان و شاره‌گه‌یان وه‌ جه‌هان ئاشنا كردنه‌...

شه‌فه‌ق ئه‌را زیاتر ڕووشنایى خستن وه‌بان ئى هونه‌ر و ئى هونه‌رمه‌نده‌یله‌ و وه‌تایبه‌تى هونه‌رمه‌نده‌یل ژن سه‌ردان په‌یمانگاى هونه‌ره‌ جوانه‌گان خانه‌قین كرد و له‌ورا بویه‌ میوان هونه‌رمه‌ند ئبتهال ته‌وفیق عه‌بدولڕه‌زاق ك یه‌كیگه‌ له‌ هونه‌مه‌نده‌یل چالاك و مامۆستاس‌ له‌و په‌یمانگا، له‌ سه‌ره‌تا داوا له‌لى كردیمن خوه‌ى وه‌ میوانه‌یل ماڵپه‌ڕه‌گه‌مان بناسنێد و ئه‌ویش وت:

ناو ته‌واوم: ئبتهال ته‌وفیق عه‌بدولڕه‌زاق، له‌ ساڵ 1972 له‌ شار خانه‌قین هاتمه‌سه‌ دونیا، و خوه‌ندن سه‌ره‌تایى و ناوه‌ندى و دویاناوه‌ندییش هه‌ر له‌و شاره‌ ته‌واوكردمه‌، هه‌ر له‌ سه‌ره‌تاى مناڵیمه‌وه‌ حه‌ز له‌ هونه‌ر ڕه‌سمكردن كردمه‌ و باوگم فره‌ هانمدایه‌ ئه‌را زیاتر بایه‌خداین وه‌ى هونه‌ره‌، و منیش له‌ هه‌رچى چالاكى هونه‌ریه‌ ك له‌ مه‌دره‌سه‌یل سه‌ره‌تایى و ناوه‌ندى و دویاناوه‌ندیه‌ به‌شدارى داشتمه‌ و چه‌ن خه‌ڵاتیگ و چه‌ن هه‌وڵیش دام ئه‌رائه‌وه‌گ له‌ ئه‌كادیمیاى هونه‌ره‌یل جوان قه‌بوول بكریه‌م؛ وه‌لى ده‌رفه‌ت ئه‌رام هه‌ڵنه‌كه‌فت، و چویمه‌ په‌یمانگاى پزیشكى 1992 و له‌ شوون ئه‌وه‌یش په‌یمانگاى مامۆستایه‌یل ته‌واوكردم1997، وه‌لى واز نه‌هاوردم له‌ هه‌وڵداین ئه‌را خوه‌نین هونه‌ر وه‌شیوه‌یگ ئاكادیمى تا له‌ ئاخره‌و له‌ ساڵ 1999 له‌ ئاكادیمیاى هونه‌ره‌یل جوان له‌ به‌غدا قه‌بوول كریام و به‌ش شیوه‌كارى و ڕه‌سم ته‌واوكردم، و ئیسه‌یش مامۆستام له‌ په‌یمانگه‌ى هونه‌ره‌یل جوان له‌ شار خانه‌قین و ئه‌ندامم له‌ سه‌ندیكاى هونه‌رمه‌نده‌یل عیراق و له‌ كوومه‌ڵه‌ى شیوه‌كاره‌یل لق به‌غدا و ئه‌ندام سه‌ندیكاى هونه‌رمه‌نده‌یل دیاله‌ و سه‌ندیكاى هونه‌رمه‌نده‌یل كوردستان و ئه‌ندامیشم له‌ ده‌زگاى Trjj كه‌نه‌دى.

… ئبتهال ته‌وفیق له‌ تابلۆگانى زیاتر بایه‌خ داسه‌ گوڵ و له‌ى باوه‌ته‌ ئویشید:"گوڵ جوانترین به‌شه‌ له‌ سروشت و من ئویشم گوڵ و ژن وه‌كو یه‌كن، و چوینكه‌ گوڵ به‌شه‌ جوانه‌گه‌ى سروشته‌ و سروشتیش ئه‌را من ژیانه‌ و من چمه‌ ناو جه‌رگه‌ى سروشت و وه‌لیه‌و تیكڵا بووم و بوومه‌ یه‌كیگ له‌ به‌شه‌گانى تا سڕ یا ڕازه‌گانى فاش بكه‌م و ئه‌را ته‌ماشاكه‌ر له‌ تابلۆگانم شییه‌وبكه‌م وه‌شیوه‌یگ هونه‌رى ك له‌ مه‌غز هونه‌رمه‌ندیگه‌وه‌ هاتیه‌ و ڕه‌سنیده‌مه‌ ئه‌و ئامانجه‌ ك له‌ تابلۆگانم خستمه‌سه‌یانه‌ ڕوى پارچه‌گه‌.

له‌باوه‌ت چوینیه‌تى ده‌سوه‌پیكردن كاروان هونه‌رى ئبتهال ته‌وفیق وه‌ل هونه‌ر ڕه‌سمكردن و شیوه‌كاریه‌وه‌ ئویشى:"من هه‌ر له‌ مناڵیه‌و فره‌ حه‌زكردیام له‌ ڕه‌سم كردن و له‌سه‌ره‌تا ڕه‌سم غه‌رازه‌یل ناو ماڵ كردیام و ئنجا هه‌وڵدیام ڕه‌سم ئه‌و میوانه‌یله‌ بكه‌م ك هاتیانه‌ سه‌ردان ماڵمان، و له‌و وه‌خته‌ باوگم، وه‌ختى ته‌ماشاكرد من حه‌ز له‌ى هونه‌ره‌ كه‌م، فره‌ هانم دا ئه‌را وه‌رده‌وامبوین تا چویمه‌ مه‌دره‌سه‌ى سه‌ره‌تایى و له‌ى قوناغه‌ ئه‌را یه‌كم به‌شدارى كردم له‌ پیشانگاى ڕه‌سم".

له‌باوه‌ت ئه‌و هونه‌رمه‌نده‌یله‌ ك كاریگه‌رى یا ته‌ئسیر داشتنه‌ له‌بان ڕێباز هونه‌رى ئبتهال ته‌وفیق ئویشى:"من شێواز هونه‌رى تایبه‌ت وه‌خوه‌م هه‌ڵوژانمه‌ و له‌ ڕه‌سمه‌گانم فڵچه‌ و چه‌قوو وه‌كار تیه‌رم وه‌ل ئه‌و كه‌ره‌سته‌گانتر هونه‌ر شیوه‌كارى و هویچ هونه‌رمه‌ندیگ كاریگه‌رى ڕاسه‌خۆ له‌بانم نه‌یاشتیه‌، وه‌لى من خوه‌م حه‌زكه‌م له‌ كاره‌گان هونه‌رمه‌نده‌یل مه‌حه‌مه‌د مهره‌دین و سیروان باران و سامر داود سوودانى".

له‌باوه‌ت ئه‌و مه‌دره‌سه‌ى هونه‌ریه‌ ك ئبتهال ته‌وفیق په‌یڕه‌ویى كردیه‌ ك وه‌ تابلۆگانیه‌و دیاره‌ مه‌دره‌سه‌ى ئنتباعییه‌ ئویشى:" من تا ڕاده‌یگ په‌یڕه‌وى مه‌دره‌سه‌ى ئنتباعى كه‌م وه‌لى له‌ى ماوه‌ى دویاییه‌ تابلۆگانم وه‌ره‌و ئنتباعى ته‌جریدى چن و شایه‌ت له‌یه‌ولا وه‌ره‌و ڕێباز و مه‌دره‌سه‌یلیگتر بچم".

له‌ باوه‌ت دیدگاى كوومه‌ڵگه‌ ئه‌را هونه‌رمه‌ند ژن ئویشى:" كوومه‌ڵگه‌ى  خوه‌مان وه‌ ئاسانى وه‌ئه‌قلیه‌و نیه‌چوود ك ژن هونه‌رمه‌ندیش وه‌ ئازادى بتویه‌نید كاره‌یل هونه‌رى ئه‌نجام بیه‌ید، له‌وه‌ر ئه‌وه‌ من زوورمى كاره‌گانم یا له‌ ناو غورفه‌ى ڕه‌سمكردن ته‌واویان كه‌م یا له‌ ناو باخچه‌ى ماڵه‌گه‌مان و له‌وه‌ر دیدگاى كوومه‌ڵگه‌ و ڕه‌خنه‌ یا ئنتقاد مه‌ردم".

له‌لى پرسیمن چه‌ن پێشانگاى تایبه‌ت و له‌ چه‌ن پێشانگا به‌شدارى كردیه‌ و ئه‌ویش له‌ى باوه‌ته‌ ئویشى:"من تا ئیسه‌ سێ پێشانگاى شه‌خسى داشتمه‌، یه‌كمیان له‌ شار خانه‌قین له‌ ساڵ 2004 و دویم له‌ شار باقوبه‌ له‌ ساڵ 2005 و سێیمیش هه‌ر له‌ شار خانه‌قین له‌ ساڵ 2008؛ ئه‌وه‌ بیجگه‌ به‌شدارى كردنم له‌ زیاتر له‌ 40 تا 45 پیشانگاى هاوبه‌ش، و دیاریترین تابلۆگانم تابلۆیگه‌ (ته‌جریدى گوڵ) و ئیسه‌یش وه‌رده‌وامى دامه‌سه‌ هونه‌ره‌گه‌م و شێواز ته‌جریدى نوو وه‌كار تیه‌رم.

له‌ یه‌كیگ له‌ پێشانگایه‌یلم ڕه‌خنه‌گر عیراقى ناودار موئه‌یه‌د به‌صام ده‌سخوه‌شى فره‌یگ له‌لیم كرد هه‌رله‌یوا قاسم سه‌بتى به‌ڕێوه‌به‌ر كوومه‌ڵه‌ى شیوه‌كاره‌یل عیراقى ستایش كاره‌گانم كرد و یه‌یشه‌ مایه‌ى شانازیه‌ ئه‌رام و حه‌ز كه‌م ئاماژه‌یش وه‌وه‌ بكه‌م ك به‌شدارى كردمه‌ له‌ پێشانگاى هونه‌رى هاوچه‌رخ عیراقى له‌ وڵات قه‌ته‌ر وه‌ چه‌ن تابلۆیگ و له‌ورا خه‌ڵات داهێنان و به‌ڵگه‌نامه‌ى ڕێزلێنان یا ته‌قدیرى وه‌رگردمه‌.

 

دیدار/ ماجد سوێره‌مێرى