گه‌رمتر له‌ دووزه‌خ داعش!

شفق نيوز

زه‌مانه‌ی زوی له‌ سه‌رده‌م حوكمڕانی كوماری و فه‌رمانڕه‌وايی به‌عس، وه‌ په‌ڵپ و مه‌هانه‌يل جياخوازی، سته‌م ئاشكرايگ له‌ليمان كريا تا كار ره‌سيه‌ جينۆسايد، ئمجا سه‌رده‌م تازه‌و حوكمڕانی ديموكراسی و فريه‌يی و فيدراڵی هيمان نه‌تويه‌نستگه‌ خه‌ياڵمان له‌ دوباره‌بوينه‌وه‌ی ئه‌و مێژوو مه‌رگ و له‌ناوبردنه‌ ئاسووده‌ بكا، هه‌ر له‌وه‌ر ئه‌وه‌يش ئاساييه‌ ئه‌گه‌ر له‌ لێدوان سياسييگ قسه‌ نه‌رميش گومان داشتويم.

له‌شوون رميان به‌عس، له‌بار جياواز و له‌خاك و سه‌رده‌م جياواز، مه‌ترسی له‌تبوين عراق يا ئه‌كريه‌يده‌ مه‌هانه‌ی دروسكردن قه‌يران يا جوور ماده‌يگ ته‌سويقی سياسی نه‌ف له‌لی وه‌رگيريه‌يد، ئه‌ويش وه‌بی ئه‌وه‌ك ده‌سڵات و ده‌وڵه‌ت عراق هوير بخاده‌ لای، دی مقه‌يه‌تيكردن له‌ يه‌كێتی عراق و عراقيه‌يل وه‌رپرسيارێتييگ ده‌ستووری و ئه‌خلاقی ده‌وڵه‌ته‌ وه‌رجه‌ هاووڵاتی، وه‌ل ئه‌وه‌يشا وه‌رپرسيارێتی زوورمينه‌ی سياسی و مه‌زه‌وی فه‌رمانڕه‌وای هه‌ڵوژرياگ ك هه‌وڵ مقه‌يه‌تيكردن ئی عراقه‌ بيه‌يد و هه‌ر خود دزينه‌وه‌يگ له‌و وه‌رپرسيارێتيه‌ وه‌ هه‌ر مه‌هانه‌يگ ئه‌دێده‌ هووكار ناسه‌قامگيری سياسی و ناكووكی و زه‌مينه‌ خوه‌ش ئه‌كا ئه‌را ستراتيجيه‌ت به‌شبه‌شه‌وبوين وڵاته‌گه‌.

له‌يرا بنه‌مای مه‌سه‌له‌گه‌ ئه‌وه‌سه‌ ك عراق له‌ وه‌خت دروسبوينيه‌و مانايه‌يل جيايی و به‌شبه‌شه‌بوين وه‌ل خوه‌يا هه‌ڵگرتگه‌، چوينكه‌ ئی وڵات و ده‌وڵه‌ته‌ وه‌ ئاره‌زوو ره‌زامه‌نی مه‌ردمه‌گه‌ی دروس نه‌ويه‌، ك وه‌و خاتريشه‌ وه‌رجه‌ ديموكراسی وه‌ زوور زوورداری مقه‌يه‌تی له‌ يه‌كێتيه‌گه‌ی كرياگه‌و دويای ديموكراسييش بريار بوی وه‌ ڕازيبوين و ڕازيكردن مقه‌يه‌تی بكريه‌يد، وه‌ پابه‌ندبوين وه‌ ده‌ستوور و ريككه‌فتنه‌يل، وه‌لی ئه‌وه‌يش ئه‌نجام نه‌درياو چه‌واشه‌گه‌ی عراق ره‌سانه‌ ئی حاڵه‌ت سه‌خته‌.

ئيسه‌ به‌ش فريه‌يگ له‌ خاك عراق ها ده‌س داعش و ده‌وڵه‌ت له‌تی دامه‌زرانگه‌، وه‌لی هيمان هويچ كه‌سيگ له‌ چينه‌يل سياسی عراق جورئه‌ت ئه‌وه‌ نه‌كردگه‌ وه‌ ئاشكرا وه‌پيمان بويشيد داعش هاتگه‌و عراق وه‌ كرده‌وه‌ له‌تله‌ته‌و كردگه‌و دووزه‌خ له‌بان زه‌وی به‌رپا كردگه‌، ك شايه‌ت له‌و دووزه‌خيشه‌ گه‌رمتر و خراوتريش بايده‌ وجوود.

سه‌ربه‌ست جهاد

ج . أ