كورد خه‌ریك ماڵه‌ نه‌ك ماڵه‌قلى!!

شفق نيوز

 

ئیمه‌ له‌ى باوه‌ته‌ باس له‌ وڵات ناونى دوچه‌مان كه‌یم ك خاوه‌ن تاریخیگ خویناوى و كوده‌تایه‌یل وه‌رده‌وام بویه‌ وه‌تایبه‌ت له‌سه‌رده‌م شا فه‌یسه‌ڵ یه‌كه‌م بگر تا ره‌سیه‌ رژیمه‌ سته‌مكاره‌گه‌ى سه‌دام حسێن ك له‌ 9/4/ 2003 وه‌ په‌لامار هیز هاوپه‌یمانه‌یل ك پیكهات له‌ ده‌یه‌ها ده‌وڵه‌ت وه‌ سه‌ركردایه‌تى وڵاته‌یل یه‌كگرتگ ئه‌مریكا رمیاو ته‌خت و به‌ختى شیویا.

عراق ئه‌و وڵاته‌سه‌ ك هه‌رچه‌نى پیكهاتگه‌ له‌ ره‌گه‌ز و نه‌ته‌وه‌یل جوراوجوور ، له‌وانه‌یش عه‌ره‌ب، كورد، توركمان، كلدوئاشوور، مه‌سیحى..هتد، وه‌لى له‌لایه‌ن وڵاته‌یل عه‌ره‌بى و سه‌ركرده‌و شۆفێنیه‌یل ئیسه‌ هه‌ر وه‌ عراق عه‌ره‌بى ناسریاگه‌و یه‌یش دڵگرانى و ناڕه‌زاییگ له‌لاى ملله‌ت كورد دروس كردگه‌ ك دویه‌مین نه‌ته‌وه‌و پیكهاته‌س له‌ڕوى شماره‌و قه‌واره‌، ك یه‌یش ماناى وه‌ زوور لكانن و ناچاركردنه‌و له‌ڕوى هه‌قه‌یلیشه‌و كورد مامڵه‌ى یه‌كسانى وه‌لیا نه‌كریاگه‌و ته‌نانه‌ت ئه‌فسه‌ر و سه‌ربازه‌یلیشى له‌ناو سوپا وه‌ گووره‌ى سه‌نگ و قورسایى هساو دادگه‌رانه‌ ئه‌رایان نه‌كریاگه‌ له‌وه‌رگرتن پۆست و هه‌ق ره‌فتار و به‌شداریكردن، ك وه‌ل ئه‌وه‌یشا وه‌رده‌وام حكوومه‌ت ناوه‌ندى خه‌ریك له‌شكركیشیه‌ ئه‌را ناوچه‌یل كوردنشین وه‌تابیه‌ت ناوچه‌یل كوردستانى ده‌یشت هه‌رێم و هیمان جیوه‌جیكردن مادده‌ى 140 ده‌ستووریش له‌شوون خوه‌ى ته‌كان وه‌پى نه‌دریاگه‌و كیشمه‌كیش مه‌سه‌له‌ى نه‌فت و غاز و كاركردن كومپانیایه‌یل بیگانه‌یش خاڵیگ تر جیاوازى ناونى هه‌ولێر و به‌غداس.

ئنجا دوینید وه‌ل ئه‌وه‌یشا هه‌رێم كوردستان وه‌رده‌وام هه‌وڵ ئاوه‌دانى و خزمه‌تگوزراى ده‌یدو په‌یوه‌ندیه‌یل ستراتیجى دروس ئه‌كا وه‌ل ده‌وڵه‌ته‌یل هاوساو جه‌هانى ئه‌را مه‌سه‌له‌ى وه‌به‌رهاوردن له‌ بواره‌یل جیاجیاو ئاشناكردن مه‌ینه‌تیه‌یل و جینۆساید كورد وه‌گشت وڵاته‌یل جه‌هان وه‌خاتر دوباره‌ نه‌كرنه‌وه‌ى ئه‌و كاره‌سات و رویداگه‌یله‌ ك بویه‌ مایه‌ى له‌ناوبردن هه‌زاران روڵه‌یل بیتاوان ملله‌ت كورد و بیجگه‌ داگیركردن خاك و ئاوه‌گه‌ى و كاولكردن شار و ئاوایه‌یلى وه‌ دریژایى ساڵه‌یل فره‌یگ ، ئنجا له‌ى بار سه‌خت و پڕ له‌ شوونه‌وار كاولكاریه‌ ك ئیسه‌ هاته‌سه‌ بان ناوچه‌گه‌و عراق وه‌تایبه‌ت، خوه‌شبه‌ختانه‌ هه‌رێم كوردستان تویه‌نست له‌ساى ئاسایش و سه‌قامگیرى په‌ره‌ بیه‌یده‌ پیشكه‌فتن و بنیاتناین و حاڵه‌ت خاسیگ له‌ خوه‌شگوزرانى و ئارامى باریده‌ وجوود و كومپانیایه‌یل بیگانه‌ وه‌ ئاسووده‌یى بتویه‌نن كاره‌یل وه‌به‌رهاوردن له‌ هه‌رێم ئه‌نجام بیه‌ن، وه‌لى جى داخه‌ مه‌ردمانیگ هه‌ن له‌ خود كورد هویر له‌ ئاینده‌ى كورد و كوردستان ناكه‌ن و باوه‌ڕ وه‌ بنیاتناین و سه‌روه‌خوه‌یى كورد نه‌یرن و هه‌ر له‌وه‌ر ئه‌وه‌یش بوینه‌سه‌ سه‌رچه‌وه‌ى تێكداین و له‌باربردن ئه‌زموون چه‌ن ساڵه‌ى كوردو به‌رژه‌وه‌ندى باڵاى ملله‌تیش له‌وه‌رچه‌و ناگرن و هه‌ر خه‌ریك ناونیتگ و سووكایه‌تیكردنن وه‌ سه‌ركرده‌و خه‌مخوه‌ره‌یل كوردستانه‌گه‌مان، وه‌ل ئه‌وه‌یشا نوڕید بڕیگ له‌ كه‌ناڵه‌یل ره‌سانن و میدیایه‌یل كوردییش وه‌رده‌وام هانه‌ هه‌وڵ ئه‌وه‌ تویه‌م بوغز و كینه‌ت له‌ناونى لایه‌نه‌یل بكاڵن و له‌ مه‌شق پیشه‌یى و ئنسانیه‌ت لادانه‌و ڕى به‌دڕه‌فتارى گرتنه‌سه‌ وه‌ر ئه‌را كیشانن مه‌ردم وه‌ره‌و لاى كیشمه‌كیش و دژایه‌تیكردن یه‌كترى و هویچ خه‌یریگ وه‌ى ملله‌ت سته‌مدیده‌ى كورده‌ ناخوازن، هه‌ر له‌وه‌ر ئه‌وه‌یش وه‌و كه‌سه‌یله‌ ك هویره‌و له‌ ئاینده‌ى ملله‌ته‌گه‌مان ناكا ئویشیم: ئه‌راچه‌ باوه‌ڕ وه‌ هه‌وڵ و خه‌بات نه‌یرین و له‌وه‌رچه‌ هه‌میشه‌ له‌ شانیه‌ت ئه‌ى و ئه‌و كه‌مه‌و كه‌ین له‌وه‌ختیگ ك ئمڕوو كورد له‌وه‌رده‌م ده‌رفه‌ت خاسیگ وسیاگه‌ ئه‌را دروسكردن ماڵ راسكانى نه‌ك ماڵه‌قلى ؟ جواو ئى پرسیاریشه‌ هه‌وه‌جه‌ وه‌ وژدان پاك و بیگه‌ردیگ دیرید.

جه‌ماڵ ئه‌ركه‌وازى