عراق و سوريا، سێگووشه‌ى مه‌رگ وخوين

شفق نيوز

له‌باوه‌ت عراقيشه‌و ليژنه‌ى ماف ئاده‌ميزاد ئه‌نجوومه‌ن نوێنه‌ره‌يل عراقى شماره‌ى كوشياگه‌يل عراقى وه‌ 112 هه‌زار كه‌س مه‌زه‌نه‌ كردگه‌ له‌وساوه‌ ك ئه‌مريكيه‌يل هاتنه‌سه‌ ناو خاك عراق و مليۆنيگ و 600 هه‌زار كه‌سيش ئاواره‌ى وڵاته‌يل جه‌هان بوينه‌و نزيكه‌ى 4500 كه‌سيش كوشياگ بى ناسنامه‌ بوينه‌ وه‌گووره‌ى راپۆرت يۆنامى، وه‌ل ئه‌وه‌يشا ئاماژه‌يش ئه‌را كوشيان 20 هه‌زار ئه‌مريكى ئه‌كريه‌يد له‌ سه‌رباز و مه‌ده‌نى و فه‌رمانبه‌ره‌يلى له‌ 2003 تا ئيسه‌.

تائيسه‌يش كوشتار له‌ عراق و سوريا وه‌رده‌وامه‌، ته‌نيا هووكاره‌گه‌ى يه‌ك چشته‌، ك ئه‌ويش له‌ ماوه‌ى 35 ساڵه‌ى حوكمڕانى حزب به‌عس له‌ى هه‌ردوگ وڵاته‌ ئى ئايدۆلۆجيه‌ ئه‌يه‌ به‌رهه‌مه‌گه‌ى بويه‌.

ئه‌گه‌ر ته‌ماشاى ميرنشينى ئيمارات عه‌ره‌بى بكه‌يم جوور نموونه‌، له‌ساڵ 1959 بڕيگ له‌ شێخه‌يل سه‌ر وه‌ هووزه‌يل جياجياى ئه‌و وڵاته‌ يه‌كه‌و گرتن و له‌ساڵ 1971 ئه‌و وڵاته‌ دامه‌زرانن، ئمجا ئه‌ڵڵاجه‌وى ها له‌ورا ئه‌و وڵاته‌ ك دامه‌زرياگه‌ ناكووكى سياسى له‌تى روى نه‌ياگه‌و ته‌نيا 20% ئيماراتيه‌يل له‌و وڵاته‌ وجوود ديرن و باقى مه‌ردمه‌گه‌ى له‌ گشت وڵاته‌يل پيشكه‌فتگ خه‌ريك بازركانى و په‌يوه‌نديين له‌ بوار سياسى و ئابووريه‌و.

وه‌ل ئه‌وه‌يشا پيشكه‌فتن ميرنشينى عه‌ره‌بى وه‌ قسه‌ تاريف ناكريه‌يد، ئه‌وان له‌ناو پارچه‌يگ بياوان وشك و لماوى وڵاته‌گه‌ى خوه‌يان دامه‌زرانن ك ئيسه‌ ركابه‌رى بازرگانى وه‌ل ئۆرپاو ئه‌مريكا ئه‌كا.

يه‌يش عراقه‌ ك چه‌نه‌ها ده‌يه‌س خه‌ريك شكه‌ست له‌ شوون شكه‌سته‌، عراقيگ ته‌نيا هويرى ها لاى چه‌وساننه‌وه‌و داگيركارى، وڵاتيگ ناشرينه‌ وه‌ تايفه‌گه‌رى و ره‌گه‌زپه‌رسى و هساو نه‌كردن ئه‌را كه‌مينه‌و زوورمينه‌يل تر.

سوريايش مه‌رز خوه‌ى وه‌ل عراق هاولف كرد، ئه‌ويش نه‌ك وه‌ ئابوورى و گه‌شت وگوزار، به‌ڵكوو وه‌ هاورده‌كردن جه‌نگ و كوشتار. ئمجا ئى هه‌مگه‌ به‌راورده‌ ته‌نيا نيشانداين نه‌وين سه‌ركردايه‌تييگ ئدارى بته‌وه‌ له‌ى ناوچه‌، ك هه‌ر له‌وه‌ر ئه‌وه‌يشه‌سه‌ هه‌ر خوين تكيه‌يد و رشيه‌يد و كوشتار روى ئه‌ياد.

کەنعان بەهادین

ج . أ