گرنگى و نه‌خش ره‌سانن له‌ بڵاوه‌وكردن ئاشتى و هووشیارى رووشنهویرى

شفق نيوز

وه‌تایبه‌ت دویاى په‌یابوین ئه‌نته‌رنێت ك گشت جه‌هان كردگه‌سه‌ ئاوایى بویچگیگ.

 

ره‌سانن ئه‌و جامه‌ك راسكانیه‌سه‌ ك تواناى ده‌رخستن رویداگ و كیشه‌و كاره‌یل جوراوجوو دیرید له‌ كوومه‌ڵگاو ده‌زگایه‌یل حكوومى و مه‌ده‌نى، هه‌ر له‌وه‌ر ئه‌وه‌یش بایه‌سه‌ ره‌سانن به‌رز و پیرووز بوود ئه‌را خزمه‌ت كوومه‌ڵگاو ئاده‌میزاد.

 

ره‌سانن هه‌ر له‌ زویه‌و كاریگه‌ شه‌كه‌تى وه‌ بوونه‌ى ئه‌و مه‌ترسیه‌یل گه‌ورا ك ها چوارچیوه‌ى ئى پیشه‌و له‌وانه‌یش یاسایه‌یل سه‌خت ك مه‌رز ئازادى ڕاده‌رخستن دیارى ئه‌كاو هه‌ڕه‌شه‌ له‌ فكرمه‌ن و نویسه‌ره‌یل ئه‌كا وه‌ سزاو جورمداین پویلى فره‌، یه‌یش بیجگه‌ ئه‌وانه‌ك وه‌رگه‌ى ره‌خنه‌و ئامووژگارى و رینمایى ناگرن و باوه‌ڕ نه‌یرن وه‌ راى مه‌ردمان تر.

 

ئازادى جوور مه‌رج یه‌كه‌م و بنه‌ڕه‌تیه‌ ئه‌را تواناداین وه‌ ره‌سانن و رووژنامه‌گه‌رى تا بتویه‌نید كاراو كاریگه‌ر بوود له‌ هه‌ڵسووكه‌فت و كه‌سایه‌تى ئاده‌میزاد وه‌ره‌و كار خه‌یر و پیشكه‌فتن له‌ گشت بواره‌یل وه‌تایبه‌ت بوار سیاسى و رووشنهویرى و كوومه‌ڵایه‌تى و ژیارى، هه‌ر له‌وه‌ر ئه‌وه‌یش بایه‌سه‌ ره‌سانن نه‌خش چه‌ودیرى وه‌رگرید وه‌گشت باوه‌ڕ ته‌واویگ بیجگه‌ نه‌خش گه‌وراى له‌ بڵاوكردن هوشیارى رووشنهویرى و كوومه‌ڵایه‌تى و ژیارى وه‌گووره‌ى ره‌سینه‌وه‌ى له‌ گشت رووشنهویرى و ژیاره‌یل جه‌هان له‌بان دا ب و نه‌ریت كوومه‌ڵگایه‌یل و پیشكه‌فتن و ئاڵشتكاریه‌یل تازه‌.

 

كار خواستیگه‌ ك ئامانج ره‌سانن وه‌رگیریكردن بوود له‌ هه‌قه‌یل و هه‌وه‌جه‌ى ئاده‌میزاد ئه‌را كاره‌یل خزمه‌تگوزارى جوراوجوور. له‌یرا به‌یه‌سه‌ له‌بان پیاوه‌یل ره‌سانن له‌ بان بنه‌ماى دادگه‌رى و كرده‌وه‌ى خاس كار بكه‌ن و بگه‌ردنه‌ شوون راسیه‌یل ك هه‌رچه‌نى قوربانییش ئه‌ڕاى دانه‌و بایه‌سه‌ له‌بان نویسه‌ر و فكرمه‌ن و توێژه‌ر و ره‌خنه‌كار ك وه‌ باوه‌تیانه‌و دقه‌ته‌و كاره‌یل خوه‌یان ئه‌نجام بیه‌ن له‌ڕى تواناو ئازایى و ئه‌خلاق په‌سه‌ن و تواناى به‌رز له‌ گوزارش و داهینان و پاكى له‌ نویسانن باوه‌ته‌یل و له‌وه‌رگرتن ڕى و شوون خاس و ده‌سكه‌فتن زانیارى راسكانى وه‌بى زیایكردن یا كه‌مه‌وكردن له‌لى.

 

شووڕش ته‌كنۆلۆجى ره‌سانن ئاسمانى له‌بان تووڕ ئه‌نته‌رنێت بویه‌ مایه‌ى ئاسانه‌وكردن فره‌یگ له‌ كاره‌یل زانستى و رووشنهویرى و ژیارى جوراوجوور و بویه‌ مایه‌ى فراوانبوین شووڕش ماریفى و زانیارى له‌ جه‌هان. ئنجا له‌ وڵاته‌یل جه‌هان جوور ستوین گرنگ و بنه‌ڕه‌تییگ نوڕنه‌ ره‌سانن ئه‌را په‌ره‌داین وه‌ رووشنهویرى و ماریفه‌ت له‌ كوومه‌ڵگا، هه‌ر له‌وه‌ر ئه‌وه‌یش پشتگیرى ماددى و مه‌عنه‌وى ده‌زگایه‌یل ره‌سانن و نویسه‌ر و فكرمه‌نه‌یلیان كه‌ن.

 

دویاخریش ئومیده‌واریم ره‌سانن و رووژنامه‌یلمان وه‌ خاستر و كاراتر بوینیم و كاریگه‌رى داشتوود له‌بان هوشیارى سیاسى و رووشنهویرى و ژیارى  و ئارامه‌ه‌وكردن باره‌یل سیاسى له‌ى عراق زه‌خمداره‌ ك ملله‌ته‌گه‌ى تویش به‌دبه‌ختى و مه‌ویسى هات و خوین فره‌یگ له‌ئاكام جه‌نه‌گ و كرده‌وه‌یل ترۆریستى له‌تى رشیا، ك بایه‌سه‌ له‌بان ره‌سانن و رووژنامه‌یلمان به‌شدارى جددى بكه‌ن له‌ چاره‌سه‌ر كیشه‌و ناكووكیه‌یل و پیشنیار چاره‌سه‌ر گونجیاگ بكه‌ن وه‌ گووره‌ى وژدان ئنسانى و نیشتمانى و ڕوى وه‌ روى گشت سته‌م و زوڵمیگ بوونه‌و قسه‌ى خوه‌ى وه‌ هه‌ق بكا له‌وه‌ر خاتر چاره‌سه‌ر كیشه‌یل وه‌ زووان ئه‌ده‌ب و ئه‌قڵانیه‌ت و ئنسانیه‌و، وه‌ل ئه‌وه‌یشا بایه‌سه‌ هان ده‌وڵه‌ت و حكوومه‌ت عراقى بیه‌ید وه‌ره‌و بنیاتناین و په‌ره‌داین وه‌ كشتوكاڵ و پیشه‌سازى و به‌رزه‌وكردن ئاست ته‌ندروسى و رووشنهویرى و بڵاوكردنه‌وه‌ى ئاشتى و ئاسایش له‌ جیاى جه‌نگ و كوشتن و ڕخه‌وبردن و ورسگى و ماڵویرانى.

 

قاسم مه‌نده‌لاوى

 

ج. ا