هونه‌رمه‌نده‌يل له‌ ماڵ كورد گرده‌و بوون

شفق نيوز

سه‌عات 10:30 ده‌قيقه‌ ، وه‌ئاماده‌ بوين شماره‌يگ فه‌ره‌ له‌ هونه‌رمه‌نده‌يل و كه‌سايه‌تيه‌يل سياسی و رووشنهويری و شماره‌يگ له‌ رووژنامه‌نويسه‌يل ، كۆڕيگ له‌ژير ناونيشان (  هونه‌ر كوردى ئه‌و په‌ڕ كاركردنه‌ ) له‌ باره‌گای ده‌زگای رووشنهويری و ره‌سانن كورده‌يل فه‌يلی له‌ به‌غدای پايته‌خت وه‌ڕيه‌و چوی. سه‌ره‌تا كۆڕه‌گه‌ وه‌ ده‌قيقه‌يگ وسيان ئه‌ڕا خوين پاك شه‌هيده‌يل ده‌س وه‌پی كرد و له‌ دويای وه‌خه‌ير هاتن كردن ميوانه‌يل و ئاماده‌بويه‌يل‌ له‌ لايه‌ن رێكخه‌ره‌يل كۆڕه‌گه‌ وه‌ناو رێكخرياگ ماڵ كورد و ده‌زگای شه‌فه‌ق ، هونه‌رمه‌ند حوسێن ماێخان سه‌ره‌ڕای ده‌سخوه‌شی كردنی ئه‌را به‌رپايی ئه‌ی كۆڕه‌ وته‌يگ پێشكه‌ش كرد و  له‌ وته‌گه‌ی باس كوڵيگ له‌باره‌ی مێژووی هونه‌ر وه‌ گشتی و هونه‌ر كوردی وه‌ تايبه‌ت كرد. دوياتر هونه‌رمه‌ند ده‌نگخوه‌ش فه‌رهاد حه‌سه‌ن ك يه‌گيگه‌ له‌ گورانی چڕه‌يل ناسرياگ له‌لای كورده‌يل نيشته‌جای به‌غدا، باس‌ هونه‌ر موسيقا كردو وت: هونه‌ر به‌هره‌يگه‌ ك له‌ وژدان و دروين  بنياده‌م سه‌رچاوه‌ ئه‌گرێ و ملله‌ت كورديش وه‌ دريژايی مێژوو هونه‌رمه‌نده‌يل گه‌ورایگ له‌ گشت بواره‌يل هونه‌ری پێشكه‌ش وه‌ دونيای هونه‌ر كردێه و له‌ روی هونه‌ريه‌وه‌ يه‌كيگه‌ له‌ ده‌وڵه‌مه‌نترين ملله‌ته‌يل دونياو هه‌رلێوا ئاماژه‌ وه‌ ئه‌و زوڵم و زووره‌يله‌ كرد ك له‌ سه‌رده‌م رژيم وه‌رين ده‌رحه‌ق وه‌ هونه‌رمه‌نده‌يل كورد وه‌ تايبه‌ت له‌ ناوڕاس و باشوور عێراق كرياگه ‌؛ ‌ناوبرياگ هه‌رلێوا ئاماژه‌ وه‌ كێشه‌و گير و گرفته‌يل هونه‌رمه‌نده‌يل كوردزوان له‌ به‌غدا كرد ك وه‌ بی پشتگيری هويچ لايه‌نيگ وه‌ سه‌ختی خه‌ريك چالاكی و خزمه‌ت كردن وه‌ هونه‌ر كوردين. ناوبرياگ هه‌رلێوا رخنه‌ له‌و هونه‌رمه‌نده‌يل ئاوازدانه‌ره‌ گرد ك خه‌ريك تێكه‌ڵ كردن گورانی و ئاوازه‌يل ره‌سه‌ن كوردين وه‌ل ئاوازه‌يل و موسيقای عه‌ره‌بی و بێگانه‌ وه‌ ئه‌ی جووره‌ كاره‌يله‌ وه‌ مه‌ترسييگ گه‌ورا ئه‌را هونه‌ر كوردی له‌ قه‌ڵه‌م دا.

هه‌ر له‌ دريژه‌ی كۆڕه‌گه‌ هونه‌رمه‌ندو ده‌راوه‌ر حه‌يده‌ر ئه‌لحه‌يده‌ر وته‌يگ پێشكه‌ش وه‌ ئاماده‌بويه‌يل كرد و له‌ سه‌ره‌تای قسه‌گانی باس ژيان هونه‌ری خوه‌ی كرد وه‌تايبه‌ت هه‌ر له‌ سه‌ره‌تای خوه‌نستنی له‌ مه‌دره‌سه‌ی فه‌يليه‌ تا په‌يمانگای هونه‌ره‌يل جوان و باس كارو چالاكيه‌يل هونه‌ری خوه‌ی و هونه‌رمه‌نده‌يل هاوكاری كرد له‌ چه‌ن ساڵ گوزه‌يشته‌ و له‌وانه‌ دامه‌زرانن تيپ شانۆی لاوان له‌به‌غدا له‌دويای رێككه‌فتننامه‌ی ئازار ساڵ 1970. هه‌ر لێوا هونه‌رمه‌ند حوسێن حه‌يده‌ری له‌ لايه‌ن خوه‌يه‌وه‌ وه‌ی جووره‌ باس كردو وت: هونه‌رمه‌ند بايه‌ته‌ ئنتما داشتوود و شانازی وه‌ نه‌ته‌وه‌و ملله‌ت و ئاو و خاك و نيشتمان خوه‌ی بكه‌ی ، له‌وه‌ر ئه‌وه‌گ هونه‌ره‌گه‌ی په‌يوه‌ندی وه‌ نه‌ته‌وه‌گه‌یه‌وه‌ ديرێ و له‌ناو ملله‌ته‌گه‌يه‌وه‌ سه‌رهه‌ڵداس وله‌ڕی هونه‌ره‌گه‌يه‌وه‌ تويه‌نيگ ملله‌ته‌گه‌ی وه‌ دونيا بناسنيگ ، وه‌ ئيمه‌يش جوور هونه‌رمه‌نده‌يل كورد نيشته‌جای به‌غدای پايته‌خت هه‌ر شانازی وه‌ كوردبوين خوه‌مان كرديمنه‌و كه‌يمنيش وه‌ خوه‌مان وه‌ نوێنه‌ر هونه‌ر كوردی له‌ ده‌يشت هه‌رێم كوردستان وه‌ تايبه‌ت له‌ به‌غدای پايته‌خت زانيمن ؛ ئيمه‌ نزيكه‌ی 100هونه‌رمه‌نديم له‌ به‌غدا ك ئه‌ندام رێكخرياگ هونه‌رمه‌نده‌يل كوردستانييم وه‌لی وه‌داخه‌وه تا ئيسه‌ ئه‌و ده‌رفه‌ته‌ وه‌پيمان نه‌ێرياگه‌ ك جوور لقيگ له‌ لقه‌يل رێكخرياگه‌گه‌ له‌ به‌غدا چالاكی داشتويمن و له‌ جياتی لقيگ ته‌نيا نويسينگه‌يگ بويچگ له‌ به‌غدا ديريم.‌هه‌ر لێوا عه‌لی حوسێن فه‌يلی سه‌رۆك ئه‌نجوومه‌ن وه‌ڕيه‌وبردن ده‌زگای شه‌فه‌ق خوه‌شحاڵی خوه‌ی نيشان دا ئه‌را ئه‌ی گرده‌و بوينه‌و ئه‌ی جووره‌ گرده‌و بوينه‌يله‌ وه‌ گرنگ زانست و وت: ئيمه‌ ئه‌گه‌ر وه‌ل يه‌كا دانه‌نيشيمن  و بيروبوچوونه‌يلمان وه‌ل يه‌كا ئاڵ و گوڕ نه‌كه‌يم وه‌بی شك وه‌ هويچ ئاكاميگ ناڕه‌سيمن ، و هه‌ر لێوا له‌بان ئه‌وه‌يش ته‌ئكيد كرد ك گشت لايگ شه‌فه‌ق و ماڵ كورد وه‌ ماڵ خوه‌يان بزانن و هه‌روه‌ختيگ بخوازن ئه‌تويه‌نن قاپی ئه‌ی ماڵه‌ بكوتن و ئه‌ی قاپيشه‌ هه‌ميشه‌ وه‌ روی گشت لايگ وازه‌ وه‌بی هويچ فه‌رق و جياوازييگ ، ناوبرياگ ئاماژه‌ وه‌ ئه‌وه‌يش كرد ك هه‌ر كام له‌ ئيمه‌ هه‌ر بيروباوه‌ڕيگ بياشتويمن ، وه‌لی هه‌ر خاڵه‌يل هاوبه‌شيگ له‌ناونیمان هه‌س ك ئه‌تويه‌نيمن له‌و خاڵه‌يل هاوبه‌شه‌ جوور فاكته‌ريگ گرنگ ئستفاده‌ بكه‌يم له‌وه‌ر ئه‌وه‌گ ئيمه‌ جوور كورده‌يل نيشته‌جای ده‌يشت هه‌رێم كوردستان ، راسه‌ ك ده‌رده‌يل فه‌ره‌يگ ديريم وه‌لی ئيمه‌ جوور پێكهاته‌یگ گرنگ ئه‌ی وڵاته‌ جارێ زينگيمن و بايه‌ته‌ گشتمان وه‌يه‌كه‌وه‌ كار بكه‌يم ئه‌را ده‌رمان كردن ده‌رده‌يلمان و  وه‌ بی شك گشت ده‌رديگ ده‌رمانيگ ديرێ و بايه‌ته‌ خوه‌مان كار ئه‌را خوه‌مان بكه‌يم و وه‌ل يه‌كا هاوكاری بكه‌يم ئه‌را سه‌ركه‌فتنمان ، وه‌ له‌ی مه‌يدانه‌ هونه‌رمه‌نده‌يليش نه‌خش گرنگيگ ديرن و ‌ داوا له‌ هونه‌رمه‌نده‌يل ئه‌كه‌م ك ئه‌وانيش خوه‌يان وه‌ وه‌رپرس بزانن و ئيمه‌يش پشتگيری له‌ليان ئه‌كه‌يم . ‌ دوياتر وه‌ل به‌شداری و گفتوگو شماره‌يگ له‌ ئاماده‌بويه‌يل وه‌ پێشنيار و ڕخنه‌و تێبينیيان له‌وانه‌ رێزداره‌يل ( نزار جه‌باری ، عه‌بدولئه‌مير مه‌ڵگی ، صادق ئه‌لعه‌بووسی ، حوسێن كاكی ، له‌يلا هاشم ، سه‌مير عه‌لی نه‌جه‌ف ، ستار ماملی و فه‌ره‌يدون كه‌ريم) كۆڕه‌گه‌ كوتايی وه‌پی هات.