دوشمن له‌ خیزان خوه‌د

شفق نيوز

  جى داخه‌ ئیمه‌ نه‌ فریشته‌یم و نه‌یش له‌ به‌هه‌یشت ژیه‌یم، هه‌ر له‌وه‌ر ئه‌وه‌یش بڕیگ له‌لیمان له‌ ژیان بوینه‌سه‌ دوشمن و خوسه‌و بوغز و كینه‌ت فریه‌یگ له‌ دڵ و ده‌روینیان وجوود دیرید

له‌ى باوه‌ته‌و دكتۆر عایز قه‌ره‌نى ئویشید: كه‌سه‌یلیگ هه‌ن ته‌نیا ئامانجیان له‌ ژیان له‌ناوبردن ئامانج كه‌سه‌یل تره‌.

جى داخه‌ جارجاریگ له‌ناونى قه‌وم وخیش یا خیزان، كه‌سیگ جوور برا یا خوه‌یشگ یا دایگ و باوگ یا هه‌ر ئه‌ندامیگ له‌ بنه‌ماڵه‌ وه‌ دڵ ئه‌نقه‌ز ژیان له‌لید كه‌نه‌ دووزه‌خیگ ك گشت وه‌ختیگ ژان و حه‌سره‌ت كاڵ بووده‌ ته‌نیا دووسیگ ئه‌رادو دونیاى رووشن له‌وه‌رچه‌ود بووده‌ سیه‌ى قه‌ترانى و هه‌ناسه‌ى به‌دبه‌ختى له‌تى هه‌ڵكیشید.

خوداى په‌روه‌ردگاریش له‌ قورئان له‌ سوره‌ى "ئه‌لته‌غابن ئایه‌ت 14"باس له‌ى مه‌سه‌له‌ كردگه‌و ئویشید(یا أیها الذين امنوا إن من أزواجكم وأولادكم عدوا لكم فاحذروهم)، یه‌یش ماناى ئاشكراى و دیاره‌ ك بایه‌سه‌ ئاده‌میزاد ئاگادار بوود له‌ ره‌فتار و هه‌ڵسووكه‌فت ئه‌و كه‌سه‌یله‌ نزیكه‌ ك دوشمنن ئه‌راد، چوینكه‌ له‌ى جووره‌ حاڵه‌ته‌یله‌ فریه‌جار هه‌س ك دوشمن له‌ خیزان خوه‌د داشتوید.

ئنجا ئه‌گه‌ر له‌و كه‌سه‌یلیده‌ ك به‌خت وه‌لدا نه‌نیشتگه‌و دوشمن تویشد هاوردگه‌و ده‌سڵات گرته‌سه‌ باند، ئایا مه‌رامد چه‌س و چه‌ ئه‌خوازید بكه‌ید له‌وه‌ختیگ له‌ خوه‌شیه‌یل ئى دونیا بیبه‌شد كردو هه‌میشه‌ وه‌ وه‌رچه‌ود گوزه‌ر ئه‌كاو دوینیده‌ى و ته‌نانه‌ت قسه‌یش وه‌لیا ئه‌كه‌یدو ناچارید؟ ئایا هه‌ر بیده‌نگ مینیدو سه‌ركه‌فتن ئه‌را ئه‌و ئسپات ئه‌كه‌ید، یا وه‌ چه‌و خوسه‌و بوغز و كینه‌ته‌و ته‌ماشاى ئه‌كه‌یدو قسه‌ى ناشرین وه‌پى ئویشید یا حاشا له‌لى ئه‌كه‌ید یا ده‌یده‌ى ده‌س خودا له‌بان ئه‌و كاره‌ ك وه‌سه‌رد هاورد؟

له‌ڕاسى هه‌ڵویست سه‌ختیگه‌و مه‌ردمانیگ وه‌پیه‌و گرفتار بوینه‌، وه‌لى وه‌ل ئه‌وه‌یشا كه‌سه‌یلیگ هه‌ن وه‌رگرى له‌ خوه‌یان ئه‌كه‌ن وه‌ هه‌ر شیوازیگ بوود و كه‌سه‌یلیگ هه‌ن جوور ئه‌وه‌ك ئاماژه‌ وه‌پى كردیم وه‌ سه‌بردارى و ئارامى خوه‌یانه‌و له‌لى بیده‌نگ بوون و گشت چشتیگ هیلنه‌ دڵ خوه‌یان.

سه‌رچه‌وه‌/ هتوف

ج . أ