نه‌ریت كورده‌وارى له‌ناو (كورده‌یل نیشته‌جاى به‌غدا)هیمان له‌كه‌دار نه‌ویه‌

شفق نيوز

هه‌رچه‌نى ساڵه‌یل فره‌یگه‌ زوورمیان ده‌روه‌ده‌ر و ئاواره‌ بوینه‌و شوون و میلكان باوگ و باپیره‌یلیان له‌لیان زه‌فت كریا ، وه‌تایبه‌ت مه‌ردم ناوچه‌یل (خانه‌قى و مه‌نه‌لى و به‌دره‌و قه‌زانى و جه‌سان )و ئه‌و شوونه‌یله‌ ك هیمان له‌هه‌رێم كوردستان داوڕیانه‌و مه‌سه‌له‌ى چاره‌نویسیان یه‌كلاوه‌ نه‌كریاگه‌و نه‌خریانه‌سه‌ بان خاك كوردستان و ئیسه‌ وه‌ حوكم ئه‌وه‌ك هه‌ر له‌زویه‌وه‌ له‌وه‌خت سه‌ره‌تاى ده‌سڵات به‌عسه‌وه‌ له‌ناوچه‌یل خوه‌یان ده‌ركریان و دویره‌و خریان دى تیكه‌ڵن وه‌ل عه‌ره‌با له‌ به‌غداو ده‌وروه‌رى ، وه‌لى وه‌ل ئه‌وه‌یشا هیمان هه‌ر په‌یوه‌سن وه‌ داب و نه‌ریت كورده‌وارى ره‌سه‌ن خوه‌یان و له‌بان سروشت پاك و ڕه‌سه‌ن كورده‌وارى چنه‌ ڕییه‌وه‌و له‌كه‌دار ئه‌و  نه‌ریت جوانه‌ نه‌كردنه‌و سروشت یا ته‌بیعه‌ت بیگانه‌ له‌بان ره‌فتار و هه‌ڵسووكه‌فتیان نه‌چه‌سپیاگه‌ ك وه‌جووریگ  كاریگه‌رى له‌بانیان داشتووگ و له‌ ته‌ور كوردانه‌ى خوه‌یان لابیه‌ن ، نه‌خه‌یر وه‌ل ئه‌وه‌یشا چشته‌یلیگ  هه‌س ك عه‌ره‌به‌یل چه‌و له‌لیان بڕن و ره‌فتاره‌یلیگ  ئاشكراو دیاره‌ ك ئه‌وان چه‌و له‌ ئیمه‌ بڕن و توان جویر كورد بكه‌ن . ئه‌را نموونه‌ : ئیمه‌ى كورد حه‌ز له‌پاكى كه‌یم و گشت كورده‌یل له‌پاكى و ته‌میسى ناو ده‌ركردنه‌و ماڵ و تفاقیان جوان و پاكپرچه‌ ، ك ئیسه‌ ته‌ماشا كه‌ید هاوسه‌یلیان له‌ به‌غدا فره‌یگ  له‌لیان له‌وانه‌ك عه‌ره‌بن و زوى له‌وه‌خت خوه‌ى له‌ شاره‌یل تر یا عه‌شایره‌وه‌ هاتنه‌سه‌ به‌غداو بوینه‌سه‌ هاوساى كورد حه‌ز كه‌ن جویر كورده‌گه‌ ماڵیان پاك و پرچ بووگ ، یا ته‌ماشا كه‌ید فره‌یگ  له‌لیان شیوه‌و ئاداب هاوسایه‌تى و ئارامى له‌ كورده‌یله‌وه‌ هووكاره‌ بوینه‌و جویر كورده‌گه‌ ره‌فتار كه‌ن ، ك یه‌یش مه‌عناى ئه‌وه‌سه‌ كاریگه‌رى كورد زیاتره‌ له‌بان ئه‌وان و هه‌مان وه‌خت كورده‌یلیش هووكاره‌ى ره‌فتار و نه‌ریت ئه‌وان بویه‌ ، وه‌لى هیمان له‌بان نه‌ریت كورده‌وارى خوه‌ى لانه‌یاگه‌و فه‌خرو شانازیه‌ ئه‌ڕا كورده‌یل به‌غدا ك بیگانه‌ له‌ ئه‌یانه‌وه‌ چشت یاى بگریگ  .
من به‌عزه‌ جاریگ  ژنه‌فم و ئویشن ئایا كورد هه‌س له‌به‌غدا ؟ ئى جووره‌ قسه‌یگ  فره‌ عه‌یبه‌ ئه‌را ئه‌وانه‌ك خوه‌یان وه‌ دڵسووز و خه‌مخوه‌ر ملله‌ت ده‌ره‌وه‌ده‌ر كورد زانن ، چوینكه‌ ئه‌گه‌ر خوه‌ى وه‌ رووشنهویر و دڵسووز بزانیگ  نه‌بایه‌د گومان داشتووگ له‌ كوردیگ  ك ساڵه‌هاى ساڵه‌ هه‌قى خوریاگه‌و له‌بان مه‌سه‌له‌ى ره‌واى كورد ئاواره‌ كریاگه‌و چه‌نه‌ها جار خریاسه‌ زندان و ماڵ و موڵكى تائیسه‌یش زه‌فته‌و ته‌نیا چه‌وه‌ڕى  ره‌حمه‌ت خوداسه‌و به‌س . هه‌ر ئه‌را جواو ئه‌و پرسیاره‌ منیش ئویشم : كورد له‌هه‌ر كوورا بووگ هه‌ر كورده‌و كه‌س نیه‌تویه‌نیگ  حاشا له‌ زوان و شوناسنامه‌ بكه‌یگ  ، وه‌تایبه‌ت كورده‌یل به‌غدا هه‌رچى به‌دبه‌ختى و ماڵویرانیه‌ هاته‌ بانیان و سه‌دام دكتاتۆر وه‌بان ئه‌وه‌یشه‌وه‌ ك موڵك و داراییان له‌لیان زه‌فت كرد روڵه‌یلیانیش خسته‌ زندان و دویاخریش بى سه‌ر وشوونیان كرد ، ئمجا برایه‌یل ئه‌زیز هاوزوانم با گشتمان زوان شه‌رمكردن باریمنه‌ كار و كه‌سمان جاریگتر زه‌خمدار كه‌سمان نه‌كه‌یم و سڵ بكه‌یم له‌و ناونیتگ  و قسه‌یله‌ ك هویچ ئه‌نجام خاسیگ  له‌لى نیه‌كه‌فیكه‌وه‌و گشتمان جویر یه‌ك زه‌خممان یه‌كیگه‌و له‌شوون چاره‌نویس و دویارووژ پڕ له‌ ئوخه‌ى خوه‌مان گه‌ردیم و كورده‌یل به‌غدایش له‌به‌دبه‌ختى و كاولكارى و ده‌روه‌ده‌رى به‌ش شیر كه‌فته‌ پیان و له‌جیاى ئه‌وه‌ك دڵخوه‌ش بكریه‌ن و زه‌خمیان ساڕیژ بكریه‌یگ  جارجاریگ  تومه‌تبار كریه‌ن و هه‌قه‌یلیان ژیرپا كریه‌یگ  .
كورده‌یل نیشته‌جاى به‌غدا هویچ وه‌ختى له‌ نه‌ریت كورده‌وارى خوه‌یان لانه‌یانه‌و نیه‌توان ره‌فتار به‌رز  پڕ له‌نیشانه‌ى كورده‌وارى خوه‌یان بشیونن و ته‌ماشا كه‌ید وه‌ختى پرسه‌یگ  نریه‌یگ  یا كه‌سیگ  له‌ كورده‌یل مریگ  و كه‌س وكارى پرسه‌ى نه‌ن ئه‌گه‌ر مه‌لایگ  نه‌وگ قورئان بخوه‌نیگ  له‌و پرسه‌ ته‌ماشا كه‌ید كاسێتیگ  وه‌ده‌نگ مه‌لاى قورئان خوه‌ن كورد(نامق مسته‌فا) خه‌نه‌ كار و  دى مه‌ردم زانیگ  ئه‌و پرسه‌ یا ئه‌و چادره‌ ك هه‌ڵدریاگه‌ پرسه‌ى كوردیگه‌ ، چوینكه‌ عه‌ره‌به‌یل زانن ئه‌و قورئان خوه‌نه‌ كورده‌و هه‌ر له‌وه‌ر ئه‌وه‌یش مه‌گه‌ر وه‌ ده‌گمه‌ن ده‌نگى بژنه‌فید له‌ناو عه‌ره‌به‌یل . یه‌یش به‌ڵگه‌یگ  تره‌ ئه‌را ئسپات كوردبوین و نه‌فه‌وتیان نه‌ریت كوردایه‌تى له‌لاى كورده‌یل نیشته‌جاى به‌غدا .