فه‌يليه‌يل له‌ په‌رله‌مان يه‌كێتی ئۆرپا

شفق نيوز

زه‌ينه‌ب موردا سوهراب چالاكوان كورد فه‌يلی و جيگر سه‌رۆك ريكخرياگ (KNK) له‌ سوێد ده‌سكرده‌ وازكردن ئه‌و دانيشتن كۆنگره‌. له‌و كۆنگره‌ ده‌سكريا نمايشكردن فيلميگ به‌ڵگه‌يی له‌بان تاوان له‌ناوبردن وه‌جه‌م كورده‌يل فه‌يلی وه‌ وێنه‌ی قوربايه‌يل بيسه‌روشوونكريای و خيزانه‌يليان.

زه‌ينه‌ب موراد ده‌سكرده‌ پيشكه‌شكردن ريزدار ئانا كوميز ئه‌ندام په‌رله‌مان ئۆرپی و ئه‌ندام له‌ كومه‌ڵه‌ی هاوپه‌يمان پيشكه‌فتگ سۆشياليستی و ديموكراسی له‌ په‌رله‌مان ئۆرپی ك جوور يه‌كه‌م قسه‌كه‌ريگ له‌و كۆنگره‌ قسه‌ كرد.

MEP, Ana GOMES, Group of the Progressive Alliance of Socialists and Democrats in the European Parliament (S/D) (TBC)

ئان قسه‌ له‌بان كورده‌يل فه‌يلی و ئه‌و تاوانه‌يله‌ كرد ك هاته‌سه‌ تويشيان و هووكار ئی دانيشتنيشه‌ ئه‌را ئاماده‌بويه‌يل ئاشكرا كرد ك وه‌رگريه‌ له‌ ماف كه‌مينه‌يگ ره‌سه‌ن و تاوان له‌ناوبردن وه‌جه‌م ده‌رهه‌قيان ئه‌نجام درياگه‌و فيشتر له‌ ٢٠ هه‌زار جايه‌ڵ جوان فه‌يلی بيسه‌روشوون كريانه‌و تائيسه‌يش چاره‌نويسيان نادياره‌و فيشتر له‌ يه‌ك مليۆنيش له‌ليان كووچ وه‌پيان كريا.

دويای ئه‌وه‌يش زه‌ينه‌ب مورد قسه‌كه‌ر دويه‌م پيشكه‌ش كرد ئه‌را قسه‌كه‌ردن وه‌ناو پرۆفيسۆر جۆزيف وايندنهۆلزر ك مامۆستاي له‌ يه‌كيگ له‌ زانكۆيه‌يل نه‌مساوی.

MEP JOSEF WEIDENHOLZER, Group of the Progressive Alliance of Socialists and Democrats in the European Parliament (S/D)

ك يه‌يش وه‌ زانستيانه‌و ماريفه‌ت به‌رزيگه‌و له‌بان مه‌وسی كورده‌يل فه‌يلی و ئه‌و بار سه‌خته‌ ك هاته‌ تويشيان قسه‌ كرد وه‌ل ئه‌و تاوانه‌يله‌ ك ده‌رهه‌ق وه‌ كورد ئه‌نجام دريا.

له‌شوون ئه‌وه‌يش دانيشتنه‌گه‌ وه‌ ئداره‌ی هه‌ر يه‌ك له‌ شه‌هلا ئه‌لحه‌فيد چالاكوان كورد له‌ سوێد و زيا سوره‌ملی ئه‌كاديمی له‌ له‌نده‌ن ئه‌را به‌شداری له‌و كۆنگره‌ ده‌سوه‌پيكرد و دانيشتنگه‌ له‌لايه‌ن دكتۆر مه‌جيد جه‌عفه‌ر له‌ سوێد واز كريا ك سه‌رۆك حزب ديموكرات كورده‌يل فه‌يليه‌و شيه‌وكردن فراوانيگ له‌بان له‌ناوبردن وه‌جه‌م(Genocide crimes)پيشكه‌ش كرد ك ده‌رهه‌ق كورده‌يل فه‌يلی به‌ی عراق ئه‌نجام درياو له‌تی شماره‌و ئاماره‌يليگ فه‌رمی و به‌ڵگه‌يليگ له‌وه‌رده‌س پيشكه‌ش كرد تا بدێده‌ به‌ڵگه‌يگ فه‌رمی و پيشكه‌شكرياگ ئه‌را په‌رله‌مان ئۆرپی.

ئمجا زيا سوره‌ملی ده‌سكرده‌ پيشكه‌شكردن دادوه‌ر ئاسۆ سۆفی ك خه‌ڵك سلێمانی بوی له‌ عراق و جوور دادوه‌ر سه‌رۆك دادگای تاوانه‌يل يه‌كه‌م له‌ به‌غدا كار كردگه‌و په‌يوه‌س بويه‌ وه‌ دادگای تاوانه‌يل گه‌ورا له‌ به‌غدا/ عراق و به‌شداری كردگه‌ له‌ دادگايی تاوان له‌ناوبردن وه‌جه‌م په‌يوه‌س وه‌ كورده‌يل فه‌يلی و ئه‌نفال و هه‌ڵه‌بجه‌.

ئاسۆ سۆفی شيه‌وكردنيگ ياسايی له‌باره‌ی تاوانه‌يل له‌ناوبردن وه‌جه‌م و جياوازی ناونی ئی تاوانه‌و تاوانه‌يل دژه‌ ئنسانيه‌ت (Crimes against humanity)پيشكه‌ش كرد وه‌ل پيشكه‌شكردن باسيگ گرينگ له‌باره‌ی ئه‌و دادگای تاواه‌يله‌ ك له‌ به‌غدا ساز كرياو دادگاييكردن ئه‌و وه‌رپرسه‌يله‌ ك ئه‌و تاوانه‌يله‌ ئه‌نجام دانه‌ دژ كورده‌يل فه‌يلی.

وه‌ل ئه‌وه‌يشا دكتۆر ئه‌كره‌م هه‌واس ك ئه‌ويش له‌ دانيماركه‌و هاتوێد قسه‌ له‌بان ئه‌و تاوانه‌يله‌ وه‌جه‌مه‌و رۆڵ كومه‌ڵگای ناوده‌وڵه‌تی و ريكخرياگه‌يل جه‌هانی كرد له‌ی روی وه‌ڕوی بوينه‌وه‌ی ئی تاوانه‌يله‌ وه‌ شيوه‌يگ ياسايی.

سه‌نا ئه‌لبه‌سام ك ئه‌ويش چللاكوان ئه‌كاديمی بوی و له‌ له‌نده‌نه‌و هاتوێد و چالاكوانه‌ له‌ مافه‌يل ژن فه‌يلی باسه‌يليگ راسكانی و پڕ مه‌ويسی باسكرد ك هاته‌سه‌ تويش ژنه‌يل فه‌يلی له‌ زيندانه‌يل رژيم عراقی له‌وه‌ختيگ كووچ وه‌ كورده‌يل فه‌يلی كريا، ك ئه‌ويش وه‌ به‌ڵگه‌و ناو و ريككه‌فت ئه‌و روێداگه‌يل گرينگه‌ خسته‌ڕووی تا بدێده‌ شايه‌ت و به‌ڵگه‌يليگ گرينگ پيشكه‌شكرياگ ئه‌را په‌رله‌مان يه‌كێتی ئۆرپا.

وه‌ل ئه‌وه‌يشا دكتۆر سه‌مير چراخوه‌ندی ك ئه‌ويش له‌ هۆڵه‌ندا هاتوێد ئه‌را به‌شداری له‌و كۆنگره‌ جوور پزيشكيگ ك چوين چاره‌سه‌ر زه‌خمداره‌يل كردنه‌ له‌ ئه‌شكه‌فته‌يل له‌ناو جه‌وه‌ڵه‌يل و باس له‌ بوردمانه‌يل كردو ئه‌و تاوانه‌يل دڕنده‌ ئاشكرا كرد جوور پزيشكيگ شايه‌تحاڵ له‌و سه‌رده‌مه‌.

دويا ئه‌ويش زيا سوره‌ملی قاپی تاوتويكردن وازكرد وه‌ زووانه‌يل ئنگليزی و كوردی و عه‌ره‌بی و بڕيگ شيه‌وكردن و پرس و ده‌خاڵه‌تكاری گرينگ خريا روی وه‌ل بڕيگ له‌ پرسياره‌يل پرۆفيسۆر جوزيف و جواو گشت ئه‌و پرسياره‌يله‌ داو له‌لايه‌ن خوه‌ييشه‌و دكتۆر مه‌جيد جه‌عفه‌ريش جواو ئه‌و پرسياره‌يله‌ دا ك له‌ دانيشتنه‌گه‌ خريا روی.

له‌ كووتايی دانيشتنه‌گه‌يش به‌لقيس فه‌يلی جوور شايه‌تحاڵيگ له‌بان ئه‌و تاوانه‌يل كووچ وه‌پيكردنه‌ و ئه‌و سزايه‌يله‌ ك له‌ زيندانه‌يل ده‌رهه‌ق فه‌يليه‌يل ئه‌نجام دريا باسيگ پيشكه‌ش كرد، به‌لقيش دويه‌تيگ جايه‌ل جوان بوی ك له‌و وه‌خته‌ ته‌مه‌نی ١٦ ساڵ فيشتر نه‌وی له‌وه‌خت ده‌سگيركردن و كووچ وه‌پيكردن له‌ ساڵ ١٩٨٠، ك وه‌و خاتريشه‌ باس له‌ شيواز تاوانكارانه‌ی دارو ده‌سه‌ی رژيم به‌عس كرد هه‌نای ك خوه‌يشكه‌گه‌ی له‌ زانكۆ رفاننه‌و كوشتنه‌سه‌ی وه‌ل ئه‌و دڕنده‌ييه‌ ك له‌لايه‌ن ئه‌فسه‌ر و پاسه‌وانه‌يل زيندن ئه‌نجام دريانه‌ ده‌رهه‌ق وه‌ خيزانه‌يل فه‌يلی و ژن و مناڵه‌يل له‌ زيندان فزێليه‌ له‌ به‌غدا.

له‌ كووتايی ئه‌و كۆنگره‌يشه‌ دكتۆر مه‌جيد جه‌عفه‌ر ره‌شنويس به‌يان كووتايی خوه‌نده‌و ك دوياخر پيشكه‌ش وه‌ په‌رله‌مان يه‌كێتی ئۆرپا ئه‌كريه‌ێد.

وه‌و جووريشه‌ زيا سوره‌ملی كووتايی وه‌ دانيشتن كۆنگره‌گه‌ هاورد له‌ سه‌عات ٧ ئيواره‌، ك ئه‌را ماوی ٤ سه‌عات وه‌رده‌وام بوی و له‌تی سوپاسگوزاری له‌ له‌ ريكخرياگ كه‌ی ئين كه‌ی له‌ به‌لجيكاو ئاماده‌بويه‌يل كرد ك له‌چه‌ن دیه‌وڵه‌تيگه‌و هاتوين ئه‌را به‌شداری له‌و كۆنگره‌، ك وه‌و جووريشه‌ كورده‌يل فه‌يلی وه‌ هه‌وڵه‌و كار له‌بان چه‌سپانن و ره‌سانن ده‌نگ مه‌زڵوميه‌ت خوه‌يان كردن وه‌ل داواكاری له‌ان سزاداين و پرس و پرسكاری له‌ تاوانباره‌يل له‌بان ئه‌و تاوان له‌ناوبردن وه‌جه‌مه‌ ك ئه‌نجام دريا دژ كورده‌يل فه‌يلی.

زيا سوره‌ملی