كى كه‌فێده‌ شوون چاره‌نویس هه‌زاران شه‌هید كورد فه‌یلى؟!

شفق نيوز

نیشتمانیگ گومكریاى، و كه‌س ڕیگه‌ى قه‌وره‌یلیانیش نیه‌زانى هاكوو و كه‌سیش نیه‌زانى چاره‌نویسیان چوینه‌...

جه‌وهه‌ر نامق سه‌رۆك وه‌رین په‌رله‌مان كوردستان له‌ جوواو پرسیاریگ ماڵپه‌ڕ شه‌فه‌ق له‌ى باوه‌ته‌ ئویشى:"كورد بڕیگ له‌ مافه‌یل خوه‌ى وه‌رگرد وه‌لى وه‌داخه‌وه‌ بڕیگ ماف ده‌ستوورى هه‌س هیمان مه‌ننه‌ و هویچ مه‌هانیگ نیه‌ ئه‌را ئى پشتگووشخستنه‌ و بایه‌س بوى سه‌ركردایه‌تى كورد ده‌سپیشخه‌ر بویاتاد ئه‌را هاوردنه‌وه‌ى هه‌قه‌یل كورده‌یل فه‌یلى چوینكه‌ خوه‌یان خاس زانن كورد فه‌یلى چه‌نى كارا بویه‌ له‌ خه‌بات ملله‌ت كورد و بایه‌سه‌ ئه‌وه‌یشه‌ له‌ هویره‌و نه‌وه‌ن ك كورده‌یل فه‌یلییش تویش ئه‌نفال هاتن".

جه‌وهه‌ر نامق گوزارش له‌ سه‌رسوڕمان خوه‌ى كرد له‌ وه‌شوون نه‌كه‌فتن چاره‌نویس هه‌زاران شه‌هید كورد فه‌یلى ك بى شوون و نوین كریانه‌ و وت:" ڕووڵه‌یل كورد فه‌یلى هویچ خه‌تا و تاوانیگ نه‌یاشتن بیجگه‌ مكوڕوبوین و جه‌ختكردنیان له‌ بان كوردایه‌تى خوه‌یان، له‌وه‌ر ئه‌وه‌ داوا له‌ په‌رله‌مان كه‌م له‌ خول هاتى خوه‌ى وه‌تایبه‌تى له‌ ئه‌ندامه‌یل كورد له‌ په‌رله‌مان كار ئه‌را ئه‌وه‌ بكه‌ن تا بڕه‌سنه‌ ئاكامیگ خاس له‌ مه‌سه‌له‌ى ئاشكراكردن چاره‌نویس شه‌هیده‌یل كورد فه‌یلى".

عه‌بدولڕه‌حمان سدیق ك وه‌زیر وه‌رینیگه‌ له‌ په‌یوه‌دییگ وه‌ل ماڵپه‌ڕ شه‌فه‌ق له‌ بان ئه‌وه‌ جه‌خت كرد ك :" كورد فه‌یلى پیكهاته‌یگ سه‌ره‌كیه‌ له‌ پیكهاته‌گان ملله‌ت كورد وه‌لى وه‌داخه‌وه‌ هیمان به‌عزى كه‌س گومان له‌ ڕه‌گه‌ز كوردییان كه‌ید "

سدیق زیاتریش ئویشى:" ده‌وڵه‌ت كوه‌یت هیمان نیه‌یلى عیراق له‌ ژیر بار به‌ند هه‌فتم ده‌ربچوود چوینكه‌ هیمان ڕوفات ئه‌و هاووڵاتیه‌یلیانه‌ نه‌ینه‌سه‌وه‌ ك ڕژیم وه‌رین بى سه‌روشوونیان كردیه‌... من نیه‌زانم كى دیفاع له‌ كورد فه‌یلى كه‌ید و مینه‌ى ڕوفات شه‌هیده‌یلى كه‌ید؟ له‌وه‌ر ئه‌وه‌ بایه‌سه‌ گشت لایه‌نه‌گان وه‌لیانه‌و بووسیه‌ن وه‌ تایبه‌تى ئه‌و په‌رله‌مانتاره‌یله‌ ك ئه‌رك سه‌رشانیان ئه‌وه‌سه‌ ك قانوونه‌یلیگ ته‌شریع بكه‌ن ئنسافیان بكه‌ید و شانیه‌ت و ئعتبار ئنسانى و نیشتمانییان باریده‌وه‌".

دایگ شیلان هاووڵاتییگ فه‌یلیه‌ ك فره‌كه‌س له‌ قه‌وم و كه‌سوكاره‌یلى له‌ده‌س ده‌رچویه‌ ك ڕژیم وه‌رین ئعدام و بى شوون ونوینیان كرد، له‌ په‌یوه‌ندییگى وه‌ل ماڵپه‌ڕ شه‌فه‌ق ئویشى :" من دویه‌ت شه‌هید ناسر ئاغالى میرزام و دوان له‌ مه‌مووه‌یلم و ئامووزایگم و میمزایگ داڵگم شه‌هیدكریان و بى سه‌رو شوون كریان و تائیسه‌یش هویچ زانیارییگ له‌ باوه‌تیانه‌و نیه‌زانیم ، ته‌نیا ئه‌وه‌ نه‌ود ك له‌ ڕیگه‌ى ده‌زگاى شه‌هیده‌یل زانستیم ك گشتیان شه‌هید كریانه‌ و ڕوفات و قه‌وره‌یلیان تا ئمڕوو دیار نیه‌ هه‌رچه‌نى ك هه‌وڵ و ته‌قه‌لاى فره‌یگ دایمن و خه‌رج فره‌یگ دایمن و وه‌خت فره‌یگ كوشتیمن تا بڕه‌سیمنه‌ ئاكامیگ وه‌لى هویچ وه‌گیرمان نه‌كه‌فت؛ و من له‌یرا داوا له‌ كاروه‌ده‌سه‌یل و په‌یوه‌ندیداره‌یل وه‌ كیشه‌ى كورد فه‌یلى كه‌م كوومه‌كمان بكه‌ن ئه‌را ئاشكراكردن چاره‌نویس هه‌زاران شه‌هید له‌ ڕووڵه‌یلمان".

له‌لاى خوه‌یه‌و تارق مه‌ندلاوى ك چالاكیگه‌ له‌ ڕیكخریایه‌یل كوومه‌ڵگاى مه‌ده‌نى فه‌یلى له‌ په‌یوه‌ندییگى وه‌ل ماڵپه‌ڕ شه‌فه‌ق  ئویشى :" زوورمى ڕیكخریایه‌یل فه‌یلى وه‌داخه‌وه‌ وتار یه‌كگرتییگ نه‌یرن و نه‌تویه‌نستن بكه‌فنه‌ شوون چاره‌نویس شه‌هیده‌یل و بى شوون و نوین كریایه‌یل له‌وه‌ر كه‌مى لایه‌ن دارایى و كه‌م پسپۆرى، وه‌لى ئمڕوو گشتیان وه‌ل هه‌ردوگ حزب كوردى سه‌ره‌كى هه‌وڵ ده‌ن ئه‌را ئه‌وه‌ ك كار هاوبه‌شى بكه‌ن ئه‌را ڕه‌سین وه‌ى ئامانجه‌ و ئاشكراكردن چاره‌نویس گشت قوربانیه‌یل سیاسه‌ته‌یل ڕژیمه‌یل دیكتاتۆرى وه‌گشتى".