گشتیان بڕیاریگ سیاسى وه‌ئنسافكردن كورده‌یل فه‌یلى وه‌گرنگ زانن... و كه‌سیش ده‌سپیشخه‌رى ناكا

شفق نيوز

بڕیاریگ (ئه‌نجوومه‌ن هه‌ڵوه‌شیاى سه‌ركردایه‌تى شووڕش) شماره‌ 666 ده‌س نریابانى ئه‌وه‌ بیجگه‌ گشت مافه‌یل مه‌عنه‌وى و نیشتمانى و له‌وانه‌یش كارته‌یل ڕه‌گه‌زنامه‌یان ك له‌ ئۆپه‌راسیۆنه‌یل ده‌ركردن و كووچوه‌پیكردن ڕكخریاى ئه‌را چه‌ن ساڵیگ ئه‌نجام دریان، دوباره‌ بدریه‌ده‌ خاوه‌نه‌یلیان، و بڕى كه‌س ئه‌وه‌یشه‌ دوینى ك ئه‌و ڕیڕه‌وه‌ ك ڕژیم وه‌رین گرته‌ى وه‌ر له‌ ئۆپه‌راسیۆنه‌یل كووچوه‌پیكردن و بى سه‌روشوون كردن وه‌و ئامانجه‌ بوى ك بنبڕیان بكه‌ن و وه‌ سه‌ڵت و قوڵتى و ده‌س و گیرفان خالى بخه‌نه‌یانه‌ ئه‌و دیم سنوور تا تویش ئه‌و مه‌سڵه‌ته‌ بان ك ئویشى(هه‌ژارى له‌ فه‌قیرى یه‌عنى گوم بوین وجوود و شناسنامه‌) و یه‌یشه‌ بویه‌ نیشانه‌ى جیاوازى ئه‌و زوڵمه‌ ك له‌ى چینه‌ كریا.

به‌رپرس نویسینگه‌ى كاروبار كورده‌یل فه‌یلى له‌ سه‌رۆكایه‌تى كۆمار ئه‌وه‌ ئاشكراكرد ك ڕژیم وه‌رین هه‌رچى دارا و نه‌داراى كورده‌یل فه‌یلیه‌ چه‌پاوكرد و له‌ مازاد وه‌ هه‌رزان هه‌ڕاجى كرد و كه‌سه‌یل ئاسایى نه‌وین ك ده‌سنانه‌ بان ئه‌و ماڵ و موڵكه‌یلیانه‌.

عادل موراد له‌ په‌یوه‌ندییگى وه‌ل شه‌فه‌ق له‌ى باوه‌ته‌ ئویشى ك :"سه‌ران ڕژیم وه‌رین و ئه‌ندامه‌یل ئاسایش ده‌سنانه‌ بان ماڵ و موڵكه‌یل فه‌یلیه‌یل، له‌ شوون ئه‌وه‌گ خستنه‌یانه‌ مازاده‌یل درووكانى، و له‌و وه‌خته‌ وه‌زاره‌ت دارایى ئى موڵكه‌یله‌ وه‌ ناهه‌ق كرده‌ ناو ئه‌و كاروه‌ده‌سه‌یله‌، و ئنجا فرووشیانه‌ كه‌سه‌یل ئاسایى".

موراد زیاتریش وت:"ئه‌وه‌گ ئمڕوو كورده‌یل فه‌یلى تویشى هاتنه‌ له‌ هه‌وڵداینیان ئه‌را هاوردنه‌وه‌ى ماڵ و موڵكه‌یلیان له‌وه‌ر ئه‌وه‌سه‌ ك بڕیاریگ سیاسى له‌ لایه‌ن ده‌وڵه‌ته‌و ده‌رنه‌كریاس ئه‌را هه‌ڵوه‌شانن یا ئلغاى ئه‌و بڕیاره‌یله‌ ك له‌لایه‌ن ڕژیم وه‌رینه‌و ده‌ركریان و له‌وانه‌یش بڕیار زاڵمانه‌ى شماره‌ 666 وفه‌رمان ئه‌وه‌یشه‌ بیه‌یده‌ گشت فه‌رمانگه‌یل ده‌وڵه‌ت ك ماڵ و موڵك كورده‌یل فه‌یلى بیه‌نه‌وه‌، وه‌بى ئه‌وه‌گ هه‌واڵه‌ى بكه‌نه‌ ده‌سته‌ى كێشه‌ى موڵكدارى". و ئه‌وه‌یشه‌ ڕووشنه‌وكرد ك :"داواكارى یا ده‌عواى كورده‌یل فه‌یلى دژ وه‌ كه‌سه‌یلیگ دیاریكریاى نیه‌ تا ده‌سته‌ى كێشه‌ى موڵكدارى حوكمى بیه‌ید، به‌ڵكوو له‌لایه‌ن قانوونى ته‌ره‌ف به‌رانبه‌ر  یا (خصم) كورده‌یل فه‌یلى خود ده‌وڵه‌ته‌".

موراد ئاماژه‌یش وه‌ خاوه‌خاوكردن و سسى قانوون ساز عیراقى و كاروه‌ده‌سه‌یل دا له‌ مه‌سه‌له‌ى هه‌ڵوه‌شانن فره‌ له‌و بڕیاره‌یله‌ ك ڕژیم وه‌رین ده‌ریانكرد و ئمڕوو بینه‌سه‌ ته‌گه‌ره‌ له‌نواى چاره‌سه‌ركردن ئه‌و گریه‌كووره‌یل سیاسى و كوومه‌ڵایه‌تیه‌ ك عیراقیه‌یل وه‌ده‌سیه‌و ناڵنن:"زیاتر له‌ 13هه‌زار بڕیار هه‌س له‌ لایه‌ن ئه‌نجوومه‌ن هه‌ڵوه‌شیاى سه‌ركردایه‌تى شووڕش له‌ ساڵ 1968 تا رمیانى ده‌رچویه‌، و ئه‌وه‌گ له‌لیان هه‌ڵوه‌شیاسه‌وه‌ ته‌نیا 36 بڕیاره‌ و یه‌كیگیان بڕیار شماره‌ (666)ـه‌ ك له‌ 8 / 5 / 1980 ده‌رچوى ك كورده‌یل فه‌یلى وه‌پى ده‌ركریان و به‌ندى كریان و بى سه‌روشوون جایڵ وجوانه‌یلیانیش كریان و ماڵ وموڵكه‌یلیان وه‌پى چه‌پاوكریا".

وه‌گووره‌ى قسه‌یل چاودێریگ ك نه‌تواست ناو خوه‌ى ئاشكه‌را بكه‌ید:"گشت سیاسه‌تمه‌داره‌یل عیراق یه‌كڕان له‌بان گرنگى ده‌ركردن بڕیاریگ سیاسى ك زامن لاوردن ئه‌و دویدمانه‌ بوود ك له‌ شوون ئه‌و بڕیاره‌یله‌ كه‌فتنه‌وه‌، و له‌و سیاسه‌تمه‌داره‌یله‌ سه‌رۆكایه‌تى كۆمار و سه‌رۆك حكوومه‌ت و شماره‌ى گه‌ورایگیش له‌ ئه‌ندامه‌یل ئه‌نجوومه‌ن نوێنه‌ره‌یل له‌ كورد و له‌ عه‌ره‌ب".

ئى چاودێره‌ زیاتریش وت :"له‌ سایه‌ى ئى كه‌شوهه‌واى ریككه‌فتنه‌ ك له‌ قسه‌ى سیاسه‌تمه‌داره‌یله‌و دیاردا هه‌ر له‌ سه‌ره‌تاى دامه‌زرانن یه‌كم حكوومه‌ت عیراقى له‌ شوون ساڵ 2003، وه‌لى تا ئیسه‌ ده‌سپیشخه‌رى ئه‌را ده‌ركردن بڕیاریگ سیاسى هیمان دویره‌ده‌سه‌؛ هه‌رچه‌نى ك بڕیاریگ گرنگه‌".

له‌لاى خوه‌یه‌و سه‌رۆك ده‌سته‌ى وه‌رگریكردن له‌ قوربانیه‌یل كورده‌یل فه‌یلى له‌ دادگاى باڵاى تاوان جه‌ختكرد له‌ بان گرنگى ده‌ركردن بڕیاریگ سیاسى ك به‌شدارى بكه‌ید له‌ دوباره‌ ئاماده‌باشى یا (تأهیل) كووچ وه‌پى كریایه‌یل فه‌یلى و هاوردنه‌وه‌ى ماڵ و موڵكه‌یل چه‌پاوكریایان مسۆگه‌ر بكه‌ید.

سادق مه‌سعودى له‌ى باوه‌ته‌ ئویشى :"هه‌ر بڕیاریگ سیاسى هیلید كورده‌یل فه‌یلى هه‌وه‌جه‌یان نه‌كه‌فیده‌ داواكارى قانوونى و هه‌وڵداین دویر و دریژ له‌ ناو باره‌گاى ده‌سته‌ى كێشه‌ى موڵكدارى".

 

ئا: كفاح هادى

ت: ماجد سوره‌مێرى