زوورم كورده‌يل فه‌يلى له‌ هه‌ڵوژاردنه‌يل ئاينده‌ ده‌نگ ئه‌يه‌نه‌ مالكى!!!

نه‌به‌رد فه‌يلى

شه‌فه‌ق نيوز/ نورى مالكى له‌ ساڵه‌يل جه‌بات و جيهادكردن دژ رژيم ديكتاتۆرى رمياگ ناسرياگ نه‌وى جوور كه‌سايه‌تيه‌يل تر له‌ حزبه‌يل نيشتمانى و نه‌ته‌وه‌يى و ئسلامى ك ئمڕوو دياره‌ له‌ مه‌يدان سياسى عراقى و قورسايى خوه‌ى ديرێد له‌بان ئاسته‌يل ناوچه‌يى و هه‌رێمى و ناوده‌وڵه‌تى.

 

ئاساره‌ى مالكى دوياى رميان بته‌گه‌ ده‌ركه‌فت وه‌تايبه‌ت له‌ دانيشتنه‌يل نويسانن ده‌ستوور، ك له‌وساوه‌ پۆسته‌يل سه‌رۆكايه‌تى وه‌رگرت له‌بان ئاست حزبى و حكومى، وه‌لێ له‌ ئه‌ركه‌يل حزبى و حكومى و شيعييش كه‌مته‌رخه‌م بوى، له‌بان ئاست حزبى هه‌ڵوژاننى جوور ئه‌ميندار گشتى حزب كاريگه‌رى گه‌ورايگ بوى له‌ ده‌ركه‌فتن ناكووكيه‌يل له‌ناونى سه‌ركردايه‌تيه‌يل حزب و بويه‌ هووكار جياجيايى له‌ناو حزب و دامه‌زرانن حزبه‌يل تر له‌ سه‌ركردايه‌تيه‌يل ده‌عوه‌، ئه‌را نموونه‌: حزب ده‌عوه‌ى ئسلامى ريكخرياگ عراق وه‌ سه‌رۆكايه‌تى عه‌بدولكه‌ريم ئه‌لعنزى و جمشت ئه‌لئسڵاح وه‌ سه‌رۆكايه‌تى ئبراهيم جه‌عفه‌رى و له‌يوا بزانم ريكخرياگيگ تر ك ناوه‌گه‌ى نايه‌ده‌ هويرم، يه‌يش بيجگه‌ ده‌س له‌كاركيشانه‌وه‌ى شماره‌ى فريه‌يگ له‌ سه‌ركرده‌و كادره‌يل حزبه‌گه‌ و چگنيان وه‌ناو حزبه‌يل جيابوى له‌ ده‌عوه‌ و حزبه‌يل تر ئسلامى و ته‌نانه‌ت ناكووكى ناونى خوه‌ى و حه‌يده‌ر عبادى سه‌رۆك ئيسه‌ى وه‌زيره‌يليش دريژه‌ده‌ر سياسه‌ت مالكيه‌ وه‌ دويره‌وخستن كه‌سايه‌تيه‌يل بته‌و له‌ناو حزبه‌گه‌ له‌وه‌ر ته‌كڕه‌وى له‌ بڕياره‌يلى.

 

له‌بان ئاست عراقيش روێداگه‌يليگ كه‌فته‌و، ئمجا ئه‌وه‌گ ناڵنيم وه‌ده‌سيه‌و دوياى 2003، ئه‌وه‌سه‌ ك مالكى به‌ش گه‌ورايگ له ‌وه‌رپرسيارێتى ئه‌كه‌فيده‌ بانى، ئه‌وه‌يش وه‌ گووره‌ى ئه‌وه‌گ ئه‌را ماوه‌ى دو خول ده‌سڵات وه‌ ده‌سيه‌و بوى و چه‌ن پۆستيگيش له‌ هه‌مان وه‌خت گرته‌ ده‌س جوور سه‌رۆكايه‌تى حكومه‌ت و هه‌ردوگ وزاره‌ت وه‌رگرى و ناوخوه‌يى و سه‌ركرده‌ى گشتى هيزه‌يل چه‌كدار و پۆسته‌يل تر وه‌شيوه‌ى نافه‌رمى و ناڕاسه‌وخۆ.

 

له‌و هه‌ردوگ خوله‌ مالكى سه‌رنه‌كه‌فت له‌ دويره‌وخستن هيزه‌يل تر سياسى عراقى و ته‌نانه‌ت هيزه‌يل شيعه‌يش، به‌ڵكوو له‌ ئاست گرژيه‌يل و نگه‌رانيه‌يل فيشتره‌و كرد وه‌تايبه‌ت وه‌ل كورد و عه‌ره‌ب سنى، ك يه‌يش بويه‌ هووكار جه‌نگ تايفى و هه‌زاران بيتاوان له‌تى بوينه‌ قوربانى، له‌ بوار گه‌ناته‌كارييش عراقى شماره‌ى پێوه‌رى له‌ كتاو گينيس جه‌هانى تۆمار كرد و چيه‌ ڕز سێيه‌م ده‌وڵه‌ت له‌بان ئاست جه‌هان، ئه‌را مه‌سه‌له‌ى خزمه‌تگوزاريه‌يليش نزيكه‌ى هه‌زار مليار دۆلار وه‌ زاى داو هيمانيش كاره‌با هه‌ر جوور حاڵه‌ت خوه‌يه‌ له‌ زمسان و تاوسان، يه‌يش بيجگه‌ كيشه‌ى نيشته‌جى و خوه‌ندگايه‌يل خه‌ڕگين و كه‌ره‌ڤانى ك هه‌ڵكه‌فتيگ دڵته‌نگيه‌ له‌گشت عراق وه‌تايبه‌ت له‌ ناوچه‌يل باشوور وڵاته‌گه‌و بيجگه‌ خراوى بوار ته‌ندروسى و چشته‌يل تر.

 

له‌ كيشه‌ى موسڵيش، زوورم مه‌ردم تومه‌تبارى وه‌ ئه‌وه‌ ئه‌كه‌ن ك موسڵ ته‌سليم وه‌ داعشيه‌يل ترۆريستى كردگه‌ وه‌ بوونه‌ى سياسه‌ته‌ دوشمنكاريه‌گه‌ى دژ عه‌ره‌ب سنى و هانداينيان ئه‌را چگن وه‌ناو جه‌ماعه‌ته‌يل ترۆريستى وه‌تايبه‌ت ريكخرياگ ترۆريستى داعش، يه‌يش بيجگه‌ ته‌سليم سه‌ركردايه‌تيه‌يل سوپاو پۆليس و هيزه‌يل ئاسايشى وه‌ده‌س گه‌ورا ئه‌فسه‌ره‌يل پاشمه‌نده‌ى رژيم وه‌رين ك موسڵ دانه‌ ده‌س ترۆر و هه‌يواين وه‌بى ئه‌وه‌گ گوله‌يگ بته‌قنن و ئه‌و هه‌مگه‌ روێداگه‌ له‌لى كه‌فته‌وه‌و داعش هاته‌ ناو خاكه‌يل عراقى و نزيكه‌ى په‌نج پاريزگا داگيركرد و خراوترين تاوانه‌يليگ ئه‌نجام دا بيجگه‌ زه‌ره‌ده‌يل ماددى ك مه‌زه‌نه‌ وه‌ 35 مليار دۆلار ئه‌كريه‌ێد جوور ئه‌وه‌گ حه‌يده‌ر عبادى سه‌رۆك وه‌زيره‌يل باسى كرد له‌ كۆنگره‌ى به‌غدا.

 

كورد به‌ش شير كه‌فته‌پى له‌ ره‌فتاره‌يل و كاره‌يل مالكى جوور ئه‌وه‌گ به‌ش شير كه‌فته‌پى له‌ تاوانه‌يل له‌ناوبردن وه‌جه‌م له‌ سه‌رده‌م رژيم گوڕ وه‌گووڕ به‌عس، ك غه‌در له‌لى كريا له‌ له‌ مه‌سه‌له‌ى به‌نده‌يل ده‌ستوور عراقى وه‌تايبه‌ت ئه‌وانه‌گ په‌يوه‌سن وه‌ كورد جوور مادده‌ى 140 و دامه‌زرانن سه‌ركردايه‌تى سه‌ركردايه‌تى هيزه‌يل دجله‌ جوور وه‌شيله‌يگ ئه‌را وه‌كارهاوردن هيز دژ هه‌رێم كوردستان، ئمجا دانايى و سه‌ركردايه‌تى كورد نه‌وياتاد و ئازايه‌تى مه‌سعود بارزانى و خێرمه‌نه‌يل تر له‌ سه‌ركردايه‌تيه‌يل سياسى عراقى نه‌وياتاد، ئه‌وه‌ كورد و عه‌ره‌ب چيانه‌ ناو جه‌نگيگ داڕزنه‌ر وه‌رجه‌ داعش، يه‌يش بيجگه‌ دويره‌وخستن و فه‌رامووشكردن رۆڵ كورد له‌ حكومه‌ت و په‌رله‌مان و دويره‌وخستنيان له‌ ناوه‌ند بريار و دوياى ئه‌وه‌يش چه‌سپانن ئابڵوقه‌ ك وه‌هيزتر بوى له‌ ئابڵوقه‌ى رژيم سه‌دامى له‌ مه‌سه‌له‌ى بڕين مووچه‌ى كارمه‌نده‌يل و دوياى ئه‌وه‌يش ده‌خاڵه‌تكردن و دروسكردن ناكووكيه‌يل گه‌ورا له‌ناونى هيزه‌يل كوردستانى و ده‌خاڵه‌تكارى له‌ كاروبار هه‌رێم كوردستان، ك يه‌يش بويه‌ هووكار په‌يابوين كيشه‌و ناكووكى له‌ناونى هيزه‌يل كوردستانى و دروسكردن حاڵه‌تيگ له‌ جيايى و كه‌لين له‌ناونى كۆمه‌ڵگاى كوردستانى، ئمجا ئى باسه‌يله‌ قه‌تره‌يگ بوى له‌ ده‌ريا له‌ ره‌فتاره‌يل مالكى نه‌ك حزب ده‌عوه‌ى ئسلامى، چوينكه‌ بايه‌سه‌ وه‌ وژدانه‌و راسيه‌يل ئاشكرا بكه‌يم.

 

گشت ئى ره‌فتار و سياسه‌ت و شكه‌سته‌يل گه‌ورا له‌ ئداره‌ى حزبه‌گه‌ى و له‌ ده‌وڵه‌ت عراقى خراوترين سه‌رده‌ميگ له‌ مێژوو عراق سه‌رده‌م له‌لى كه‌فته‌و وه‌ل ئه‌زموون تيه‌ڵيگ ك ملله‌ت عراقى وه‌گشت پيكهاته‌يلى نه‌بايه‌د له‌ هويريان بچێد ك پڕ بوى له‌ كاره‌سات و مه‌ويسى و جه‌نگ، وه‌ل ئه‌وه‌يشا مالكى له‌بان ئاست ناوچه‌يى و ناوده‌وڵه‌تييش سه‌رنه‌كه‌فت له‌ دڵسووزى وه‌ل كيشه‌يل هه‌رێمى و ناوده‌وڵه‌تى، ك هه‌ر وه‌و خاتريشه‌ ته‌نانه‌ت ته‌هرانيش ك صشتگيرى گشت هيزه‌يل ئسلامييش ئه‌كا له‌ عراق ره‌تيه‌و كرد و ره‌ت ولايه‌ت سێيه‌ميش ئه‌راى كرد و له‌وه‌خت دويا سه‌ردانيشى سه‌ركرده‌يلى ئيرانى وتنه‌پى نه‌بايه‌د خوه‌ى كانديد بكه‌ێد ئه‌را پۆست سه‌رۆكايه‌تى حكومه‌ت له‌ هه‌ڵوژاردنه‌يل ئاينده‌، ك يه‌يش له‌يوا كرد له‌وه‌رده‌م هووكاره‌يل ره‌سانن ئاشكراى بكا ك خوه‌ى كانديد ناكا ئه‌را سه‌رۆكايه‌تى ئاينده‌ى وه‌زيره‌يل، وه‌ نسبه‌ت ئه‌را ده‌وڵه‌ته‌يل جوور توركيا و سعوديه‌ و ئوردن و قه‌ته‌ر و ئيمارات و كوه‌يتيش هه‌ڵويسته‌يليان ئاشكراس له‌ نورى مالكى و لێدوانه‌يل ئى دوياخر جۆن كيرى وه‌زير وه‌رين خارجيه‌ى ئه‌مريكييش وه‌رجه‌ كووتاييهاتن ولايه‌ت حكومه‌ته‌گه‌ى ئه‌وه‌ ده‌رخست ك مالكى شكه‌ست هاوردگه‌ له‌ ئداره‌ى حوكم له‌ عراق و قه‌يرانه‌يل سياسى و ئاسايشى و ئابوورى فريه‌يگ دروسكردگه‌.

 

ئمجا لێدوانه‌يل ئى دوياخر مه‌سعود بارزانى سه‌رۆك هه‌رێم كوردستانه‌ له‌وه‌خت ديدارى وه‌ل رووژنامه‌ى شه‌رقولئه‌وسه‌ت و جه‌ختكردنى له‌بان ئه‌وه‌گ ئه‌گه‌ر نورى مالكى پۆست سه‌رۆكايه‌تى حكومه‌ت بگرێده‌ ده‌س ئه‌وه‌ ئاشكراى جيابوينه‌وه‌ ئه‌كا له‌ عراق و هه‌رچى ئه‌دێ با بدێ، بيگومان ئى قسه‌يله‌ له‌ هويچه‌و ناتنه‌و له‌وه‌ر هووكار دوشمنايه‌تى شه‌خسى وه‌ل مالكى و دياريكردن كيشه‌ى كورد نيه‌، ئه‌گه‌ريش مه‌سه‌له‌گه‌ له‌يوا بوياتاد ئه‌وه‌ بارزانى ئنتقام له‌ شماره‌ى فريه‌يگ له‌و تاوانياره‌يله‌ كردياد ك شان وه‌شان رژيم به‌عس وسيان و تاوانه‌يل خه‌ته‌رناك ده‌رهه‌ق رووڵه‌يل ملله‌ت كورد ئه‌نجام دان و به‌شدارى كردن له‌ جه‌نگ له‌ناوبردن ملله‌ت كوردستان له‌ ساڵه‌يل خه‌بات دژ رژيم رمياگ به‌عس، ك ئه‌وه‌ بوى بارزانى ئه‌و تاوانباره‌يله‌ وه‌خشى له‌وه‌ر باوه‌ڕ بته‌وى وه‌ مه‌سه‌له‌ى وه‌خشين و وه‌خشينكارى له‌ گوزه‌يشته‌ وه‌خاتر مقه‌يه‌تيكردن له‌ ئاشتى له‌ هه‌رێم، ك لێدوانه‌يل دوياخرى و په‌يوه‌سكردن مه‌سه‌له‌ى سه‌روه‌خوه‌يى كورد وه‌ مالكى مكوڕييگه‌ له‌ جه‌نابى له‌بان جيوه‌جيكردن په‌يڕه‌و ئاسايش و سه‌قامگيرى له‌ عراق و زه‌مانه‌تيگ ئه‌را ئاينده‌ى ملله‌ت عراقى و وه‌گووره‌ى ئه‌و ئه‌زموون تيه‌ڵه ك ناخوازێد دوباره‌وه‌ بدێ له‌ عراق له‌وه‌ر ئه‌وه‌گ وڵاته‌گه‌ نه‌كه‌فيد جه‌نگ ناوخوه‌يى و كاره‌سات، ئمجا له‌ى روييشه‌و بارزانى مه‌سه‌له‌ى سه‌روه‌خوه‌يى په‌يوه‌سه‌ كرده‌ هاتنه‌وه‌ى مالكى ئه‌را حوكم، وه‌لێ ملله‌ت كورد له‌ هه‌رێم كوردستان فريه‌ گه‌شبين بوين وه‌ى لێدوانه‌، چونيكه‌ ماوه‌گه‌ كوڵتره‌و ئه‌كا ئه‌را ئعلانكردن ده‌وڵه‌ت كوردى له‌ حاڵه‌ت هاتنه‌وه‌ى مالكى ئه‌را جڵه‌و ده‌سڵات و گشت مه‌ردميش ئاماده‌ى خوه‌يان كردنه‌ ده‌نگ بيه‌نه‌ مالكى له‌ هه‌ڵوژاردنه‌يل ئاينده‌ و داواى هاتنه‌وه‌ى ئه‌كه‌ن ئه‌را ده‌سڵات، ئه‌ويش له‌وه‌ر ئه‌وه‌گ بارزانى هه‌ڵه‌په‌ڵه‌ بكا له‌ جيوه‌جيكردن ئه‌و خه‌و كورده‌ ك فريه‌ چه‌وه‌ڕى كرياو فيشتر له‌ سه‌ده‌يگ.

نه‌به‌رد فه‌يلى