چوار گووشه‌ى ژیان

شفق نيوز

و له‌بان شانۆى ژیان چ ده‌وریگ دوینیدو پاڵه‌وان له‌ى شانۆه‌ كییه‌؟

خاڵ یه‌كه‌م نه‌خش گرنگ و هه‌ڵه‌په‌ڵه‌ كیشێد، خاڵ دویه‌م نه‌خشه‌ى گرنگه‌ وه‌لى هه‌ڵه‌په‌ڵه‌ نیه‌، خاڵ سێیم نه‌خشه‌ى گرنگ نیه‌ وه‌لى هه‌ڵه‌په‌ڵه‌س، خاڵ چوارمیش گرنگ نیه‌و هه‌ڵه‌په‌ڵه‌یش ناكا.

له‌یره‌ تیه‌یمنه‌ بان شیه‌وكردن ئى هاوكیشه‌ ك ئاده‌میزاده‌یل له‌چوارچیوه‌ى ئى خاڵه‌یله‌ ژیه‌ن، ئمجا له‌ى گووشه‌یله‌ دریژه‌ ده‌نه‌ ژیانیان، ئه‌را نموونه‌ ئویشن قسه‌ هه‌ر ئاشكرا بوود، خاڵ یه‌كه‌م ك نه‌خشه‌ى گرنگ و هه‌ڵه‌په‌ڵه‌س جوور مناڵیگ نه‌خوه‌ش یا هاوسایگه‌ هه‌وه‌جه‌ وه‌ ده‌سمیه‌ت دیرێد، ئیسه‌ ئى خاڵه‌ گرنگه‌ و هه‌وه‌جه‌ وه‌هه‌ڵه‌په‌ڵه‌ دیرێد.

دویه‌م خاڵ ك گرنگ و هه‌ڵه‌په‌ڵه‌ نیه‌، ئه‌ویش پلان و ریكخستن ژیانه‌. سێیم خاڵ گرنگ نیه‌و هه‌ڵه‌په‌ڵه‌س، ئه‌ویش جوور په‌یوه‌ندیه‌یل ته‌له‌فۆنى ك فره‌یش مایه‌ى گرنگیداین یا ئه‌همیه‌ت نیه‌، یا به‌شداریكردن له‌ میوانى، راسه‌ هه‌ڵه‌په‌ڵه‌س، وه‌لى مه‌رج نیه‌ فره‌یش ئه‌راد گرنگ بوود.

چوارم خاڵیش گرنگ نیه‌و هه‌ڵه‌په‌ڵه‌یش نیه‌، جوور قسه‌كردن له‌ ئه‌نته‌رنێت و چات، یا ته‌ماشاى زنجیره‌ فیلمیگ له‌ ته‌له‌فزیۆن. ئمجا مه‌ردمان فره‌یگ كه‌فتنه‌سه‌ شوون خاڵ یه‌كه‌م چوینكه‌ گرنگ و هه‌ڵه‌په‌ڵه‌س، یه‌یش له‌وه‌ختیگ كه‌سه‌یل سه‌ركه‌فتگ كه‌فتنه‌سه‌ شوون خاڵ دویه‌م چوینكه‌ گرنگ و هه‌ڵه‌په‌ڵه‌ نیه‌ ك ئه‌ویش پلان و ریكخستن و داناین ستراتیجیه‌ته‌و ئى خاڵه‌ وه‌ره‌و ئاینده‌ى خاس و رووشنیگ به‌یده‌د، وه‌لى نووڕید فره‌كه‌س ئى خاڵه‌ له‌هویره‌و بردنه‌ یا فه‌رامووشى كردنه‌، ئى خاڵه‌ خاڵیگ زانست و ماریفه‌ته‌، خاڵیگ ئاماده‌باشیه‌، پلان و ریكخستن ئاینده‌س، مه‌زه‌نه‌كردن گوزه‌یشته‌و ئیسه‌س.

ئه‌وه‌ك بایه‌سه‌ هویر بخریه‌ێده‌ لاى، ئه‌ویش خاڵ دویه‌مه‌، وه‌لى جوور ئه‌وه‌ك ئاشكراس زوورم مه‌ردم له‌ خاڵ یه‌كه‌م ژیه‌ن و زوورم ژیانیان چه‌وه‌ڕى پیشهات و ڕویداگه‌یلن و هه‌میشه‌ چه‌وه‌ڕى كه‌ن كاره‌سات یا ته‌نگى و كیشه‌ ده‌س وه‌پى بكاو دویاخریش ئه‌را چاره‌سه‌ركردنى گام نه‌ن، وه‌لى خاڵ دویه‌م به‌خته‌وه‌رى و سه‌ركه‌فتن ئه‌ڕاد ده‌سه‌وه‌ر ئه‌كا ئه‌را ماوه‌ى دویرو دریژیگ .

ئه‌گه‌ریش له‌ خاڵ یه‌كه‌م بژیه‌ید، ئه‌وه‌ بیگومان هه‌میشه‌ له‌ دودڵى و په‌شیوى ژیه‌ید، ئمجا شایه‌ت سه‌ركه‌فتن باریده‌ ده‌س، وه‌لى به‌خته‌وه‌ر نیه‌وید. خراوتریش له‌وه‌ ئه‌وه‌سه‌ له‌خاڵ چواره‌م بژیه‌ید، ئه‌وانه‌ك له‌ى خاڵه‌ شكه‌ست خواردنه‌ نه‌ قانجاز وه‌ خوه‌یان ره‌سنن نه‌یش جوور كه‌سه‌یل ده‌وروه‌ر، دى بایه‌سه‌ مقه‌یه‌ت بوون له‌ى خاڵه‌، چوینكه‌ زوورم چشته‌یل گرنگ په‌یوه‌سن وه‌ خوه‌د یا خیزاند، وه‌لى كاره‌یل هه‌ڵه‌په‌ڵه‌ په‌یوه‌سن وه‌ مه‌ردم ده‌وروه‌ر، وه‌لى خاڵ چواره‌م نه‌ ئه‌ڕا خوه‌د نه‌یش ئه‌را مه‌ردم ده‌روه‌ر قانجاز نه‌یرن، دى نه‌ وه‌هه‌ڵه‌په‌ڵه‌و نه‌یش گرنگ كار بكه‌ ئه‌را خاڵ دویه‌م، تویه‌نید كه‌میگ له‌ وه‌ختد ئه‌را خاڵ یه‌كه‌م ته‌رخان بكه‌ید، مه‌به‌س كارد دیارى بكه‌و پلان ئه‌را دویاڕووژ دابنه‌.

 

فارس زێبارى