جموجويل شه‌واف له‌ موسڵ

شفق نيوز

چوينكه‌ له‌وه‌ر نه‌وين ئه‌نجوومه‌ن سه‌ركردايه‌تی شووڕش ، خود شه‌واف خوه‌ی له‌وان زياتر وه‌شايسته‌ی وه‌رگرتن ده‌سڵات زانستياگ وزويتر له‌ ئه‌وان كار ئه‌را شووڕش كردويگ ، ئمجا تويڕه‌يی و ناڕه‌حه‌تيه‌گه‌ی زياتر بوی له‌و وه‌خته‌ ك دادوه‌رگشتی له‌شكری بوی وله‌بان كاره‌گه‌ی لاورياو كريا فه‌رمانده‌ی له‌شكر موسڵ .

شه‌واف ئاره‌زوو فره‌يگ داشت ئه‌را وه‌رگرتن ده‌سڵات له‌وه‌ختيگ ناكووكی كه‌فته‌ ناونی (عه‌بدولكه‌ريم قاسم و عه‌بدولسه‌لام عارف)ولايه‌نگره‌يل هه‌ردوگلا ، ئه‌وه‌ بوی عه‌بدولكه‌ريم وه‌ره‌و ته‌كڕه‌وی چی و له‌هه‌وڵ ئه‌فسه‌ره‌يل ئازاد خوه‌ی دويره‌و خست ، ئمجا ئه‌فسه‌ره‌يل ئازاد قه‌واره‌يگ دژ ده‌سڵات دروس كردن و ئه‌و ئه‌فسه‌ره‌يله‌ موبادره‌يگ كردن ك پيكهاتوين له‌يانه‌ : عه‌قيد ره‌فعه‌ت حاجی و زه‌عيم روكن نازم ته‌به‌قجه‌كی و عه‌قيد روكن عه‌بدولعه‌زيزعه‌قيلی و دويای ئه‌وه‌يش موقه‌ده‌م ته‌ياره‌چی محه‌مه‌د سه‌بع وعه‌قيد روكن عه‌بدولوه‌هاب شه‌واف له‌ موسڵ و سه‌رووك ته‌يارعارف عه‌بدولره‌زاق وعه‌قيد نوعمان ماهر كه‌نعانی و سه‌رووك يه‌كم خه‌ليل ئبراهيم و شماره‌ی فره‌يگ ئه‌فسه‌رخاوه‌ن هوير عه‌ره‌بی شۆڤێنی . ئه‌يانه‌ گشتيان وه‌يه‌كه‌وه‌ كه‌فتنه‌ بان يه‌ك رای ك گوايا زه‌عيم روكن نازم ته‌به‌قچه‌كی له‌ باكوور و عه‌قيد عه‌بدولوه‌هاب شه‌واف هاوكاری بكه‌يگ له‌موسڵ ودويای ئه‌وه‌يش لايه‌نگره‌يليان له‌ به‌غدا ده‌سوه‌كار بوون و ده‌س بگرنه‌ بان له‌شكرگا‌ی وه‌شاش و له‌شكرگای ئه‌ندازياری روسته‌ميه‌وله‌شوون ئه‌وه‌يش وزاره‌ت وه‌رگری يا دفاع و دوياخريش عه‌بدولكه‌ريم قاسم ده‌سگير بكه‌ن وسه‌رووكايه‌تی له‌لی بسيننه‌وه‌و له‌عراقيش ده‌رچووگ ، ئمجا ئه‌گه‌ر هات و رازی نه‌وی يه‌كسه‌ر بكوشنه‌ی ، دويای ئه‌وه‌يش سه‌عات هه‌فت شه‌وه‌كی له‌راديۆ قسه‌ بكه‌يگ و په‌يوه‌ندی بكه‌يگه‌ حزب و لايه‌ن وكه‌سايه‌تيه‌يل ، ئمجا فه‌ريق روكن (محه‌مه‌د نه‌جيب روبه‌يعی) رای ئه‌فسه‌ره‌يل ئازاد په‌سه‌نكرد وه‌بی ئه‌وه‌ك چشتيگ له‌ ئه‌نجامه‌يليان بزانيگ ، وه‌ل ئه‌وه‌يشا گوايا له‌شوون سه‌ركه‌فتن ده‌س بكريه‌يگه‌ پاكسازی و(عه‌بدولسه‌لام عارف) له‌زندان ئازاد بكريه‌يگ وه‌بی ئه‌وه‌ك هويچ وه‌رپرسيارێتی يا مه‌سئووليه‌تيگ وه‌پی بيه‌ن ، ئمجا له‌ دامه‌زرانن ئه‌نجوومه‌ن سه‌ركردايه‌تی شووڕش (شه‌واف) وه‌ك سه‌رووك شووڕش دياری كريا . وه‌لی هووكاره‌يل شكه‌ست جموجويل شه‌واف ئه‌يانه‌ بوی :

١- نه‌وين گونجيان له‌ناونی ئه‌فسه‌ره‌يل ئازاد ، چوينكه‌ شماره‌يگ له‌ليان عه‌ره‌ب شۆڤێنی بوين وقه‌يريگ له‌ليانيش كۆمنيست ومه‌ردمان به‌رژه‌وند په‌رسيش وه‌ليانا بوين .

٢- جموجويله‌گه‌ زوی ئاشكرا كريا وه‌بی ئاماده‌كاری وته‌نانه‌ت لايه‌نگره‌يل جموجويله‌گه‌يش هويچ له‌وباوه‌ته‌وه‌ نه‌زانستن تا له‌رووژ٨ ئادار ١٩٥٩ له‌راديۆی به‌غدا په‌خشه‌وكريا .

٣- هيز وپارته‌يل عراقه‌ ئاگادار نه‌وين له‌و جموجويله‌ .

٤- هه‌ڵه‌په‌ڵه‌كردن عه‌بدولكه‌ريم قاسم له‌ سه‌ركوتكردن جموجويل شه‌واف وداناين (١٠) هه‌زار دينار ئه‌را ده‌سگيركردن شه‌واف وه‌ مردگی يا زنگی .

٥- كوشيان شه‌واف له‌شوون ٢٤ سه‌عات له‌ئاشكراكردن شووڕش .

جموجويل شه‌واف له‌موسڵ دژ كۆمونيسته‌يل بوی ، ئمجا له‌و جه‌نگه‌ (٦٣) كه‌س له‌ لايه‌نگره‌يل شه‌واف و (٦٢) كه‌س له‌ كۆمونيسته‌يل و (١٤١) سه‌رباز له‌(باب ئه‌لجديد) كوشيان و يه‌كمجار بوی له‌و شاره‌ ته‌رم وه‌ رويتی فڕه‌ بدريه‌يگه‌ بان جاده‌يل و له‌يوا باس كه‌ن و ئويشن له‌يوا له‌لی هات سه‌گ لاشه‌ی ئاده‌ميزاد خوارد .

وه‌هه‌ر حاڵ مه‌ردمان فره‌يگ له‌و جموجويله‌ فه‌وتيان وشه‌واف ولايه‌نگره‌يلی نه‌ڕه‌سينه‌ ئامانج خوه‌يان .