دوشمنایه‌تى پشى و مار
و فكره‌و له‌لى بكه‌یمن چوینكه خولاسه و پوخته‌ى ئه‌زموون ملله‌ته‌یله، ئى په‌نده ئویشید: (هه‌زار ڕه‌فیق داشتوید نه‌ك یه‌ك دوشمن)، چوینكه ڕه‌فیق چه‌نى فره بوود یه‌ك خه‌م دیرید؛ ئه‌ویش ئه‌وه‌سه چوین ئه‌رك ڕه‌فیقایه‌تى وه‌لیه‌و بووه‌یده ڕى و نازى بكیشید، وه‌لى خودا بكه‌م دوشمن و دوشمنكارى وه ڕیوار هویچ به‌نه‌یگ خودا نه‌ود، چوینكه ئه‌وه‌نه خه‌م و خوسه ئه‌را ئایه‌م په‌یا ئه‌كا هیلیده‌ى وه‌رجله وه‌عده‌ى خوه‌ى پیر بوود پشتى بچه‌میه‌ید و نه شه‌وى شه‌و بوود و نه ڕووژى ڕووژ و هه‌میشه هه‌ر له چه‌وه‌ڕى بوود نه‌وه‌گ تویش شه‌ڕ باید و دوشمن فرسه‌ت له‌لى په‌یا بكا و غه‌درى بكا، به‌ڵى دوشمنایه‌تى ئاگریگه و گڕه‌ى ها ناو دڵ و عومر ئایه‌م سزنید و له تام خوه‌شى ژیان بیبه‌شى ئه‌كا، و ئه‌وسا هه‌ركه‌سى بتواستیاد دوعا و نزاى گه‌ن له یه‌كیگ تر بكردیاد؛ وتیاده پى: بچوو خودا بكه‌م تویش شه‌ڕ باید... وله‌ى باوه‌ته ئه‌را نیشانداین ئاسه‌وار گه‌ن دوشمنایه‌تى وئاكامه‌یل سه‌ختى، پیشینه‌یلمان وه‌سه‌هاتیگ فره ئه‌رامان هه‌ڵوه‌سینه، تا ڕى نیشانمان بیه‌ن، و ئیمه‌یش له‌یرا یه‌كیگ له‌و وه‌سه‌رهاته‌یله ئه‌رادان هه‌ڵوژاردیمنه به‌ون بیلا بیه‌یمنه ویز ئه‌قڵ و ئاكام ئى كێشه‌ى كوومه‌ڵایه‌تى گه‌ورا بزانیمن:
جفتیار یا كشاوه‌رزیگ، له یه‌كیگ له ئاواییه‌یل خوه‌مان، یه‌ك پشییگ فره هار وهاج و مزویڕ داشت، ك فره دڕنه بوى، و مه‌ردم ئاواییه‌گه، گشتى له‌ده‌سى شكات كردیان، ك بویه مایه‌ى شه‌رمه‌زارى و په‌شیمانى ئى جفتیاره ك ئیوه‌تى كردوید، ڕووژیگ له ڕووژان وه‌ختى وه‌ره‌و شار چویاد؛ و مه‌ردم ئاوایى هه‌میشه وه شار وتیان ماڵ حكوومه‌ت ك هه‌میشه باج له مه‌ردم سینید و زندان هاتى و سه‌رباز و پۆلیس هاتى، ئى كابرایشه پشیه‌گه‌ى خسته ناو پیارزگیگ و وه‌ل خوه‌یه‌و برده‌ى ئه‌را ناو شار، تا له‌ورا وڵى بكا و له‌لى قورتار بوود... له ڕى وه‌رجله‌وه‌گ بڕه‌سیده په‌ڕ شار ڕوى كرده جوو ئاو نزیكیگ، تا كه‌میگ ئاو بخوه‌ید و له‌ناكاوا، له‌ورا له‌ودیم جووه‌گه ماریگ دى، و له ڕخا زوى زوى خوه‌ى كیشاره‌و و ئى شوونه وه فرسه‌ت خاسیگ زانست تا له پشیه‌گه‌ى قورتار بوود و بیه‌یده‌ى گژ ماره‌گه‌یا و ئنجا هات و پشیه‌گه‌ى له‌وه‌رانوه‌ر ماره‌گه وه‌ردا و دریژه دا وه ڕى كردن خوه‌ى وه‌ره‌و شاره‌گه.
ماره‌گه هیمان تویله و سه‌رگه‌رم بوى و پشیه‌گه‌یش هیمان له‌تاف جایڵ جوانى و ئه‌وپه‌ڕ تواناى خوه‌ى بوى وهه‌ردوگیان له‌ى دیم و له‌و دیم جووه‌گه وه‌رانوه‌ر یه‌كترى گردن و هویچكامیان زات ئه‌وه نه‌یاشت په‌لامار ئه‌واكه‌ى تر بیه‌ید و غیره‌تیانیش قه‌بوول نه‌كردیان مه‌یدانه‌گه ئه‌را یه‌كترى چووڵ بكردیان.
كابراى جفتیاریش وه‌ختى كاروبار خوه‌ى له‌شار ته‌واوكرد و ده‌مه‌و ئیواره وه‌ره‌و ماڵ خوه‌ى له ئاوایى كه‌فته ڕى، بڕیار دا وه‌لاى ئاوه‌گه‌یا ڕه‌د بوود و ته‌ماشا بكا له‌ورا چه ڕوى دایه و چ خه‌وه‌ره.. وه‌ختى چویه نزیكه‌و چه دى؟! ته‌ماشاكرد ماره‌گه پیر بویه و شاخ ده‌ركردیه و پشیه‌گه‌یش پیر وپاتاڵ كه‌فتیه وپشتى چه‌میاس و ئاوه‌گه‌یش له هه‌یوه‌ت مڕه‌وبردنیان له یه‌كترى هه‌ر خه‌ریكه مه‌وج ده‌ید...!!
ماجد سوره‌مێرى
