ئایا ئه‌وان له‌ زووان كوردى ترسیه‌ن؟

شفق نيوز

خوه‌رئاواو باكوور) له‌ بار نه‌گونجیاگیگ ژیه‌یگ و ڕووژانه‌هه‌وڵ ئه‌را له‌ناوبردنى دریه‌یگ  و گشت ڕییگ گیریه‌یگه‌وه‌ر ته‌نیا له‌وه‌رخاتر نه‌مه‌ندن و نه‌هیشتنى، ك له‌ خوه‌ندنگاو شوونه‌یل ئه‌كادیمى وڵاته‌یل سه‌رده‌سه‌ هه‌میشه‌ دروسكردن پیلان دژ زووان كوردى و دویره‌و خستنى یه‌كیگه‌ له‌ هه‌وڵه‌یل به‌رنامه‌دانریاگ، له‌وه‌رانوه‌ر ئه‌وه‌یشه‌ هه‌ر ئه‌و وڵاته‌یله‌ جویر توركیاو ئیران و سوریا موڵه‌ت وه‌ هه‌زاران ناوه‌ند هووكاره‌كردن زووانه‌یل بیگانه‌ دانه‌و رووژانه‌ جایه‌ڵ جوانه‌یلیان بڕیگ پویل ته‌رخان كه‌ن ئه‌را یایگرتن ئه‌و زووانه‌یله‌، وه‌لى دوینید وه‌ چه‌واشه‌وه‌ ئه‌را كورد نه‌ هه‌ل ئه‌وه‌ دریاسه‌پیان بتویه‌نن زووان بیگانه‌ یاى بگرن نه‌یش تویه‌نن زووان داڵگى خوه‌یان بارنه‌ ده‌س.

له‌یرا بایه‌سه‌ وڵاته‌یل داگیركه‌ر كوردستان بخریه‌نه‌ وه‌رده‌م پرسیاره‌وه‌، ك ئه‌ویش ئه‌وه‌سه‌ ئایا ئه‌وان ڕاسه‌ له‌زووان كوردى و گه‌شه‌كردن و په‌ره‌سه‌ندن ئى زووانه‌ ترسیه‌ن؟ ئایا وه‌ڕاسى ئى زووانه‌ تویه‌نیگ وه‌ماوه‌ى كه‌میگ بووگه‌ ئه‌و هووكاره‌ ك هه‌ڕه‌شه‌ له‌ ئاسایش ئه‌وان بكا، یا نه‌خه‌یر ئه‌وان له‌بنه‌ڕه‌ته‌وه‌ باوه‌ڕ وه‌ وجوود ئازادى و جموجویل ئازادانه‌ نه‌یرن؟ ئنجا ئه‌گه‌ر مه‌سه‌له‌گه‌ له‌یواسه‌ دى له‌وه‌رچه‌ بایه‌سه‌ وڵاتیگ وه‌ك توركیا ده‌رفه‌ت به‌یگه‌ هووكاره‌بوین زووانه‌یل بیگانه‌، وه‌لى له‌باوه‌ت زووان كوردیه‌وه‌ گشت ڕى وشوونیگ بگریگه‌وه‌ر ئه‌را ئه‌وه‌ك ئى زووانه‌ نه‌تویه‌نیگ گه‌شه‌ بكا.

له‌یرا له‌ مامڵه‌ى وڵاته‌یل داگیركه‌ر هس وه‌ وجوود دوڕویى ئاشكرایگ كریه‌یگ ، ئنجا له‌ى ڕویه‌وه‌ ك ئه‌و وڵاته‌یله‌ نیگه‌ران خوه‌یان كردنه‌و گشت قه‌یه‌غه‌كردنیگ له‌بان زووان كوردى دانانه‌، گوایا ئاسایش زووان و نه‌ته‌وه‌و خاك و كومه‌ڵگایان كه‌فیگه‌ مه‌ترسیه‌وه‌و له‌لایگ تریشه‌وه‌ هه‌زاره‌ها ناوه‌ند هووكاره‌كردن زووانه‌یل بیگانه‌ واز كردگه‌و ئه‌را بان ئاسایش زووان وه‌ مه‌ترسى نیه‌زاننه‌ى!!

له‌یوا دیاره‌ ترس ئه‌و وڵاته‌یله‌ زووان كوردى نه‌وگ، به‌ڵكوو كپه‌وكردن زووان كوردى ئه‌را ئه‌وان به‌شیگ بووگ له‌ پیلان له‌ناوبردن یه‌كجاره‌كى كورد، ئنجا له‌وه‌یش گام یه‌كه‌میان وه‌ په‌لامارداین مه‌عنه‌وى ده‌س وه‌پیكردو جویر گشت جاریگ دویاخر ده‌سكردنه‌ په‌لامار لاشه‌یى.

ئه‌و وڵاته‌یل ئسلامیه‌ ك كورد له‌ بانیان دابه‌ش كریاگه‌، گشت باوه‌ت و رویداگه‌یل جه‌هانى خه‌نه‌ چوارچیوه‌ى قسه‌و دیدیگ ئسلامیانه‌وه‌، تا ره‌سیگه‌ ئه‌و وه‌خته‌ ك مه‌سه‌له‌گه‌ تیه‌یگه‌ بان كورد، ئنجا له‌یرا بیده‌نگ بوون و قاڵبه‌گه‌ى ئاڵشت كه‌ن، وه‌نا زووان كوردى وه‌ك گشت زووانه‌یل تر خودا داسه‌ى نه‌ته‌وه‌ى كورد، وه‌لى له‌وه‌ر ئه‌وه‌ك زووان كورده‌، وڵاته‌یل داگیركه‌ر ئه‌و كوفره‌ كه‌ن و باوه‌ڕ وه‌پى نیارن.