كورد و مه‌سه‌له‌ى هاوپه‌یمانى وه‌ل شیعه‌

شفق نيوز

 

سه‌دریه‌یل هه‌وڵ ئه‌وه‌ ده‌ن هاوپه‌یمانییان وه‌ل حه‌كیم بكه‌نه‌ هاوپه‌یمانییگ ستراتیجى و له‌ى رویه‌و سه‌در له‌ بانگه‌وازیگ ئاماژه‌ وه‌ ئه‌وه‌دا ك بڕیار داگه‌ هاوپه‌یمانیه‌گه‌ بكاده‌ هاوپه‌یمانییگ ستراتیجى، وه‌لى ئیسه‌ هاوپه‌یمانیه‌گه‌ى ناونى ئى دو گرووپه‌ جوور هاوپه‌یمانییگ تاكتیكیه‌، وه‌تایبه‌ت دویاى بڕیگ سه‌ركه‌فتن ك له‌باوه‌ت دابه‌شكردن ده‌سڵات له‌ ئه‌نجوومه‌ن پاریزگایه‌یل هاته‌سه‌ دى و له‌وانه‌یش پاریزگاى به‌غدا ك هاوپه‌یمانیه‌گه‌ تویه‌نستگه‌ پۆست پاریزگار و پۆست سه‌رۆك ئه‌نجوومه‌ن پاریزگاگه‌ له‌ ده‌وڵه‌ت یاساى مالكى بسینیده‌و.

له‌ دویاى رمیان رژیم وه‌رین، بار عراق وه‌ره‌و ئه‌وه‌ گام نا ك ئه‌رگ سه‌رله‌نوو دامه‌زراننه‌وه‌ى عراق بكه‌فیده‌ مل كورد و شیعه‌، ك له‌ى روییشه‌و بڕیگ به‌رژه‌وه‌ندى و دید هاوبه‌ش بوینه‌ مایه‌ى له‌ یه‌ك نزیكه‌وبوین كورد و شیعه‌، وه‌لى وه‌ كرده‌وه‌ هاوپه‌یمانى كورد و شیعه‌ نه‌ تاریخیه‌و نه‌ ستراتیجى.

ئى هاوپه‌یمانیه‌ هاوپه‌یمانییگ نویسریاگ نیه‌، هویچ خاڵبه‌ندییگ ئه‌راى نه‌كریاگه‌و هویچ چوارچیوه‌یگ یاسایى یا سیاسى نه‌یریدو له‌هه‌مان وه‌خت وه‌ كرده‌وه‌یش روخساریگ پاك و ئاشكرا نه‌یرید. هه‌ر له‌وه‌ر ئه‌وه‌یش ئویشیم ئى مه‌سه‌له‌ له‌ شیوه‌ى هاوپه‌یمانى نیه‌و جوور هاوپه‌یمانییگ تاكتیكیه‌و هویچ سیمایگ ستراتیجى نه‌یرید.

ئى جوور تاریفیگ و ئاشناكردنیگ ، له‌یوا له‌و ره‌سینه‌وه‌ ئه‌كا ك په‌یوه‌س بوود وه‌ بار سیاسى و بوودیش جوور هه‌ر دیارده‌یگ كوومه‌ڵایه‌تى و سیاسى له‌ هه‌ل ومه‌رجیگ دیاریكریاگ خوه‌ى بكیشیده‌وه‌و له‌ وه‌خته‌یل تر په‌ره‌ بسینید، یه‌یش وه‌و ماناسه‌ ك دیارده‌ى له‌یه‌كڕه‌سینه‌وه‌ى كورد و شیعه‌ دیارده‌یگ گونجیاگ وه‌دیهاوردن و وه‌رده‌وامبوینه‌و له‌هه‌مان وه‌ختیش گونجیاگ خودكیشانه‌وه‌و تاواننه‌وه‌س.

ئنجا ئى جووره‌ له‌یه‌كڕه‌سینه‌وه‌یله‌ ئه‌وه‌نه‌ په‌یوه‌سن وه‌ به‌رژه‌وه‌ندى ماددیه‌و، ئه‌وه‌نه‌ په‌یوه‌س نین وه‌ خواست و ئاره‌زوو، هه‌ر له‌وه‌ر ئه‌وه‌یش ئى مه‌سه‌له‌ بایه‌سه‌ له‌و دیده‌و ته‌ماشا بكریه‌ید ك ئایا چه‌نیگ خزمه‌ت وه‌ به‌رژه‌وه‌ندیه‌یل هه‌ردوگلا ره‌سنیدو تا چه‌نیگ تویه‌نید مقه‌یه‌تى له‌ ئاشتى بكا؟، چوینكه‌ بنه‌ماى هویچ هاوپه‌یمانى و له‌یه‌كڕه‌سینه‌وه‌یگ نیازپاكى نیه‌، به‌ڵكوو به‌رژه‌وه‌ندى ماددیه‌.

فه‌رید ئه‌سه‌سه‌رد

ج . أ