كورد و عراق و نه‌خشه‌ى هاوبه‌شى

شفق نيوز

وه‌ مه‌هانه‌ى مقه‌یه‌تیكردن شارستانیه‌ت دینى و مێژوویى دووڵ دوچه‌مان، گشتیان هاوڕا بوین له‌بان یه‌كپارچه‌یى خاك عراق و وه‌عه‌ره‌بكردن ناسنامه‌گه‌ى، هه‌ر له‌وه‌ر ئه‌وه‌یش وه‌ دریژایى ئه‌و مێژووه‌ ده‌سڵات و ئداره‌كردن وه‌ل هه‌ڵكه‌فت كوومه‌ڵایه‌تى پێكهاته‌یلیا نه‌گونجیاگه‌و دى وه‌ جووریگ ناهاوسه‌نگى سیاسى به‌رجه‌سه‌ كردگه‌ ك هه‌میشه‌ بار سیاسى ئى عراقه‌ له‌ به‌رزى و نزمى و ناجیگیر و نائارامى بویه‌و فره‌جاریش كیشمه‌كیش دروس كردنه‌ له‌ ناونى پێكهاته‌یل كوومه‌ڵایه‌تى و كردگه‌سه‌ى به‌شیگ له‌ كلتوور یه‌ك سه‌ده‌ى گوزه‌یشته‌ى ئى عراقه‌ له‌ هویر تاك عراقى و بیجگه‌ ئه‌وه‌یش له‌ناو په‌یڕه‌وه‌یل ئه‌ده‌بى و رووشنهویرییش ره‌نگه‌و داگه‌.

 

عه‌لى وه‌ردى نویسه‌ر گه‌وراى عراقى ئویشێد: گشت رژیمه‌یل عراق مقه‌یه‌تیكردن ناسنامه‌ى عه‌ره‌ب عراق كردنه‌سه‌ ته‌رازوى كیشانه‌ى سه‌نگ نیشتمانپه‌روه‌رى نویسه‌ره‌یل عه‌ره‌ب و عراقى. هه‌ر له‌وه‌ر ئه‌وه‌یش وه‌ دریژایى مێژوو پڕ كاره‌سات و خویناوى عراق مه‌گه‌ر جارنه‌جاریگ نویسه‌ریگ عراقى بوینیاتاید ك سووزدارى و پشتگیرى نه‌یاشتاد ئه‌را شۆفینیزم عه‌ره‌بى.

 

مێژوو عراق و دروسبوین ده‌وڵه‌ته‌گه‌ى نا ئاساییه‌، چوینكه‌ له‌ ده‌یشت خواست پێكهاته‌یل نه‌ته‌وه‌یى و دینى نه‌خشه‌ى مه‌رزى ئه‌ڕاى كیشیاگه‌، ئه‌وه‌سه‌ مێژوو گوزه‌یشته‌ى ئى عراقه‌ شایه‌ته‌ له‌بان ئه‌وه‌ك هه‌ر وه‌ختیگ ته‌رازوى هێز وه‌لاى شۆفێنیه‌یل عه‌ره‌با سه‌نگین بویه‌، ئه‌وه‌ هه‌وڵ داگیركارى و كوشاننه‌وه‌ى موور نه‌ته‌وه‌یى كورد دانه‌ وه‌بى ئه‌وه‌ك په‌یوه‌ندى برایانه‌و دووسانه‌و ئاشتیانه‌ى ملله‌ت كورد و زووان شه‌راكه‌ت و ژیان هاوبه‌ش له‌وه‌رچه‌و بگرتیان.

 

دیاره‌ جیاوازى ناونى ئى دو هویر و ته‌وه‌ر دید كوردو عه‌ره‌بیشه‌ جاریگتر له‌ كرده‌وه‌ى سیاسى رویوه‌ڕوى یه‌كترى بوینه‌سه‌وه‌و كورد ناچار كردگه‌ ك وه‌ مه‌رام مقه‌یه‌تیكردن وجوود و قه‌واره‌ى نه‌ته‌وه‌یى خوه‌ى و جوور جوواویگ ئه‌را ره‌ته‌وكردن ژێرده‌سه‌یى و داگیركارى و ته‌كڕه‌وى و تونڕه‌وى هه‌ڵوێست خوه‌ى وه‌ربگرێد، وه‌لى وه‌ل ئه‌وه‌یشا كورد له‌ خودبه‌ساننه‌وه‌ى خوه‌ى وه‌ حكوومه‌ت مه‌ركه‌زى و مقه‌یه‌تیكردن یه‌كپارچه‌یى خاك عراق ئه‌وه‌سه‌ تا ئیسه‌یش دویاى چه‌نه‌ها ساڵ له‌ پرۆسه‌ى ئازادكردن عراق و ئه‌و هه‌مگه‌ هه‌وڵ كورده‌ ئه‌را وه‌ دیمۆكراسیه‌تكردن سیستم سیاسى عراق، ئه‌وه‌سه‌ جاریگ تر سیناریۆى سیاسى له‌ سه‌راو شارستانیه‌ت دجله‌ دوباره‌بوینه‌وه‌ى مێژوو سیه‌ى گوزه‌یشته‌ هاورده‌و و  مالكى و گرفت هێز و پێكهاوردن ئۆپه‌راسیۆن دجله‌ گرنگى و سه‌نگیگ نیه‌یلێده‌و ئه‌را گوزه‌یشته‌ى هه‌ڵوێست نیشتمانى كورد و عراق تازه‌و ئه‌و ده‌ستووره‌ ك زه‌مانه‌ت یه‌كپارچه‌یى خاك عراقه‌.

 

عه‌تا شێخ حه‌سه‌ن

ج. ا