رووشنهویرى بنه‌ڕه‌ت پیشكه‌فتنه‌

شفق نيوز

بویشیم له‌ى چه‌رخ تازه‌ رووشنهویرى نیشانه‌ى ئسباتكردن تواناى فكرى و ئه‌ده‌بى و كوومه‌ڵایه‌تیه‌و له‌هه‌مان وه‌خت ده‌رخستن ره‌فتار گونجیاگیگه‌ له‌وه‌ر خاتر وه‌دیكردن ڕیگه‌ى بى پیچ وپه‌ناى ژیان، چوینكه‌ رووشنهویرى جوور یاساو ده‌ستووریگ تاریف ئه‌كریه‌ێدله‌ئه‌نجام ئه‌زموون پیشكه‌فتگ و گشت ئه‌خلاق و داب ونه‌ریتیگش گرێده‌ خوه‌ى. وه‌لى ئایا ئیمه‌ى كورد هه‌وه‌جه‌ وه‌ رووشنهویر زیاتر دیریم یا هه‌وه‌جه‌ وه‌ رووشنهویرى زیاتر!؟ جوواو ئى پرسیاره‌ پاك و ئاشكراس، چوینكه‌ یه‌كه‌مجار وه‌خت و زه‌مانه‌ى رووشنهویر شووڕشكار ئاڵشتكارى فره‌یگ وه‌خوه‌یه‌و دیه‌ ك خوازیار ئه‌وه‌سه‌ وه‌ل دونیاى سه‌رده‌ما بجویلیه‌ید وه‌ره‌و نك سه‌ركه‌فتن و باوه‌ڕ وه‌ واقع بكا. ئیسه‌ رووشنهویر نه‌ تویه‌نێد له‌ ڕى ونه‌خشه‌ى ماركسیه‌ت واقع دونیا ئاڵشت بكاو نه‌یش رووشنهویرى رۆمانسیت تویه‌نێد ده‌رد ملله‌تیگ سته‌مدیده‌ چاره‌ بكاو دونیاى ئیمه‌ى كورد جوور ئه‌وه‌ك خوه‌مان خوازیم شیه‌و بكا، ئیمه‌ فره‌جار له‌ژیر ئه‌و چه‌تره‌ ك فكره‌ى ده‌ره‌كى بوى و هاوریا مه‌رز ئه‌قڵه‌و زه‌ره‌دمه‌ند بویمنه‌و بویه‌ زه‌نگ مه‌ترسى ئه‌ڕا دویاڕووژ ملله‌ته‌گه‌مان، هه‌ر له‌وه‌ر ئه‌وه‌یش به‌شبه‌ش و چینچینه‌و بویمن و خه‌بات خوه‌مان كردیمنه‌ قوربان ریڕه‌و بیگانه‌یل و كه‌فتیمنه‌ ناو شووڕش مه‌رگه‌سات ك وه‌خت فره‌یگ له‌ده‌سمان داو چاره‌نویس خوه‌مان دایمنه‌ ده‌س ئه‌و كاروانه‌یل دویاكه‌فتگه‌، ئمجا له‌یره‌ ئه‌وه‌ ده‌ركه‌فت ك رووشنهویرى بنه‌ڕه‌ت پیشكه‌فتنه‌.

 

فره‌یگ له‌رووشنهویره‌یل كوردمان تا ئیسه‌یش داستان ئه‌و شووڕشكاره‌یل كووتایى وه‌پیهاتگه‌ باس كه‌ن و هیمان وه‌ئه‌قڵ و مه‌نتقه‌و نه‌هاتنه‌سه‌ ناو كاروان دیموكراسى ك سیستم چاره‌نویسسازیگه‌ له‌گشت دونیاو ئه‌زموون سه‌ركه‌فتگیگه‌و هه‌ق له‌تى دیارو ئاشكراس. وه‌ل ئه‌وه‌یشا هیمان بڕیگ له‌رووشنهویره‌یلمان ك خوه‌یان وه‌خاوه‌ن قه‌ڵه‌م زانن و باس له‌دونیاى پیشكه‌فتگ و مۆدێرن كه‌ن، كه‌م و كوڕى و لایه‌نگرى و كینه‌ت فره‌یگ له‌لایان جه‌مه‌و نیه‌گه‌ردنه‌ شوون به‌رژه‌وه‌ندى و ژیان هاوبه‌شیگ دویر له‌كیشه‌و گرفت، ئه‌وه‌ك ئمڕوو دوینرێه‌ید ته‌نیا شماره‌ى كه‌میگه‌ له‌و رووشنهویره‌یله‌ ك هه‌گبه‌ى رووشنهویرى ئه‌ڵگرتنه‌، چوینكه‌ فره‌یگ له‌رووشنهویره‌یل ك ته‌نیا وه‌ناو رووشنهویرن له‌چوارچیوه‌ى سووزدارى ژیه‌ن و مه‌رامیان ئه‌وه‌سه‌ مه‌ردمان ساده‌ سه‌رسام بكه‌ن وه‌هویر و باوه‌ڕ جیاخوازى و باس دویاڕووژیگ خوه‌ننه‌ ئه‌قڵیان ك هیمان نیه‌زانن ڕاز ئه‌و دویاڕووژه‌ چه‌س! بڕیگیش له‌لیان نیشتنه‌سه‌ وه‌ر شاشه‌ى كۆمپیوته‌ر و هه‌ر خه‌ریك خراوداین و ناونیتگن له‌ ئه‌ى وئه‌و ك بیئاگان له‌وه‌ك وه‌ى ره‌فتاره‌ زه‌ره‌ر ره‌سننه‌ به‌رژه‌وه‌ندى گشتى و رووشنهویرى و كلتوور كوردى.

بیگومان جویر ئه‌وه‌ك ئاشكراس فره‌یگ له‌رووشنهویره‌یل كوردمان له‌دونیایگ بى باوه‌ڕ و شیوازیگ ژیه‌ن ك ده‌سكرد خوه‌یانه‌، رووشنهویر ئیمه‌ بایه‌سه‌ ئیسه‌ وه‌ دڵ وگیان واز له‌زوورانبازى سه‌خت و پاچقوله‌داین یه‌كترى بارن و گشتیان وه‌یه‌كه‌و جه‌نگ پیشكه‌فتن بكه‌ن و له‌دونیاى خه‌یاڵى بچنه‌ ده‌یشت و گام وه‌ره‌و دونیاى واقع بنه‌ن و نه‌خشه‌ ئه‌را ژیان و چاره‌نویس هاوبه‌ش بكیشن.

ئیمه‌ى كورد ئیسه‌ هه‌وه‌جه‌ وه‌جموجویلیگ ئاقڵانه‌و شووڕشیگ رووشنهویرى دیریم وه‌ هه‌وڵ و ته‌قلاى یه‌كگرتگ رووشنهویره‌یل جویر شووڕش رووشنهویره‌یل كوومه‌ڵگاى فه‌ره‌نسى ك بویه‌ مایه‌ى له‌ناوبردن جیاوازى و ده‌سكه‌فتن یه‌كسانى له‌ئۆروپا.

ئه‌گه‌ر رووشنهویر ئیمه‌ى كورد وه‌رجه‌ ئه‌وه‌ك خوه‌یان وه‌ رووشنهویر بزانن خواست رووشنهویرى له‌یه‌كه‌و بیه‌ن و له‌ماناگه‌ى بڕه‌سنه‌و، ئه‌وه‌ بیگومان ئیمه‌یش جوور ملله‌ته‌یل تر دونیا ئه‌را هه‌ر پیشكه‌فتنیگ ده‌سه‌و زرانى نیه‌وسیه‌یم و گشت وه‌ختیگ تویه‌نیم گام زیاتر بنه‌یم و هه‌ر له‌ئیسه‌و ده‌س بكه‌یمنه‌ شووڕش پیشه‌سازى و شانازى وه‌ كاڵاو چشته‌یل ده‌سكرد خوه‌مان بكه‌یم. چوینكه‌ رووشنهویرى فره‌جار  له‌وه‌كارخستن باوه‌ڕ و ئه‌قڵه‌و سه‌رچه‌وه‌ گرێد ئه‌را ئه‌نجامداین هه‌ر پرووژه‌و كاریگ . بیجگه‌ ئه‌وه‌یش رووشنهویر ئیمه‌ بایه‌سه‌ ئه‌وه‌یش بزانن ك ئى ده‌سكه‌فته‌یل ئمروو كوردستانه‌ موڵك گشت لایگمانه‌و بایه‌سه‌ مقه‌یه‌تى له‌لى بكریه‌ێدو هه‌وڵ زیاتر ئه‌ڕاى بیه‌ن وه‌یه‌كه‌و.

 

جه‌ماڵ ئه‌ركه‌وازی