له‌ سه‌ركار لاوردن نوجێفی ، بڕیارێگ بوێرانه‌س و نیاز وه‌ ره‌ئی قه‌زا دێرێ

شفق نيوز

شه‌رمه‌زار كردن نوجێفی له‌ لاێه‌ن په‌رله‌مانه‌وه‌ ، وه‌خاتر وه‌رگری نه‌كردن له‌ پارێزگاگه‌ێ ژێر ده‌سڵاتێ ، نیاز وه‌ئه‌وه‌ دێرێ ده‌زگاێ قه‌زایی له‌ ڕوێ یاساوه‌ سزاێ بیه‌ێگ تا دادپه‌روه‌ری له‌و تاوانه‌ به‌رجه‌سته‌ بدێ و ئه‌ڕا هاوڵاتییش ئاشكراوه‌ بووگ ك چ تاوانێگ له‌ هه‌ق ملله‌ت و نیشتمان ئه‌نجام دریاگه‌.

بڕیاره‌گه‌ێ په‌رله‌مان ته‌نیا ده‌روه‌چه‌ێگه‌ ئه‌ڕا له‌ یه‌كه‌و داین تاوانه‌گه‌ و واز كردن درانه‌ێ ده‌زگاێ قه‌زایی ئه‌ڕا هه‌ر كه‌سێگ ك له‌ پروسه‌ێ ڕمیان پاریزگاگه‌ ده‌س داشتگه‌ و بێ گومان ئه‌سیل نوجیفی وه‌ته‌نیا نه‌بایه‌د سزای ئه‌و تاوانه‌ بكیشێ ، به‌ڵكم بایه‌د تیم ده‌سڵات ئه‌وانه‌گ هاوكار و هاوده‌سێ بوێنه‌ وه‌تایبه‌ت هێزه‌یل سوپا و پولیس لێپرسینه‌وه‌ وه‌لیان بكریه‌ێ.

هه‌ر وه‌ی خاتره‌ قه‌زا باێه‌د ده‌سنیشان بكه‌ێگ ك كی باێه‌د سزاێ توند بدریه‌ێ و كی سزاێ سوك ، تا قه‌زار بدێده‌ چاودیر ڕاسه‌قینه‌ێ جیوه‌جی كردن یه‌كسانی و یاسا له‌ بان هه‌ر كه‌سێگ ك ته‌خسیر له‌ ئه‌رك و مه‌سئولیه‌ت خوه‌ێ بكه‌ێگ ، چ له‌ ڕێ پشت گوش خستن وه‌رپرسیاری و چ له‌ ڕێ خیانه‌ت.

تاوان كه‌فتن موسل و ئدانه‌ كردن ئه‌سیل نوجێفی ، قاپی له‌ ڕوێ سه‌رجه‌م ئه‌و كه‌سه‌یلیشه‌ واز كه‌ێگ ك بوێنه‌سه‌ هوكار داگیر كردن ئه‌نبار له‌ لاێه‌ن داعشه‌وه‌ و سزا داینیان ، له‌وه‌ر ئه‌وه‌گ خیانه‌ته‌گه‌ێ ڕومادی كه‌متر له‌ هنه‌گه‌ێ موسل نییه‌.

له‌وه‌ر ئه‌وه‌گ باس خیانه‌ت و كه‌م كاری و گه‌ناته‌ كاری له‌ ده‌زگای سه‌ربازی ئه‌كریه‌ێ ، باێه‌د له‌ هوێرمان نه‌چوگ ك گه‌ناته‌كاری و رشپه‌ت و چه‌پاو كردن دارایی گشتی و فروشتن پله‌ سه‌ربازیه‌گان وه‌پوێل حه‌رام ، هوكار سه‌ره‌كی داڕمیان ده‌مه‌زاروه‌ سه‌ربازیه‌گان له‌ نه‌ینه‌وا و ئه‌نبار بوێه‌ ، ئیمه‌ چوێن توێه‌نیم له‌ سه‌رباز داوا بكه‌یم ك موخلس و وه‌فادار بووگ ئه‌ڕا خاك و نیشتمان ، له‌وه‌ختێگ وه‌چه‌و خوه‌ێ دوێنێ ك كاروه‌ده‌سه‌یل وه‌زاره‌یل و په‌رله‌مانتاره‌یل و فه‌رمانبه‌ره‌یل پله‌ به‌رز ده‌زگا حكومیه‌گان ، ڕشپه‌ت خوه‌ن و سه‌روه‌ت و سامان گشتی دزن و چه‌پاو كه‌ن وه‌شێوازه‌یل جور وه‌ جور.

ماقوڵ نییه‌ ئیمه‌ له‌ سه‌ربازه‌یل بخوازیم ك پاك و فداكار بوون له‌وه‌ختێگ زورم كاروه‌ده‌سه‌یل سه‌رقاڵ دزی و چه‌پاو كردن هه‌ر چشتێگن ك بكه‌فێگه‌ وه‌رده‌سیان. ئه‌و ملیونه‌یله‌ ك چنه‌ گیرفان دزه‌یل و خاره‌تكاره‌یل سه‌روه‌ت و سامان گشتێ بویه‌سه‌ هوكار داڕمیان دامه‌زراو سه‌ربازیه‌گان ، ئه‌را چه‌ ئه‌فسه‌ره‌یل سوپا و پولیس ، پله‌ و پایه‌ سه‌ربازیه‌گان و چه‌ك و ته‌قه‌مه‌نی خوه‌یان نه‌فروشن ، وه‌ختێگ له‌ وه‌رچه‌ویان نه‌فت وه‌تانكه‌ره‌یل گه‌ورا له‌ لاێه‌ن فولان وه‌رپرسه‌وه‌ وه‌ قاچاخ فروشیه‌ێ یا پروژه‌گان خزمه‌تگوزاری و ئاوه‌دانی درێه‌ێگه‌ فوڵان كاروه‌ده‌س؟

نواگردن له‌ گه‌ناته‌كاری و كاركردن ئه‌ڕا ئه‌وه‌گ ئایم گونجیاگ له‌ شوون گونجیاگ دانرێه‌ێ و به‌شه‌و نه‌كردن پوست و وه‌رپرسیاریه‌تیه‌گان له‌ ناونی قه‌وم و كه‌سوكار ، یه‌كمین گامه‌ ئه‌ڕا چاره‌سه‌ر كردن گه‌ناته‌ كاری له‌ ده‌زگا حكومیه‌گان ، تا گشت نیشتمان ئه‌ڕا گشت هاوڵاتیه‌یل بووگ و پاراستن سه‌روه‌ت و سامان گشتێ بووگه‌ به‌شێگ له‌ ئه‌رك گشتێ و ئداری و یه‌یش وه‌رپرسه‌یل مه‌ده‌نی و سه‌ربازی هان ده‌ێگ ك ماڵ و گیان بكه‌نه‌ فیدای نیشتمان ، وه‌لێ ئه‌گه‌ر وه‌رپرس مه‌ده‌نی خوه‌ێ دزی و چه‌پاو بكه‌ێگ ، چوێن باێه‌د چه‌وه‌ڕی ده‌سپاكی له‌ فه‌رمانده‌ سه‌ربازیه‌گان بكه‌یم؟

پاكی و دادپه‌روه‌ری ده‌زگاێ قه‌زایی وه‌ بێهوده‌ نیه‌تێه‌ێگه‌دی ، یاسا و یه‌كسانی كومه‌ڵگا وه‌یه‌كه‌وه‌ په‌یوه‌سن ، نێه‌كرێه‌ێ قه‌زا له‌ واقع ئداری و كومه‌ڵایه‌تی و سیاسی جیاوه‌ بكریه‌ێ ، ئه‌و گه‌ناته‌ كاریه‌ ك سه‌رجه‌م ده‌زگا سیاسی و ئداریه‌گان گردێه‌سه‌وه‌ر ، ده‌زگاێ قه‌زاییش گرێگه‌وه‌ر و قازییش جور هه‌ر فه‌رمانبه‌رێگ ته‌قالا ئه‌ڕا ڕشپه‌ت سه‌نن و چه‌پاو سه‌روه‌ت و سامان گشتێ كه‌ێگ ، مه‌گه‌ر ژماره‌ێ كه‌مێگیان وجدانیان ته‌كان بخوه‌ێگ له‌ێ ئاشوفته‌ بازاڕه‌. عه‌ره‌ب وه‌ته‌نی (مه‌ردم چنه‌ بان ئاین پادشایه‌یلیان).

موئه‌یه‌د عه‌بدولسه‌تار

ج ك