لاوازيمان وه‌ل سه‌ختترين جه‌نگ ئاينده‌

عه‌لى  حسێن فه‌يلى

شه‌فه‌ق نيوز/ تاريف تايبه‌تيگ ئه‌را دڵته‌نگى كورده‌يل فه‌يلى هه‌س، ك ئه‌ويش هانده‌ريگه‌ ئه‌را له‌ناوبردن ئه‌و نائوميديه‌ ك له‌بانمان چه‌سپياگه‌، ك هه‌رچه‌نى ناڕه‌حه‌تيه‌يلمان نمونه‌يگه‌ ئه‌را دڵته‌نگى ئه‌زه‌لى هه‌ر له‌ سه‌ره‌تاوه‌، ئى پيشه‌كييشه‌ ده‌روازه‌يگه‌ ئه‌را داخڵبوين وه‌ ديداريگ ك گردمه‌و كرد وه‌ل مامۆستا يه‌دوڵڵا كه‌ريم كه‌سايه‌تى ناسرياگ و قه‌دردار له‌ پيكهاته‌گه‌مان ك وه‌ دريژايى ده‌يان ساڵ له‌ به‌رهه‌م و ئه‌زموونه‌يلى بڕيگ شاره‌زايى سياسى وه‌ گفت ئه‌را كاره‌گه‌مان باسكرد له‌ قوناغيگ له‌ رووژگار ك له‌تى گشت مه‌ردم وتيان كيشه‌ى كورده‌يل فه‌يلى ها وه‌رده‌وامى قه‌يران قسه‌كه‌ر فه‌رمى و كه‌سانتر و كيشه‌ى ئيمه‌ له‌ جاده‌ دويره‌و كه‌فت، هه‌ر وه‌ختيگيش قسه‌ له‌بانى ئه‌كه‌يم يا باسى ئه‌كه‌يم دوباره‌وه‌ ئه‌دێ له‌ بانمان، وه‌لێ ئمڕوو كيشه‌گه‌مان چيه‌سه‌ ناو پێوه‌ره‌يليگ تازه‌و كاريگه‌ر، ك ئه‌گه‌ر ئه‌وه‌گ له‌لى په‌يوه‌س بوود وه‌ بوار فكرى ئه‌رامان بڵاو بكريه‌ێد جوور جاران موسته‌غرب نيه‌ و مه‌ردميش چه‌وه‌ڕى به‌رهه‌م له‌ليمان ئه‌كا له‌باره‌ى كيشه‌گه‌مان وه‌ ده‌رخستن تازه‌و گونجياگ ك بگونجيه‌يد وه‌ل چه‌رخ پيشكه‌فتن فكرى وه‌ل مه‌ردمان تر.

 

كه‌ريم وه‌ل ئه‌وه‌يشا وت: وه‌بى موجامله‌، شه‌فه‌ق رۆڵ سه‌ره‌كى ديرێد ئه‌را ره‌سانن كيشه‌گه‌مان وه‌ مه‌ردم.

 

له‌يرا قسه‌ له‌بان وته‌يل مامۆستا كه‌ريم ئه‌كه‌م و له‌باوه‌ت پيكهاته‌گه‌مان ئه‌تويه‌نيم بويشيم جوانى ژيان ها ئوميده‌و نه‌ك دڵته‌نگى، ئيمه‌ نه‌چويچيايمه‌، وه‌لێ هه‌ميشه‌ ئه‌ياكه‌مان ماڵئاوايى له‌واكه‌مان ئه‌كا وه‌ ئوميد ديدار، ئيمه‌ له‌ وڵاتيگ ژيه‌يم يه‌ك مين له‌تى كاڵيه‌ێد، ئمجا وه‌گووره‌ى شاره‌زايه‌يل خه‌رج دارايى ئه‌و مينه‌ وه‌ 3 دۆلار مه‌زه‌نه‌ ئه‌كريه‌ێد، ئه‌را پويچه‌ڵكردنيشى هه‌وه‌جه‌ وه‌ 1000 دۆلار ديرێد، يه‌يش واقعمانه‌ وه‌ل خه‌رج ئه‌و ژيانه‌ ك گوزه‌رى ئه‌كه‌يم، ئه‌گه‌ريش بنوڕيمنه‌ خوه‌شبه‌ختيه‌و له‌لايه‌ن مامۆستا، دوينيم رويداگيگ تازه‌ له‌باره‌ى ده‌زگاى شه‌فه‌ق نيه‌، به‌ڵكوو حه‌سر بوود له‌ خانه‌ى ناچارى خاترات له‌ وه‌ختيگ ك ئى ماناو ئحساسه‌ له‌تى فه‌رامووش كرديم.

 

ئى ده‌زگا له‌ڕوى زانستى و هه‌يكه‌ڵه‌و ئه‌تويه‌نيم وه‌ كارخانه‌يگ ته‌شبيهى بكه‌يم، وه‌لێ جياوازه‌ له‌ به‌رهه‌م و ئه‌گه‌ر تيم كاريش ئه‌و كارخانه‌ بيشتانه‌ جى، ئه‌وه‌ ئه‌و باڵه‌خانه‌ وه‌ هه‌مان ناونيشانه‌ پيشه‌سازيه‌گه‌ى مه‌ند، وه‌لێ ئه‌گه‌ر ده‌زگايگ ره‌سانن كارگه‌ره‌يلى ناچار بوين وه‌رده‌وامى له‌تى نه‌يه‌نه‌ كاره‌گه‌يان، ئه‌وه‌ ئه‌و باڵه‌خانه‌ چووڵ ئه‌دێ، ئى روێداگ پڕ ژانيشه‌ هاته‌ تويش ده‌زگاگه‌ له‌ وه‌ختيگ وه‌بى ئه‌و بى نيشتمان مه‌نديم له‌ڕوى له‌ده‌سداين بنايه‌ نه‌ك فكر و ئيراده‌ى كار، په‌ياممانيش هه‌ر له‌ سه‌ره‌تاى دامه‌زرانن تا رووژ ئمڕوو هه‌ر به‌رهه‌م بوى، وه‌لێ چنينى هيليمنه‌و ئه‌را موخاتب وه‌ ئنتماو رينمايه‌يل جياجياى.

 

چه‌نه‌ها جار له‌ گوزه‌يشته‌ گوزاره‌ى خوه‌ندنگا ئه‌را ده‌زگاى شه‌فه‌ق هاوريا كار، وه‌لێ ئمڕوو ئى گوزاره‌ مونسه‌جم وه‌ل حاڵه‌ت ئيسه‌ ك له‌تى ژيه‌يم، چوينكه‌ خوه‌ندنگا وه‌بى مامۆستاو خوه‌ندكاره‌يل جوور ئه‌وساى خوه‌ى نامينێد و ده‌زگاگه‌يش وه‌بى كادر جوور خوه‌ى نامينێد، ئيمه‌ ئه‌وه‌ له‌ هويرمان ناچێد ك هايمنه‌ جه‌نگ له‌ چه‌ن لايگه‌و له‌وانه‌يش جه‌نگ وه‌ل ترۆر و جه‌نگ ناونى تايفه‌و مه‌زه‌وه‌يل و جه‌نگ ناونى نه‌ته‌وه‌يل و كيشمه‌كيش داواكارى مافه‌يل، ك جى داخه‌ ئاينده‌يش سه‌ختتره‌ ك ئه‌ويش جه‌نگ رماننه‌.

عه‌لى حسێن فه‌يلى