عراق گشت رووژیگ شام غەریبانە

شفق نيوز

  کەسەیل دویاکەفتگ و نەفامەیل ئی وڵاتە ئەگەر تەماشای پیشکەفتن وڵاتەیل تر بکەن و بەراورد ژیان ئنسانی و ئارامی وەل ژیان پڕ لە گرفت و نائایش عراق بکەن، مەر ئەوسا بزانن خوەیان لە چ رووژگاریگ ژیەن و چوین وەختەیل خوەیان کەنە قوربانی کردەوەیل پڕ سزای خودایی لە رووژ حەشر.

ئیمام رەزا سڵام خودا لەلی فەرمایش ئەکاو ئویشید: لەوەخت جاھلیەت لە مانگ موحەڕەم کوشت و کوشتار نەویە، وەلی نەیارەیل دەسکردنە کوشتن و بڕین و سزاداین بنەماڵەی ئالبەیت پەیغەمبەر . بیگومان ئیسەیش لەی مانگ موحەڕەمە ھیمان دەس ترۆر و خیانەت لە کوشتن مەردم بیتاوان نەوڕیاگە.

ئەگەر لەیرا بتوایم وشەی" شام غەریبان" باس بکەیم، مەرام لەی وشە ئەوەسە ک راسەوخۆ شەویگ لەشوون ١٠ی موحەڕەم ک ئەکادە ١١ی موحەڕەم خیزانەیل ئەھل بەیت پەیغەمبەر وەتایبەت خیزان ئیمام حسێن شەھید کوڕ عەلی کوڕ ئەبو تالب سڵام خودا لەلیان وەبی کەس و بی روڵەو جایەڵ جوان مەندن و ھەرچی پیاگ و روڵەیلیانە گشتی وە ناھەق شەھید کریا ک تەنیا عەلی ئەلسەجاد لەلیان مەند و ئەویش نەخوەش بوی و لەتاو بیماری ئاز لە لاشەی نەمەند، ئنجا وەو خاتریشە ئی شەو یانزەی موحەڕەمە ناونریا" شام غەریبان" چوینکە کەسیگ لە بنەماڵەی پەیغەمبەر سڵام خودا لەلی وەساق دەرنەچی لە جەنگ یەزید نەفرەت خودا لەلی.

ئمڕوو لەی عراق تازە، رووژیگ نیە کوشتار لەتی ئەنجام نەدریەید و ژنەیل بیچارە یەتیمبار نەون، رووژیگ نیە دەنگ تەقینەوەو ھەواڵ سەربڕین و کوشتن و رواکانن لەتی نەژنەفیم، رووژیگ نیە دوشمنەیل ئنسانیەت کردەوەی خراو ئەنجام نەیەن و سەیارەی مینڕیژکریاگ نەتەقننەو. ئەیە حاڵ عراقەو مەردم بیدەسڵاتیش گرفتار بوینەو مەرگ یەقەی روڵەیل ئی وڵاتە گرتگەو فریشتەی گیانکیش وە شیوازەیل جوراوجوور گیان ئادەمیزاد وڵات ناونی دوچەمان سینید لە ئاکام ئەو کردەوەیل نامروەتیە ک کەسەیل نەفام و نارووشنھویر وەخاتر خوسەو کینەت ئەنجامی دەن، ک ھەر وەو خاتریشە ئویشیم عراق گشت رووژیگ شام غەریبانەو شین و واوەیلای مەرگە.

ج . عەلیمیری