بایه‌د خوه‌مان بویمن

شفق نيوز

ئه‌وه‌ كریه‌ێد كاریگه‌ریه‌یلى هه‌ر له‌و مه‌رزه‌ نه‌مینن، به‌ڵكوو گوزه‌ر بكاو ناوچه‌یگ تر بگرێده‌و.

گشت هێزه‌یل سیاسى عراق وه‌ گشتى و كوردستانیش وه‌تایبه‌ت، بیجگه‌ له‌ هێزه‌یل بویچگ ناو ده‌وڵه‌ت یاسا نه‌ود ك چه‌وى ها دامه‌زرانن حكوومه‌تیگ ناوه‌ندى بته‌و، هان له‌و باوه‌ڕه‌ ئى مامڵه‌و ره‌فتاره‌ نادێ وه‌رده‌وام بوود وه‌ى شیوه‌ى ئیسه‌. ئمجا دوینید هه‌ر له‌وه‌ر ئه‌وه‌یش هه‌ر هێزیگ  وه‌هه‌ر مه‌هانه‌یگ بوود ئه‌خوازێ خوه‌ى له‌و جه‌مده‌نگیه‌ بیه‌رێده‌ ده‌یشت وه‌تایبه‌ت له‌ كوردستان، ك ئه‌و هێزیشه‌ بیگومان وه‌ده‌س خوه‌ى چاڵ ئه‌را ژیان سیاسى خوه‌ى هه‌ڵكه‌نێد.

بێ گومان وه‌ رویداین ئه‌و ئاڵشتكاریه‌، هاوسه‌نگى هێز ئاڵشتكارى ئه‌یه‌ێده‌ بانى، یه‌یش وه‌ نووره‌ى خوه‌ى ئیچنه‌ له‌ هێزه‌یل جیا ئه‌كا خوه‌یان ئه‌را شوون ئه‌و چشته‌یله‌ ئاماده‌ بكه‌ن ك هه‌قیگ خوه‌یان ئه‌را ئه‌وه‌ك پایه‌ى گونجیاگ خوه‌یان بگرن. ئمجا دیاره‌ ئى پایه‌گرتنیشه‌ وه‌بێ كێشه‌و گرفت نایه‌ێده‌ دى، وه‌لى له‌وه‌ر ئه‌وه‌ك په‌یوه‌ندى وه‌ ئاینده‌وه‌ دیرێد بووده‌ ئه‌رك و بایه‌د ئاماده‌باشى ته‌واویگ ئه‌راى بكریه‌ێد.

له‌ كوردستان ماناى ئه‌وه‌سه‌ وه‌زعه‌گه‌ وه‌بێ جیاوازى له‌ گشتلایگ ئه‌خوازێد وه‌و شیوه‌ كار  بكه‌ن و توانایان بخه‌نه‌ كار ك به‌رژه‌وه‌ندیه‌یل نه‌ته‌وه‌ییمان دابین كه‌ن، چوینكه‌ نزیكمانه‌و ئه‌كا له‌ ئامانجه‌ گه‌وره‌گه‌ ك ده‌ریایگ خوین ئه‌راى دریاگه‌و دونیایگ به‌دبه‌ختى دیمنه‌سه‌ چه‌و ئه‌راى.
ئمجا هه‌ر له‌بان ئه‌و راسیه‌ له‌هه‌ر كوردیگ بپرسید، ئه‌گه‌ر له‌ده‌یشت كوردستانیش نیشته‌جى بوود، ئایا باوه‌ڕ وه‌ ده‌وڵه‌ت سه‌روه‌خوه‌ى كوردستان دیرید؟ یه‌كسه‌ر وه‌پید ئویشید: به‌ڵى باوه‌ڕ وه‌پى دیرم و جوور هه‌قیگ سروشتى زانمه‌ى. وه‌لى وه‌ختیگ ئاماده‌باشى كه‌ید و كار ئه‌را ئه‌و پێشهاته‌ كه‌ید، دوینید له‌ ناو خود وڵات وه‌ مه‌هانه‌ى جووراوجوور هه‌زار كێشه‌و گرفت ئه‌راد دویننه‌و ك نه‌ك هه‌ر نادێ كار ئه‌راى بكریه‌ێد، به‌ڵكوو نادێ باسیشى بكه‌ید. دى ئه‌را خوددزینه‌وه‌ له‌و ئه‌رك نه‌ته‌وه‌ییه‌ دوینید گشت كه‌م وكوڕیه‌یلد ئه‌خاده‌ وه‌رچه‌ود و سه‌ختیه‌یل فره‌یگ له‌ نواد ڕز ئه‌كا.

له‌راسى له‌وه‌رچه‌وگرتن ئه‌و سه‌ختیه‌یله‌ ئه‌را خاس خود ئاماده‌كردن گرنگن، ئه‌ویش ئه‌را ئه‌وه‌ك وه‌ كه‌مترین  زه‌ره‌د ئه‌و پایه‌گرتنه‌ بیه‌ێده‌ دى، وه‌لى دوینید هویچ گامیگ وه‌و خاتره‌ نیه‌نه‌ێدو خوه‌یشى له‌ هه‌ر دانیشتن و گرده‌وبوینیگ دزیگه‌و ك وه‌و مه‌رامه‌ ساز كریه‌ێد و شایه‌د كار ئه‌را شیواننیشى بكا.

پێكهاوردن به‌ره‌ى كوردستانى له‌ناوڕاس ساڵه‌یل هه‌یشتاى سه‌ده‌ى وه‌رین و پێشنیار هه‌ڵوژاردن گشتى له‌ ساڵه‌یل نه‌وه‌د، ك ئه‌و وه‌خته‌ ئه‌ڵڵاجه‌وى بوى وه‌لاى مه‌ردمانیگه‌و ك وتیان چوین كورد بووده‌ خاوه‌ن په‌رله‌مان و حكوومه‌ت خوه‌ى، ئه‌وه‌ بوى دویاخر فه‌رمان به‌رزه‌وكردن ئاڵاى كوردستان و پیرۆزكردنى دریا له‌وه‌رچه‌و مه‌ردم كوردستان.

ئى گامه‌ وه‌ چه‌سپانن هه‌قه‌یل هه‌رێم كوردستان و دیاریكردن مه‌رز هه‌رێم وه‌ یاسا له‌ ده‌ستوور هه‌میشه‌یى عراق فیدراڵ ریشگ كوتا ك تا ئیسه‌یش حكوومه‌ت به‌غدا باوه‌ڕ وه‌ى ده‌ستووره‌ نه‌یرێد ك گه‌ره‌نتى مه‌ندنه‌وه‌ى په‌كپارچه‌یى عراقن ئمجا ئیسه‌یش له‌ى وه‌خته‌یله‌ ئه‌وه‌ك هه‌س و ئه‌وه‌ك پێشبینى كریه‌ێدو ئه‌وه‌ك له‌و كاره‌ مه‌ندگه‌سه‌و ئیراده‌ى خوه‌مانه‌ جوور ئه‌وه‌ك سه‌رۆك بارزانى وت: بایه‌د خوه‌مان بویمن. یه‌یش وه‌و مانا ك بایه‌د كار ئه‌را لاوردن سه‌ختیه‌یل بكه‌یم و گشت توانایگمان وه‌ى خاتره‌ بخه‌یمنه‌ كار و له‌ هه‌مان وه‌خت پشتگیرى ئه‌و گامه‌یله‌ بكه‌یم ك جوور خود ئاماده‌كردن ئه‌را پێشهاته‌یل نریانه‌.

زویتر بڕێگ له‌ نویسه‌ر و رووشنهویر و سیاسه‌تمه‌داره‌یل كوردستان، له‌وه‌ختیگ باس له‌ ده‌وڵه‌ت سه‌روه‌خوه‌ى كوردى كریا قه‌یرێگ راسى خستیانه‌ ڕوى ك وتیان: هه‌رێمیگ له‌چوارلاوه‌ ته‌وق دریاگه‌و خاوه‌ن ئابوورى خوه‌ى نییه‌و هێزیگ سه‌ربازى خواست نه‌یرێد و ده‌روازه‌یگ مسۆگه‌ر ئه‌را ره‌سین وه‌ جه‌هان ده‌یشت نه‌یریدو قسه‌یل تر.

یه‌یش بیجگه‌ ئه‌وه‌ك ره‌خنه‌یش له‌ سه‌ركردایه‌تى كورد گردیان وه‌ ئه‌وه‌ك هویچ گامیگ نه‌ناگه‌ ئه‌را نه‌هیشتن ئه‌و هووكاره‌یله‌، وه‌لى وه‌ختیگ له‌بان بنه‌ماى به‌رژه‌وه‌ندیه‌یل كار ئه‌را ته‌ختكردن یا لاوردن ئه‌و سته‌مه‌یله‌ كریه‌ێد، ئه‌وه‌ بیگومان ده‌روازه‌یگ ئه‌كاده‌و و بنه‌مایگ بته‌و ئابوورى په‌یا بوودو سوپاى خاسیگ ئه‌را رویوه‌ڕوى بوینه‌وه‌ى ئه‌گه‌ره‌یل پێك ئه‌یه‌رێ و پڕ چه‌كى ئه‌كا.

ئه‌وه‌سه‌ له‌ساى ئه‌و گامه‌یل خاسه‌ كۆمپانیایه‌یل گه‌وراى نه‌فت و وه‌به‌رهاوردن ركابه‌رى یه‌كترى كه‌ن ئه‌را ره‌سین وه‌ هه‌رێم كوردستان و تائیسه‌ زیاتر له‌ 20 كونسوڵخانه‌و نویسینگه‌ى بیگانه‌ له‌ پایته‌خت هه‌رێم كوردستان واز كریانه‌و پێشبینى زیاتریش كریه‌ێد.

سه‌نگ ئى گامه‌یله‌ ئیچنه‌ له‌ ناوه‌ندپه‌ره‌سیگ جوور مالكى كردگه‌، هه‌ڕه‌شه‌ى بڕین به‌شه‌ بودجه‌ى هه‌رێم و دوشمنایه‌تى ئه‌فسه‌ر و پله‌دارو سه‌ربازه‌یل كورد له‌ سوپاى عراق فیدراڵ بكاو هێز سه‌ربازى ئه‌را ناوچه‌یل داوڕیاگ له‌ هه‌رێم كل بكاو هه‌قه‌یل پێشمه‌رگه‌ پشتگووش بخاد.

له‌یره‌ ئه‌و پرسیار جددیه‌ سه‌ر هه‌ڵ ئه‌یاد، ك ئایا تا كه‌ى مووچه‌خوه‌ر به‌غدا بویمن و هه‌ر وه‌ختى بخوازێد بووڕێده‌ى؟ یا هه‌ر وه‌ختیگ بخوازێد به‌ش سوزه‌مه‌نى نه‌یاده‌ هه‌رێم و قه‌یران له‌ هه‌رێم كوردستان دروس بكا؟ یا هه‌ر وه‌ختێگ تواست سوپاگه‌ى بیه‌رێده‌ كار و لویله‌ى تووپ و تانكه‌گه‌ى روى بكاده‌ كوردستان؟ یا هه‌ر وه‌خت دى هه‌رێم كوردستان پێشكه‌فێ گرفت ئه‌راى دروس بكا؟

ماناى ئه‌وه‌سه‌ هه‌رێم كوردستان ها له‌ وه‌رانوه‌ر ئه‌قڵیه‌تیگ  ك مه‌ترسیه‌ ئه‌را ئاینده‌ى تاك، هه‌ر له‌وه‌ر ئه‌وه‌یش وه‌زع ئیسه‌ داوا له‌ گشت لایگ ئه‌كا دژ وه‌و ئه‌قڵیه‌ته‌ بوون و له‌لایگ تریشه‌و پشتگیرى له‌و گامه‌یله‌ بكریه‌ێد ك نریانه‌، چوینكه‌ ئه‌وه‌ ته‌نیا په‌یوه‌س وه‌ پارتیگ دیاریكریاگ نییه‌، به‌ڵكوو په‌یوه‌ندى وه‌ چاره‌نویس نه‌ته‌وه‌یگ دیرید ك ئه‌خوازێد هه‌قه‌یلى وه‌ده‌س بیه‌رێ.

كه‌ریم قادر

ج. ا