ژن فه‌یلى نك وه‌فادارى و گه‌وراییه‌

شفق نيوز

له‌ئیمه‌ ته‌ماشاى خوه‌ى بكا، ئى سفه‌ته‌ له‌خوه‌ى دوینیگ  و ئایا پابه‌نده‌ وه‌و قه‌وڵ و سفه‌ته‌یله‌ له‌وه‌رانوه‌ر كه‌سه‌یل تر؟ ئنجا كه‌سیگ ئه‌گه‌ر واده‌ى خوه‌ى ناریگه‌ جى وه‌سه‌به‌ب گرفتاربوینى وه‌كاریگ یا وه‌زعیگه‌و ئایا له‌ى حاڵه‌ته‌ وه‌فا ده‌ورى چوین بوود؟

له‌ى باوه‌ته‌ قسه‌ له‌بان وه‌فاى ژنه‌ كورد فه‌یلى كه‌یم، ك مه‌ینه‌تیه‌یل فره‌یگ  هاته‌ تویشى و قوربانى گشت رژیمیگ بوى و حه‌سره‌ت فره‌یگ كیشاگه‌ له‌گشت وه‌ختیگ و هه‌میشه‌ بیبه‌ش بویه‌ له‌خوه‌شیه‌یل و سه‌رچه‌وه‌ى به‌دبه‌ختى و زوڵملیكریاگ و خوسه‌خوه‌ر بویه‌و هویچ ئاده‌میزادیگ له‌ى دونیا جویر ئه‌و نه‌ویه‌.

ئه‌گه‌ر باس له‌رووژگار رژیم رمیاگ بكه‌یم، ژنه‌ كورد فه‌یلى له‌ده‌س جه‌ور و سته‌مى ناڕه‌حه‌تى فره‌یگ كیشاو زندانى كریا له‌ زندانه‌یل سته‌مكار، ك هویچ وه‌ختیگ نه‌زانستن ماناى ره‌حمه‌ت چه‌س و هویچ وه‌ختى ره‌حمه‌ت ڕى وه‌ره‌و دڵه‌یلیان نه‌گرته‌وه‌ر، هه‌ر له‌وه‌ر ئه‌وه‌یش سزاى روڵه‌و هاوسه‌ر و برایه‌یلى له‌وه‌رچه‌وى دان، ئه‌و چه‌وه‌یله‌ ك هه‌میشه‌ له‌ئه‌سر وشكه‌و نیه‌ود، وه‌تایبه‌ت تائیسه‌یش هه‌قه‌یلى وه‌رنه‌گرتگه‌و له‌وه‌خت خوه‌ى ده‌ركریا وه‌ره‌و شوونه‌یل نادیار.

بڕیگ له‌ ژنه‌یل فه‌یلى له‌وانه‌ك هاوسه‌ره‌یلیان كوشیان له‌زندانه‌یل و بڕیگ تر له‌لیان ك هاوسه‌ره‌یلیان ده‌ركریا ئه‌را وڵات تر، وه‌ته‌نیا مه‌ندن له‌ى دونیاو كه‌فتنه‌ ناو ده‌رد و مه‌ینه‌تى ژیان. راسه‌ ك مه‌ینه‌تى ژن ئه‌وه‌نه‌ جیاواز نیه‌ له‌ مه‌ینه‌تى پیاوه‌یل و گشتیان جویر یه‌ك كه‌فتنه‌ وه‌ر كووچ وه‌پیكردن زووره‌ملى و سه‌ندنه‌وه‌ى شوناسنامه‌و به‌دبه‌ختى و له‌ده‌سداین و دووس و كه‌س وكار، وه‌لى ژن زیاتر زه‌ره‌د كرد له‌لایه‌ن سووزدارى و تائیسه‌یش هه‌ر وه‌و ژانه‌و ژیه‌ن. وه‌ل ئه‌وه‌یشا نه‌وین پیاو له‌ خیزان له‌یوا كرد ژنه‌گه‌ گشت وه‌رپرسیاریه‌تییگ بگریگه‌ مل له‌گشت مه‌یدانیگه‌و، وه‌ل ئه‌وه‌یشا بیوه‌ژنه‌یل فره‌یگیش وه‌ته‌نیا خه‌ریك په‌روه‌رده‌كردن روڵه‌یلیان بوین له‌ پیسترین و سه‌ختترین رووژگاریگ، وه‌لى وه‌ل ئه‌و هه‌مگه‌ مه‌ینه‌تى و ناڕه‌حه‌تیه‌ ك هاته‌ تویشى، ژنه‌ كورد فه‌یلى هه‌ر سه‌بر داشت و هه‌ر وه‌فاداره‌ ئه‌را پیاوه‌گه‌ى.

ئه‌و ژنه‌ كورده‌یل فه‌یلیه‌ ك وه‌ زوور له‌هاوسه‌ره‌یلیان جیاوه‌ كریان، هه‌ر مه‌ندن و چه‌وه‌ڕى هاتنه‌وه‌ى هاوسه‌ره‌یلیان كردن. له‌وه‌یش زیاتر ئه‌و ژنه‌یله‌ ك پیاوه‌یلیان له‌و به‌دبه‌ختى و مه‌ینه‌تیه‌ نه‌خوه‌شى هاته‌ تویشیان ئنجا ژنه‌یلیان وه‌ سه‌بر فره‌یگه‌و جه‌وریان كیشان و هه‌ر خوه‌یان مقه‌یه‌تى له‌لیان كردیان و شه‌ونه‌خه‌فى وه‌ دیاریانه‌و كردیان تا له‌و نه‌خوه‌شیه‌ خاسه‌و بوون، ئه‌گه‌ریش هه‌ر پیاویگ وه‌ڕه‌حمه‌ت خودا بچیاتاد ئه‌وه‌ ژنه‌گه‌ى وه‌گشت ئازاییگ مناڵه‌یلى په‌روه‌رده‌ كردیاد. هه‌ر له‌وه‌ر ئه‌وه‌یش ژنه‌ كورد فه‌یلى تویش مه‌ینه‌تى و ژیان تیه‌ڵیگ هات له‌ژیانى.

چه‌نه‌ها ژن فه‌یلى بیبه‌ش بوین له‌هه‌ق زانستى، وه‌لى وه‌ هه‌ر جووریگ بوى هه‌ر ره‌سینه‌ پایه‌ى به‌رز له‌ خوه‌ندن، چه‌نه‌ها ژنه‌ فیلى شه‌ونه‌خه‌فى كرد ئه‌را ئمایه‌تكردن ڕوڵه‌یلى وه‌بى ئه‌وه‌ك كه‌سیگ ده‌س یارمه‌تى ئه‌ڕاى دریژ بكاو پیاوه‌یلیان یا له‌زندان یا له‌ناو قه‌وره‌یل وه‌جه‌م یا له‌وڵاتیگ تر ژیان، چه‌نه‌ها ژنه‌ فه‌یلى هیشت مناڵه‌یلى وه‌ زووان داڵگى خوه‌یان قسه‌ بكه‌ن. هه‌ر له‌وه‌ر ئه‌وه‌یش ژنه‌ فه‌یلى بیجگه‌ سفه‌ت وه‌فادارى ك دیریگه‌ى، له‌هه‌مان وه‌خت شیواز مه‌یلكیشیگ دیریگ له‌ قسه‌كردن.

 

ئه‌سرا شاواز