وه‌ سه‌رخوه‌د تا بڕه‌سید!!

شفق نيوز

كه‌فێده‌ وه‌رچه‌ومان، وه‌لى راسیه‌یل ئه‌وه‌ نیشان ئه‌یه‌ن ك ئیمه‌ هه‌رچه‌نى یه‌واش وئارام بویمن زیاتر سه‌ركه‌فتن له‌ كاره‌یلمان مسۆگه‌ر كه‌یم.

 

گرنگى ئى باسیشه‌ ها له‌وه‌ ك مه‌ردم وه‌گشتى وه‌ختیگ بخوازن ئه‌رك خواستیگ ئه‌نجام بیه‌ن یا ئامانج گرنگیگ بارنه‌ ده‌س، هه‌وڵ ئه‌یه‌ن وه‌گشت توانایگه‌و هه‌ڵه‌په‌ڵه‌ بكه‌ن و ماوه‌ى ئه‌نجامداینه‌گه‌ كوڵه‌و بكه‌ن، ك ئه‌ویش وه‌ هساو خوه‌یان تا زوى بڕه‌سنه‌ مه‌رام و دڵیان ساكن بوود.

 

وه‌لى دوینیم له‌ئاكام ئى هه‌ڵه‌په‌ڵه‌كردن و زوور له‌ خوه‌یكردنه‌ ناچار بوون و له‌ كووتاییش وه‌خت زیایه‌یگ خه‌رج بكه‌ن ئه‌را راسه‌وكردن و خاسه‌وكردن ئه‌و غه‌ڵه‌ت و كه‌م و كوڕیه‌یله‌ ك وه‌ بوونه‌ى هه‌ڵه‌په‌ڵه‌كردنه‌و هاتگه‌سه‌ تویشیان، ئمجا دوینید وه‌بان ئه‌و هه‌وڵ و ته‌قلایشه‌ قه‌رزداریش بوون.

 

باس كه‌ن و ئویشن: رووژیگ له‌رووژان وێنه‌كیش ناوداریگ چینى(شو یونگ) له‌ سه‌ده‌ى 17 بڕیاردا سه‌ردان شاروچكه‌یگ بكا له‌و ده‌س ئاو، دویاخر وه‌ختى سوار كه‌شتیه‌گه‌ بوى و پرسى له‌ كه‌شتیوانه‌گه‌ ئایا زوى ره‌سیمنه‌ جى، چوینكه‌ ئه‌و شاره‌ وه‌رجه‌ نیمه‌ى شه‌و به‌سیه‌ێد. وه‌ختى كه‌شتیوانه‌گه‌ ته‌ماشاى كرد ك جنگ و كتاوه‌یلى وه‌ پاكى پیچیانه‌سه‌و، وت: به‌ڵێ زویتر ره‌سید ئه‌گه‌ر فره‌ وه‌ گورجى ڕێ نه‌كه‌ید! ئمجا وه‌ختى كه‌شتیه‌گه‌ ره‌سیه‌ كنار ئاوه‌گه‌ تیه‌ریكییگ باڵ كیشا بان شاروچكه‌گه‌و (شو یونگ) ترسیا قاپى شار بووه‌سن و ئه‌ویش بووده‌ شكار وه‌رده‌س رێگرو چه‌ته‌، هه‌ر له‌وه‌ر ئه‌وه‌یش فره‌ وه‌ هه‌ڵه‌په‌ڵه‌ رێ كردیاد، ئمجا له‌ ناكاو ئه‌و په‌ته‌ ك جنگه‌یلى وه‌پى به‌ساوید بڕیاو گشت جنگ و كتاوه‌یلى په‌رش وبڵاوه‌و بوینه‌ زه‌وى ، ئه‌ویش ناچار ده‌س كرده‌ گرده‌وكردنیان و دوباره‌ پیچاره‌یانه‌و، وه‌لى له‌ئاكام ئه‌و كاره‌ دویاكه‌فت و تا ره‌سیه‌ شار ته‌ماشا كرد ده‌روازه‌یل شار به‌سیانه‌، دى له‌و وه‌خته‌و (شو یونگ) ره‌سیه‌ ئه‌و باوه‌ڕه‌ ك فره‌جار هه‌ڵه‌په‌ڵه‌كردن له‌به‌رژه‌وه‌ندى وه‌خت نییه‌و به‌ڵكوو هووكاریگیشه‌ ئه‌را دروسكردن كێشه‌و گرفتیش.

 

كه‌سه‌یلیگ هه‌ن ئیچنه‌ زانن نرخ وه‌خت وه‌ ئه‌وه‌سه‌ ك كاره‌یلیان وه‌ هه‌ڵه‌په‌ڵه‌ ئه‌نجام بیه‌ن وه‌بى ئه‌وه‌ك هویره‌و بكه‌ن، وه‌لى له‌راسى نرخ وه‌خت ئه‌وه‌سه‌ ك به‌شیگى ئه‌را به‌رنامه‌و پلانناین ته‌رخان بكریه‌ێد تا تویش شكه‌ست نایدو له‌ ده‌رئه‌نجام كاره‌یلد په‌شیمانه‌و نه‌وید.

 

هیوا بڵباس

 

ج. ا