په‌لامار داین كورده‌یل فه‌یلى و برایه‌یل مه‌سیحى ئایا ئه‌را چووڵ كردن عیراقه‌ له‌ پیكهاته‌گانى؟

شفق نيوز

قوربانیه‌گانى ڕه‌سیه‌ 26 شه‌هید و 60 زه‌خمدار له‌ ڕووژ یه‌كشه‌ممه‌ دژ وه‌ برایه‌یل مه‌سیحیمان دوباره‌وه‌ بوى له‌ ئان نماز و قداس دینییگ له‌ كڵێساى سیده‌ النجاه‌ ك بویه‌ مایه‌ى شه‌هید بوین و زه‌خمدار بوین شماره‌ى گه‌ورایگ له‌ پیاوه‌یل دینى و نمازكه‌ره‌یل و چه‌ن ئه‌ندامیگ پۆلیس و ئاسایش، و كووشت و خوینیان چه‌سپیا قه‌ى دیوار و سه‌قف كڵێساگه‌ له‌وه‌خت خوه‌نستن سروودیگ دووسى و ئاشتى. و موومه‌یل ده‌مدان ئه‌را ئه‌وخاتره‌ ك نویر خودایى باڵ بكیشیده‌ بان جه‌هان و تیه‌ریكى نه‌مینى... ئه‌را ئه‌وه‌گ بزانیم ك په‌لامارداین كورده‌یل فه‌یلى و برایه‌یل مه‌سیحى مه‌مه‌رى چووڵكردن عیراقه‌ له‌ پیكهاته‌ نه‌ته‌وه‌یى و تایفیه‌گانى، پرسیار له‌ ئه‌ندام ئه‌نجوومه‌ن نوێنه‌ره‌یل له‌ لیست رافده‌ین، عماد یوخه‌نا كردیم ك وه‌ى جووره‌ ئه‌را ماڵپه‌ڕ شه‌فه‌ق قسه‌كرد و  وت:"مه‌سیحیه‌یل وه‌ناو كه‌مایه‌تى  و ده‌مارگیرى دینیه‌وه‌ په‌لامار دریه‌ن و ئه‌وانه‌گ په‌لاماریان ده‌ن هێزه‌یل تاریكى و وه‌حشیین و ڕووشنهویرى بیماریگ دیرن ك وه‌رانوه‌ر قه‌بوول نه‌یرى، ئیمه‌ یه‌ چه‌ناى چه‌ن ساڵ وه‌ى جووره‌ ناڵنیم و ئیسه‌یش وه‌ى جووره‌ هاته‌وه‌ و گیان ده‌یان بیگوناه دره‌و كریا له‌ كڵێساى سیده‌ النجاه‌".

زیاتریش وت:" ئیمه‌ ئه‌و په‌لامار تیرۆریستیانه‌ وه‌توندى مه‌حكووم كردیمن ك له‌ هه‌فته‌ى وه‌رین دا له‌ برایه‌یل كورد فه‌یلى له‌ قه‌زاى به‌له‌درووز".

ئه‌وه‌یشه‌ ڕووشنه‌وكرد ك :"ئه‌و دوشمنه‌ ك په‌لامار كورده‌یل فه‌یلى دا هه‌ر خوه‌یه‌ په‌لامار مه‌سیحیه‌یل ده‌ید ، وه‌لى هووكاره‌گه‌ى جوداس، جاریگ وه‌ ده‌مارگیرى نه‌ته‌وه‌یى و جاریگتر وه‌ ده‌مارگیرى دینى".

جه‌ختیش له‌بان ئه‌وه‌ كرد ك :" ئامانج ئى ئۆپه‌راسیۆنه‌یل تیرۆریستیه‌ چووڵكردن عیراقه‌ له‌ پیكهاته‌ ڕه‌سه‌نه‌گانى، وه‌لى دیاره‌ ك عیراقیه‌یل شان وه‌شان یه‌كترى وسیانه‌ و ئى كرده‌وه‌یل تیرۆریستیه‌ نیه‌تویه‌نى له‌یه‌جودایانه‌و بكه‌ید و ناوبه‌ینیان خه‌راو بكه‌ید".

له‌لاى خوه‌یه‌و ئه‌حمه‌د ئه‌بیه‌ز نویسه‌ر و شیه‌وكه‌ر سیاسى له‌ په‌یوه‌ندییگى وه‌ل ماڵپه‌ڕ شه‌فه‌ق وت:"په‌لامارداین ئه‌و لایه‌نه‌یله‌ ك وه‌ چه‌مك سیاسى و جیۆسیاسى ناویان نریاس كه‌مایه‌تى دینى و په‌رستگایه‌یلیان دو په‌یام ڕه‌سنى، یه‌كم: زووران ئمڕوو زوورانه‌ له‌بان حوكم نه‌ك له‌ بان حكوومه‌ت و ئى جیاوازییشه‌ زویتر لایه‌نه‌یل سیاسى وه‌ پى نه‌زانستن، چوینكه‌ ئامانجى ڕمانن ئه‌و حوكمه‌ بوى ك دویاى 2003 دامه‌رزیا، ك حوكمیگه‌ چه‌وه‌ڕى ئاینده‌ى خاسیگ كردیاد له‌ دیموكراسى ئاڵوگۆڕ كردن ئاشتیانه‌ى ده‌سڵات وه‌ل دابینكردن هووكاره‌یل هه‌ڵسیان ئى نیشتمان زه‌خمداره‌".

زیاتنریش وت: دویم په‌یامیشى ئه‌وه‌سه‌ ك :" هاتنه‌وه‌ ئه‌را زنجیره‌ى هه‌ڵگیرسانن فتنه‌ى تایه‌فى و هه‌ڕه‌شه‌داین له‌ نه‌ته‌وه‌ و كه‌مایه‌تیه‌گان ئه‌را ده‌كردنیان له‌ نیشتمان له‌خاتر داڕزانن چه‌مك یا مه‌فهوم هاوڵاتى بوین یا مواته‌نه‌، له‌ ئاكامیشا ، هه‌ر وڵاتیك چه‌مك هاوڵاتى بوین له‌تى نه‌ود ، وه‌شیوه‌ى گشتییگ شایه‌ت ستوینه‌یل حوكم له‌تى له‌ق بوون".

جه‌ختیش له‌بان ئه‌وه‌كرد ك:" بڕیگ له‌ یه‌تیمه‌یل دویه‌كه‌ هیمان ئه‌را گوزه‌یشته‌ى قیزه‌وه‌ن گیرن، و توان دوباره‌ سه‌رهه‌ڵگرن و گشت ده‌رفه‌تیگ بكه‌فیده‌ گیریان وه‌كارى تیه‌رن ، یه‌كیگ له‌و ده‌رفه‌ته‌یلیشه‌ ئه‌و بۆشایى سیاسیه‌سه‌ ك وڵاته‌گه‌ ئیسه‌ له‌تى ژیه‌ید".

ئه‌وه‌یشه‌ ڕووشنه‌وكرد ك :" كار تیرۆریستى له‌ گشت وڵاتیگ ئه‌نجام گرید، وه‌لى له‌ عیراق وه‌ زویزوى ئه‌نجام گرید له‌ ئاكام ئه‌و له‌قى یا خه‌له‌ل گه‌ورا ك هاله‌ ناو تووڕ هه‌واڵگرى یا ئستخباراتى، ك یه‌كیگ له‌ ئه‌ركه‌گانى ئه‌وه‌سه‌ ك كار بكه‌ید ئه‌را ئه‌نجام نه‌گرتن ئه‌و ئۆپه‌راسیۆنه‌یل تیرۆریستیه‌، وه‌رج له‌وه‌گ ئه‌نجامى بیه‌ن، وه‌لى ئى چشته‌ له‌ عیراق نیه‌ چوینكه‌ ناكووكى گه‌ورایگ ها ناونى هێزه‌یل سیاسى له‌ ئاكام به‌شبه‌شه‌كردن یا محاصصه‌ هه‌تا له‌ ده‌زگایه‌یل هه‌واڵگرى یا ئستخباراتى".

ئاماژه‌یش وه‌وه‌ دا ك :" بڕیگ له‌ كه‌ناڵه‌یڵ ڕه‌سانن نه‌خش گه‌نیگ دیرن له‌ جاڕداین ئه‌را كاره‌یل تون وتیژى و شیوانن ڕاسیه‌گان".

زیاتریش وت :" ئه‌و دو ئۆپه‌راسیۆن تیرۆریستیه‌ ك دژ وه‌ كورده‌یل فه‌یلى و مه‌سیحیه‌یل ئه‌نجام دریان دو له‌كه‌ عار و شه‌رمه‌زاریین له‌ تیوڵ هه‌ركه‌سى به‌شدارى له‌ تیان كردیه‌، وهه‌میشه‌ خوین بى گوناهه‌یل پشت تاوانباره‌یل شكنى".