سه‌رۆك وه‌زيران و ناهه‌قييه‌يلێ وه‌ل كوردستان

شفق نيوز

هويچ لايه‌نێگ سياسى ئه‌گه‌ر سه‌رۆك هه‌رێم نه‌وياتاد قه‌بول نه‌كردله‌ كابينه‌ به‌شدارى بكه‌ن. وه‌ هه‌ر جوورێگ بوى، حكوومه‌ت پێكهات. دوياى ئه‌وه‌يش ديمن جه‌ناب سه‌رۆك وه‌زيران چوين جوواو خاسييه‌يل سه‌رۆك ومه‌ردم كوردستان دا!. له‌ى كابينه‌ی ده‌وڵه‌ت عێراقه‌ ك چشتێ وه‌ ته‌مامبوين ماوه‌ى قانوونى نه‌منيه‌و ئه‌ڵوژاننيش نزيكه‌، وه‌لى ديمن ك ده‌وڵه‌ت مه‌ركه‌زى ك وه‌ ده‌وڵه‌ت قه‌يران ناو ده‌ركرديه‌، هه‌ر رووژ و هه‌ر مانگ وهه‌ر ساڵ وه‌ جوورێگ له‌ جى ده‌سخوه‌شى، ده‌س برده‌و قوڕگ كورد و تواێد بتاسنێده‌ێ!. يه‌ى رووژ فه‌رمانده‌يى ئۆپراسيۆنه‌يل دجله‌ دروس ئه‌كاو رووژ تريش هه‌ق ده‌س كۆمپانيه‌يل نه‌فتى ك له‌ هه‌رێم كار كه‌ن نيه‌يد و رووژتريش له‌شكه‌ركيشى وه‌ره‌و هه‌مرين و كه‌ركوك و سنووره‌يلێ ك ها ده‌س قاره‌مانه‌يل پێشمه‌رگه‌ى كورد كه‌ێده‌ ئامانج. بوودجه‌ى وه‌زاره‌ت پێشمه‌رگه‌ نيه‌يد، له‌ هاڵێگ پاسه‌وانه‌يل ناوچه‌ى سه‌ونز ك مالكى وده‌وڵه‌تداره‌يل عێراق له‌ ناوێ ته‌كه‌و دانه‌و هانه‌ ئامان خودا‌، پێشمه‌رگه‌ى كورد مقه‌يه‌تی له‌لێ كه‌ن.

ئه‌ى دويايشه‌، جه‌ناب سه‌رۆك وه‌زيران، بوودجه‌ى حكوومه‌ت هه‌رێم وته‌نانه‌تيش مووچه‌ی مانگانه‌ى كارمه‌نده‌يل حكوومه‌ت هه‌رێم بڕێدو نوا له‌لێ گرێد.له‌ لاى تريشه‌و دوينمن ك جه‌ناب موقته‌دا سه‌در ك رێبه‌رێگ رووحييه‌و لايه‌نگره‌يل فره‌يگ له‌ شار به‌غداو ئه‌و دوياى شاره‌يل باشوورعێراق دێرێد، پاشه‌كشه‌ له‌پرۆسه‌ی سياسی‌ كه‌ێد و وه‌ ناوه‌يل جياوه‌جيا مالكى چڕێد و لاناوه‌يلێ ئه‌را ئه‌ى هاوپه‌يمانيه‌ بڕێد!.  ده‌وڵه‌ت ئێرنگه‌ى عێراق تويش قه‌يران گه‌وراێگ بويه، ئه‌وه‌يشه‌ هه‌ڵه‌وگه‌ردێ وه‌ ته‌ك بڕياردان و گووش نه‌ته‌كانن له‌ هوير وئه‌راچينه‌يل لايه‌نه‌يل تر ك خوه‌ى وه‌ قه‌وى زانين هاوپه‌يمانی ده‌وڵه‌ت ياساو سه‌رۆكه‌گه‌ى په‌يوه‌ندى راسه‌ى راس دێرێد. ئه‌وه‌گ دياره‌ يه‌سه‌ ك ئه‌ىده‌وڵه‌ته‌، سه‌روه‌خوه‌ى نييه‌و پيلانه‌يل وڵاته‌يل تره‌ك جيوه‌جێ كه‌ێد(قه‌رار نييه‌ خوو هه‌رچشت بويشيه‌يد، مانگ وه‌ چه‌و دياره‌ وه‌ كلگ ئه‌راى ئشاره‌ كه‌ن).جه‌ڕمه‌جه‌ته‌يل هوير مه‌زه‌وى كيشايه‌سه‌ ئه‌و جييه‌ ك ئێرنگه‌ دوينيمن، ناوچه‌يلێگ جوور سلێمان به‌گ و فه‌لوجه‌ كه‌فتيه‌سه‌ ده‌س گرووپ داعش. نه‌بايه‌د له‌يره‌ وه‌ ئاسانى له‌ لوى و لاى ئيچنه‌ چشتێ ره‌ێ بويمن.چوينكه‌ هاتن ئه‌ى گرووپه‌، له‌ ئه‌نجام كيشمه‌كيشه‌يل ده‌وڵه‌ت عێراق وه‌ل لايه‌نه‌يل سياسى وه‌ دسهاتيه‌ ك فێشتريان سوننين و ئه‌ى گرووپيشه‌ يه‌ وه‌ده‌رفه‌تێ ئه‌را خوه‌ى زانيه‌. ئێرنگه‌ جى دێرێد ئيمه‌ى كورد له‌ خوه‌مان بپرسيمن: ده‌وڵه‌ت عێراق تازه‌چوود هه‌رجووره‌ چه‌ك و ته‌قه‌مه‌نى ئه‌را هێزه‌يل چه‌كدار خوه‌ێ سێنێد، وه‌لى گه‌ى وه‌ ئيمه‌ ره‌سێد، له‌لێ بێبه‌ش‌ كريه‌يمن. تا ئه‌ى ساته‌ ده‌وڵه‌ت به‌غدا، چه‌ك ك هويچ، ته‌نانه‌ت مووچه‌ی مانگانه‌ وه‌ پێشمه‌رگه‌يل نه‌ياس‌ ك به‌ش فره‌ێگ له‌ خاك عێراق ها له‌ وه‌رسه‌يان و جوور چه‌وخوه‌يان پارێزنه‌ى. ئمجا له‌يره‌ عه‌قڵيه‌ت تريش هه‌س، ئه‌وه‌يشه‌ يه‌سه‌ ك نيه‌توان كورد له‌باوه‌ت ئابوورييه‌و سه‌روه‌خوه‌ێ بوود. ئمجا وه‌ل ده‌رهاتن نه‌فت له‌كوردستان، هه‌ر هانه‌ ده‌نويك وه‌شانن و هه‌ر رووژ وه‌ ده‌سپێچگێ وه‌لمانا ده‌س وه‌ يه‌قه‌ بوون. ئايا جى وه‌ نه‌ێرێد له‌يره‌ له‌ لاى خوه‌مان هويرله‌ يه‌ بكه‌يمه‌و ك جياوازى له‌ ناوه‌ين ئه‌ى حكوومه‌ته‌ وه‌ل حكووومه‌ته‌يل تر عێراق چه‌س!. ئايا ئه‌و هه‌مگه‌ زامه‌ته‌ ك سه‌ركرده‌يل كورد ئه‌را يه‌كه‌وگرتن عه‌ره‌وه‌يل كيشانه‌ ك گووش وه‌ شيعه‌و سوننى نيانه‌ ئيچنه‌ جواوه‌و دريه‌ێد. ئايا هه‌ميشه‌ بايه‌د كورد بكه‌فێده‌ وه‌ر پووز و خاسيه‌يلێ له‌ هويره‌و بچوود ك ئه‌را برايل عه‌ره‌و خوه‌ێ كردێه‌!. ئه‌راكورد ميه‌نتكيش ئه‌وه‌گ دياره‌ يه‌سه:‌ هه‌ر كه‌س له‌ برايل عه‌ره‌ومان نيشتيه‌سه‌و ته‌خت هه‌ر له‌ هوير ئه‌وه‌ بويه‌ بچه‌وسنێده‌مانه‌و و نه‌يلێده‌مان وچانێ بيه‌يم ‌و هه‌ناسێگ بكيشيم. ئێرنگه‌ هه‌ر‌كه‌س يا لايه‌ن تر بوياتادو ئيجووره‌ چشتێ و سه‌رێ باتاد، چرێ تر گرته‌و وه‌ر...!؟. ئايا هه‌ميشه‌ جوواو خاسى و نه‌يشتن له‌ يه‌ك ترازانێ ك كورد گرته‌و وه‌ر، جوواوێ يه‌سه‌ ك وه‌ سه‌رێ تيه‌رن؟شۆڕش شاواز