ته‌مامبوين سڵاى قوربانيداين وه‌ كورد ده‌يشت هه‌رێم

شفق نيوز

له‌يرا بايه‌سه‌ بويشيم كورد له‌ڕوى مه‌زه‌ويه‌و جياوازن و هه‌رێم كوردستانيش له‌ڕوى ناوده‌وڵه‌تيه‌و شانازى وه‌ى جوورايه‌تيه‌ ئه‌كا، ئمجا جوور ئه‌وه‌گ ملله‌ت كورد له‌ سياسه‌ت و مفايه‌يل زه‌ره‌دمه‌ن گه‌ورا بوى له‌ ريككه‌فتنامه‌ى سايكس بيكۆ، وه‌و جووريشه‌ ئه‌و پيكهاته‌يليشه‌ زه‌ره‌دمه‌ن گه‌وران له‌ كيشمه‌كيش ره‌گه‌زى و تايفى و تا رووژ ئمڕوويش فه‌رامووشى نه‌كرديمه‌ ك عراق له‌بان مه‌فهوميه‌ت شوفێنى عوسمانى دامه‌زرياو هه‌ر وه‌و مه‌فهوميه‌تيشه‌ مه‌زه‌وه‌يل ئيسه‌ى سياسى ته‌رويج كرياو ئيسه‌يش بايه‌سه‌ له‌بان سه‌ركرده‌يل كورد قسه‌‌ له‌بان حاڵ كومه‌ڵگامان بكه‌ن نه‌ك وه‌ فكره‌ى پيكهاته‌يليگ له‌ ملله‌ت ك له‌ بنه‌ڕه‌ته‌و زوڵمليگرياگ گه‌ورا بويه‌ له‌ناونى ملله‌ته‌يل جه‌هان، ك تائيسه‌يش سه‌ركردايه‌تى كوردستانى نياز دگانناين وه‌و فه‌رامووشكردن و دريغيه‌ نه‌يرێد وه‌خاتر چاره‌سه‌ر كيشه‌ى ئه‌و پيكهاته‌يله‌و سياسه‌ت ته‌ماشاوان له‌وه‌رانوه‌ريان ئه‌يه‌رێده‌ كار و جارجاريگيش ئدانه‌يگ ئه‌كا له‌ ئاكام ئه‌و كاره‌ساته‌يله‌ ك ئه‌ياده‌ تويشيان.

خاستر ئه‌وه‌سه‌ ئه‌و حزبه‌يل كوردستانيه‌ ك نوێنه‌رايه‌تى بته‌ويگ ديرن له‌ حكومه‌ت ناوه‌ندى ئاشكراى جه‌نگ پشتگووشخستن و تووڵه‌ نه‌كه‌ن وه‌بوونه‌ى ئاكام هه‌ڵوژاردنه‌يل يه‌ك له‌شوون يه‌ك، ئه‌ويش وه‌ ئه‌وه‌گ ئه‌و حزبه‌يله‌ وجووديان له‌ جاده‌ فريه‌ كزه‌ وه‌تايبه‌ت له‌ به‌غدا، وه‌ل ئه‌وه‌يشا ريڕه‌و نه‌ته‌وه‌يى كورد ده‌يشت هه‌رێميش له‌وه‌رچه‌و نه‌گيرياگه‌ ئه‌وه‌نه‌ى ئه‌وه‌گ هه‌وڵ و ته‌قلاى سياسى و حزبى ئه‌را خوه‌يان ئه‌يه‌ن، هه‌ر وه‌و خاتريشه‌ جوور نموونه‌ له‌بان قسه‌گه‌مان دوينيم ك ريڕه‌و تايفى شيعى ماف ڤيتۆ ديرێد له‌ گرفت و بڕين هه‌ر رييگ ك زه‌ره‌د بڕه‌سنێده‌ ئامانجه‌ سياسيه‌گه‌ى، وه‌لێ ئامانج نه‌ته‌وه‌يى كورد په‌نگه‌و خواردگه‌ له‌ ناو نويسينگه‌ و باره‌گاى حزبه‌يل و ئه‌و ئه‌ركه‌يليشه‌ ك درياوێده‌ ئه‌و كورده‌يله‌ حزبه‌يل ده‌سميه‌تيان نه‌يان ئه‌را جيوه‌جيكردنى و خوه‌يانيش له‌جياى ئه‌وان جيوه‌جيى نه‌كردن.

ئيسه‌يش بايه‌سه‌ ئه‌گه‌ر ئه‌را ته‌نيا جاريگيش بويه‌ سه‌ركردايه‌تى كوردستان وه‌تايبه‌ت هه‌ردوگ حزب سه‌ره‌كى پارت ديموكرات كوردستان و يه‌كێتى نيشتمانى كوردستان دگان وه‌ هه‌ر هه‌ڵوژاردنه‌يليگ له‌ ئاينده‌ى نزيكيش بنه‌ن ك سه‌ركه‌فتگ يه‌كه‌م له‌تى له‌ ده‌يشت هه‌رێم ته‌نيا مه‌زه‌وه‌يل ئسلامى سياسيه‌، چوينكه‌ وه‌گووره‌ى ئاماده‌بوينيان ئه‌را فيشتر له‌ ده‌يه‌يگ له‌ رووژگار له‌ناوچه‌يل ده‌يشت هه‌رێم بيجگه‌ شماره‌ى فريه‌يگ له‌ ريكخرياگ و باره‌گايه‌يل سه‌ر وه‌ خوه‌يان هويچ پلانيگ تر نه‌يرن مايه‌ى ئومێد بدێ له‌ بوار بته‌وكردن رووح نه‌ته‌وه‌يى له‌ناو كومه‌ڵگاى كورد ده‌يشت هه‌رێم و مقه‌يه‌تيكردن له‌ زووان داڵگى و بڵاوكردنه‌وه‌ى رووشنهويرى و مێژوو خه‌بات نه‌ته‌وه‌يى له‌ناونيان له‌وه‌رانوه‌ر په‌لامار بوغزداره‌يل و دوشمنه‌يل و كوشاننه‌وه‌ى ناسنامه‌ ئه‌را ده‌يه‌ها ساڵ، ك له‌ساى كزى ئنتماى نه‌ته‌وه‌يى مه‌حاڵه‌ حزب سياسى بتويه‌نێد له‌ڕى رينمايى نه‌ته‌وه‌ييه‌و مه‌ردم بگرێده‌ خوه‌ى.

حكومه‌ت له‌ به‌غدا وه‌ل به‌شدارى گشت پيكهاته‌يل له‌تى، وه‌لێ وه‌ل ئه‌وه‌يشا وه‌ په‌رده‌ى تايفى پيس كرياگه‌و كورد ده‌يشت هه‌رێميش له‌وه‌ر ژيان و زينگه‌وكردن كيشه‌گه‌يان و مقه‌يه‌تيكردن له‌ ئنتماى نه‌ته‌وه‌ييان هه‌وه‌جه‌ وه‌ بڕيگ وه‌رگرى ديرن و له‌وانه‌يش گله‌وخوادن حزبه‌يل سياسى و حكومه‌ت هه‌رێم له‌ سياسه‌ت پشتگووشخستن و فه‌رامووشكردن كورد ده‌يشت هه‌رێم و كاريگ بكه‌ن ڕزه‌يليان نه‌شيويه‌ێد و خود متمانه‌يى وه‌پيان بدريه‌ێد وه‌ل پيشكه‌شكردن پشتگيرى مه‌عنه‌وى ولۆجيستى ئه‌رايان وه‌بى مه‌زاجيه‌ت.

ئاماده‌گى فه‌يليه‌يل و ئێزيديه‌يل و شه‌به‌ك وكاكه‌يى له‌ دام وده‌زگايه‌يل ته‌شريعى و ته‌نفيزى له‌ هه‌رێم فه‌خريگه‌و دگانناينه‌ وه‌ ره‌سه‌نايه‌تى نه‌ته‌وه‌ييان و هويچ مه‌هانه‌يگ ئه‌را نه‌وينيان و جوادانه‌وه‌يان نيه‌، يه‌يش وه‌ چه‌واشه‌ى ئه‌وسا ك لايه‌ن يه‌كه‌م تواناى ته‌بريه‌كردن يا هه‌ر هه‌ڵه‌يگ يا دريغييگ له‌ خوه‌يه‌و نه‌يرێد له‌وه‌رانوه‌ر لايه‌ن دويه‌م(كورد ده‌يشت هه‌رێم)و لايه‌ن دويه‌ميش جوور ئه‌وسا نيه‌و ئيسه‌ تواناى وه‌رگرى له‌ مافه‌يلى ديرێد وه‌ ده‌رچگن له‌ بيده‌نگى، وه‌لێ ئمڕوو وه‌ل ئه‌و قوربانيه‌يل ئاشكرا ك وژدان ئنسانيه‌ت ئه‌يه‌رێده‌ له‌رزه‌ له‌گشت جه‌هان و له‌ مه‌سه‌له‌ى ئه‌وه‌گ هاته‌ تويش كورده‌يل ئێزيدى له‌و روێداگه‌يل و كاره‌ساته‌يله‌ ك كيشه‌ى كورد وه‌ته‌مامى قه‌رزاريانه‌، بايه‌سه‌ له‌بان سه‌ركردايه‌تى كورديش دى واز له‌ ريڕه‌و ده‌سهه‌ڵگرتن قوربانيداين وه‌ كورد ده‌يشت هه‌رێم و جوو قوربانى ئه‌را كيشه‌گه‌ پيشكه‌شيان بكه‌ن بارن، يه‌يش وه‌و جووره‌گ ئاشكراس له‌ناو كومه‌ڵگا ئه‌را ئه‌و كورده‌يله‌.

عه‌لى حسێن فه‌يلى