مه‌گه‌ر خودا بزانێد كورده‌یل فه‌یلى چه‌نیگ سه‌بردارن!

شفق نيوز

كووت و به‌دره‌و جه‌سان و نوعمانیه‌و عه‌زیزیه‌ ك زوورم ئى ناوچه‌یله‌ كه‌فنه‌ هه‌ردوگ پاریزگاى واست و میسان.

وه‌ل ئه‌وه‌یشا شماره‌یگیش له‌لیان له‌ناوچه‌یل تر جیاواز له‌پایته‌خت به‌غدا له‌جاده‌ى كفاح(عه‌گد ئه‌لئه‌كراد)و ناوچه‌ى جه‌میله‌و حه‌یولئه‌كراد ژیه‌ن بیجگه‌ ناوچه‌ى مسته‌نسریه‌ له‌ ناوچه‌ى عه‌قارى.

قه‌یلیه‌یل په‌یڕه‌وكه‌ر دین ئسلام و جه‌عفه‌رى مه‌زه‌ون، له‌هه‌مان وه‌خت له‌گشت پیشه‌یگ زانن و فره‌یگیش له‌لیان كار بازرگانى كه‌ن و شاره‌زان له‌مه‌یدان بازرگانى ك له‌ساڵ 1948 وه‌دویاوه‌ دویاى ئه‌وه‌ك به‌هوودیه‌یل كووچ كردن ئه‌را ئسرائیل زاڵ بوینه‌ بازرگانى وڵات و بازاڕه‌یل به‌غدا وه‌تایبه‌ت شۆرجه‌ى بازرگانى كه‌فته‌ ژیر كنترۆڵ خوه‌یان، ئنجا نه‌خش باڵایگ داشتن له‌ په‌ره‌داین وه‌كه‌رت بازرگانى و ئابوورى عراقى، وه‌ل ئه‌وه‌یشا قوربانى فره‌یگ دان له‌وه‌ر خاتر نه‌ته‌وه‌ى كوردو هه‌قه‌یل ڕه‌واى خوه‌یان، هه‌ر له‌وه‌ر ئه‌وه‌یش تویش به‌دبه‌ختى و مه‌ویسى و زه‌فتكردن هه‌قه‌یلیان هاتن و ئه‌وه‌ بوى وه‌ زووره‌ملى له‌وڵات خوه‌یان ده‌ركریان له‌وه‌خت ده‌سڵات ئه‌حمه‌د حه‌سه‌ن به‌كر له‌ساڵ 1970و سه‌ره‌تاى ده‌سڵات سه‌دام له‌نیسان 1980وه‌مه‌هانه‌و هویچ هووكاریگ سه‌ره‌كى و باوه‌ڕ وه‌پیكریاگ نه‌وى و هه‌ر له‌وه‌ر ئه‌وه‌یش وه‌ ته‌به‌عیه‌ى ئیرانى و بیگانه‌ دریانه‌ قه‌ڵه‌م و دویره‌و خریان.

به‌عسیه‌یل هه‌ر له‌وه‌خت وه‌ده‌سگرتن ده‌سڵاتیان له‌ 1968 شیوزایگ له‌دوشمنایه‌تى دژ ملله‌ت كورد وه‌گشتى و كورده‌یل فه‌یلى وه‌تایبه‌ت هاوردنه‌ كار و ئه‌نجام ئه‌و كرده‌وه‌یشه‌ ده‌ركردن زووره‌ملى له‌لى كه‌فته‌و له‌وه‌رجه‌ جه‌نگ ناونى عراق و ئیران، ك داروده‌سه‌ى رژیم رمیاگ ده‌سكردنه‌ گرتن و كوشتن كورده‌یل فه‌یلى و خستنه‌یان زندان و ژن و پیاوه‌یل گه‌وراو په‌ككه‌فتگ و مناڵه‌یلیان وه‌ زوور ده‌ركریان وه‌ره‌و ئیران و گشت ماڵ و موڵك و داراییان له‌لیان زه‌فت كریاو له‌ڕى شوونه‌یل مینداره‌و ره‌وانه‌ى ئیران كریان و جایه‌ڵ جوانه‌یلیان له‌قه‌وره‌یل وه‌جه‌م بى سه‌روشوون كریان ك تائیسه‌یش چاره‌نویسیان نادیاره‌.

فه‌یلیه‌یل سه‌بر فره‌یگ كردن جوی سه‌بر ئه‌یووب، ئنجا وه‌ختیگیش ئاڵشتكارى رویدا له‌ 9/4/2003 له‌عراق، مزگانى دریا عراقیه‌یل و كوردو له‌وانه‌یش كورده‌یل فه‌یلى و گشت نه‌ته‌وه‌و كه‌مینه‌یل تر ك هه‌قه‌یلیان تیه‌ێده‌وه‌و بایه‌سه‌ قه‌ره‌بوو بكریه‌ن وه‌گووره‌ى ئه‌و زه‌ره‌د و سته‌مه‌یله‌ ك له‌لایه‌ن رژیمه‌یل وه‌رینه‌و هاته‌ تویشیان، وه‌لى ئاره‌زووه‌یلیان ناته‌ دى و هویچ چاره‌سه‌ریگ ئه‌را كیشه‌یلیان نه‌كریاو له‌وانه‌یش مه‌سه‌له‌ى ناسنامه‌و هه‌قه‌یلیان، بیگومان یه‌یش بووده‌ وه‌ربه‌س له‌وه‌رده‌میان ئه‌را به‌شداریكردن له‌هه‌ڵوژاردنه‌یل نوێنه‌رایه‌تى و فه‌یلیه‌یل گومان له‌وه‌ دیرن تویش گرفت زیاتر بان له‌سه‌رشمارى چه‌وڕیكریاى.

مسه‌له‌ى به‌ڵگه‌یل ره‌سمى و ناسنامه‌ بویه‌سه‌ وه‌ربه‌س له‌وه‌رده‌م ناتنه‌وه‌ى خیزانه‌یل كورد فه‌یلى ده‌ركریاگ له‌ئیران تائیسه‌و هه‌ر ئه‌وه‌یش نیه‌یلێد بانه‌و ئه‌را عراق، یه‌یش یه‌كیگه‌ له‌و گرفته‌یله‌ ك بویه‌سه‌ مایه‌ى بى مه‌یلى و ناخوه‌شى كورده‌یل فه‌یلى. ئنجا ئایا هه‌ق ئه‌وه‌ نه‌یرن گشت هه‌قه‌یل هاووڵاتیبوین و هه‌قه‌یل ئنسانى ئه‌ڕایان دابین بكریه‌ێد؟ هه‌ر له‌وه‌ر ئه‌وه‌یش بایه‌سه‌ گشت ریكخریاگه‌یل كورد فه‌یلى یه‌كڕز بوون و هه‌وڵ بیه‌ن له‌وه‌ر خاتر هاوردنه‌وه‌ى هه‌قه‌یل كورد فه‌یلى و جویر هاووڵاتیه‌یل تر له‌نه‌ته‌وه‌یل تر هه‌ق خوه‌یان دیرن له‌ى وڵاته‌.

 

محه‌مه‌د عه‌لى سه‌ماوى